សិក្ខាសាលាស្តីពីទឹកស្អាត និងប្រព័ន្ធទឹកកខ្វក់ កម្ពុជា-ជប៉ុន ២០២៦ លើកទី១៨ ដើម្បីពង្រីកកិច្ចសហប្រតិបត្តិការឱ្យកាន់តែល្អប្រសើររវាងប្រទេសទាំងពីរ ភ្នំពេញ៖ នាថ្ងៃពុធ ទី១៤ ខែមករា ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន អញ្ជើញដឹកនាំគណ:ប្រតិភូក្រសួងចូលរួមសិក្ខាសាលាស្តីពីទឹកស្អាត និងប្រព័ន្ធទឹកកខ្វក់ កម្ពុជា-ជប៉ុន ២០២៦ លើកទី១៨ ដែលសហការរៀបចំដោយក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ (MISTI) ក្រសួងសាធារណការ និងដឹកជញ្ជូន(MPWT) ក្រសួងរៀបចំដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន (MLIT) អង្គភាពទឹកស្អាត និងប្រព័ន្ធអនាម័យ ទីក្រុង Kitakyushu សមាគមអាជីវកម្មទឹកក្រៅប្រទេស នៃទីក្រុង Kitakyushu (KOWBA) និងសមាគមអ្នកផ្គត់ផ្គង់ទឹកស្អាតកម្ពុជា (CWA) ដោយបានការគាំទ្រពី ស្ថានទូតជប៉ុន និងទីភ្នាក់ងារសហប្រតិបត្តិការអន្តរជាតិជប៉ុន (JICA)។ សិក្ខាសាលានេះមានការអញ្ជើញចូលរួមពី ឯកឧត្តម ស៊ឹម ស៊ីថា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ឯកឧត្តម ISHI Hiroyuki អនុរដ្ឋមន្ត្រីសម្រាប់វិស័យទឹកស្អាត និងទឹកកខ្វក់នៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន(MLIT) ឯកឧត្តម UENO Atsushi ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំព្រះរាជាណាចក្រកម្ពុជា លោក EGUCHI Tetsuro អភិបាលរងទីក្រុងគីតាឡីសឺ ឯកឧត្តមអគ្គនាយក លោក-លោកស្រី អគ្គនាយករង លោកប្រធាននាយកដ្ឋាន និងមន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់របស់ក្រសួងសាធារណការ និងដឹកជញ្ជូន ព្រមទាំង ឯកឧត្តម លោកជំទាវ លោក-លោកស្រីជាតំណាងអង្គការជាតិ អន្តរជាតិ វិស័យឯកជន និងតំណាងមន្ទីរាជធានីខេត្ត សរុបចំនួន ៥៦០នាក់។ គោលបំណងនៃសិក្ឋាសាលានេះគឺដើម្បីចែករំលែកអំពីបច្ចុប្បន្នភាព និងស្ថានភាពនៃការគ្រប់គ្រងទឹកស្អាត និងប្រព័ន្ធទឹកកខ្វក់ ព្រមទាំងបង្កើន ពង្រឹង និងពង្រីកនូវកិច្ចសហប្រតិបត្តិការឱ្យកាន់តែល្អប្រសើររវាងប្រទេសទាំងពីរ គឺ កម្ពុជា-ជប៉ុន លើវិស័យទឹកស្អាត និងទឹកកខ្វក់ ដោយផ្តោតជាសំខាន់លើការអភិវឌ្ឍ និងការធានានូវធនធានមនុស្សលើវិស័យទឹកស្អាត និងទឹកកខ្វក់ ដើម្បីកែលម្អគុណភាពជីវិតរបស់ប្រជាពលរដ្ឋ និងបរិស្ថាន ព្រមទាំងការឆ្លើយតបទៅនឹងយុទ្ធសាស្ត្រអភិវឌ្ឍន៍ជាតិ ដែលបានផ្តល់អាទិភាពលើការអភិវឌ្ឍធនធានមនុស្ស ការកែលម្អសេវាសាធារណៈ និងការអភិវឌ្ឍហេដ្ឋារចនាសម្ព័ន្ធប្រកបដោយចីរភាព និងនិរន្តរភាព