អាជ្ញាធរខណ្ឌទួលគោក បានចេញសេចក្តីជូនដំណឹងពីការអនុវត្តរៀបចំកែលម្អផ្លូវថ្មើរជើង តាមបណ្តោយមហាវិថីម៉ៅ សេទុង (ផ្លូវលេខ២៤៥) ចាប់ពីស្តុបចេនឡារហូតដល់ស្តុបស្ពានអាកាស ៥ មករា។សេចក្តីជូនដំណឹងរបស់រដ្ឋបាលខណ្ឌទួលគោកបានឲ្យដឹងថា នៅថ្ងៃទី១៨ ខែមករា ឆ្នាំ២០២៦ នាពេលខាងមុខ រដ្ឋបាលខណ្ឌទួលគោកនឹងអនុវត្តគម្រោងរៀបចំកែលម្អផ្លូវថ្មើរជើង តាមបណ្តោយមហាវិថីម៉ៅសេទុង (ផ្លូវលេខ២៤៥) ចាប់ពីស្តុបចេនឡា រហូតដល់ស្តុបស្ពានអាកាស ៥មករា ឱ្យមានសណ្តាប់ធ្នាប់ របៀបរៀបរយ និងមានសោភណភាពល្អ សម្រាប់អ្នកថ្មើរជើង និងជនពិការធ្វើដំណើរដោយងាយស្រួល និងមានផាសុកភាព។ដើម្បីឱ្យការអនុវត្តការងារទទួលបានលទ្ធផលតាមផែនការគ្រោងទុក រដ្ឋបាលខណ្ឌទួលគោកណែនាំដល់ពលរដ្ឋរស់នៅតាមបណ្តោយផ្លូវលេខ ២៤៥ ទាំងអស់ ចូលរួមអនុវត្តដោយបញ្ឈប់ជាបន្ទាន់ក្នុងការលក់ដូរឬជួលចិញ្ចើមផ្លូវសាធារណៈនៅមុខផ្ទះរបស់ខ្លួនទៅឱ្យអាជីវករលក់ដូរគ្រប់ប្រភេទ ដើម្បីប្រកបអាជីវកម្មនៅលើចិញ្ចើមផ្លូវសាធារណៈ ហើយត្រូវប្តូរទីតាំងទៅប្រកបអាជីវកម្មនៅផ្សារបោះដុំពាណិជ្ជកម្មអន្តរជាតិអាស៊ាន-កម្ពុជា ស្ថិតនៅផ្លូវទំនប់កប់ស្រូវ សង្កាត់ គោករកា ខណ្ឌព្រែកព្នៅ។ម្ចាស់ផ្ទះត្រូវធ្វើការរុះរើឬកាត់សំយ៉ាបរោងលក់ដូរផ្សេងៗ ដែលបានសង់លយរំលោភលើចិញ្ចើមផ្លូវសាធារណៈតាមគំនូសដែលអាជ្ញាធរបានកំណត់។ បន្ថែមពីនេះ អាជ្ញាធរមិនអនុញ្ញាតឱ្យមានការចតឬឈប់យានយន្តដឹកជញ្ជូនទំនិញដើម្បីផ្ទេរទំនិញគ្រប់ប្រភេទតាមគ្រប់មធ្យោបាយនៅលើចិញ្ចើមផ្លូវ និងទ្រូងផ្លូវសាធារណៈជាកំហិត។ ក្នុងករណីមិនអនុវត្ត អាជ្ញាធរមានសមត្ថកិច្ចនឹងអនុវត្តវិធានការរដ្ឋបាល និងវិធានការច្បាប់ក្នុងករណីធ្ងន់ធ្ងរ និងមិនទទួលខុសត្រូវលើការខូតខាត ឬបាត់បង់សម្ភារណាមួយឡើយ៕