កិច្ចប្រជុំបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់អគ្គនាយកដ្ឋានផែនការ និងគោលនយោបាយ ទីស្តីការក្រសួង៖ នាថ្ងៃសុក្រ ទី១២ ខែធ្នូ ឆ្នាំ២០២៥ ឯកឧត្តម សុន សុខកេង អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់អគ្គនាយកដ្ឋានផែនការ និងគោលនយោបាយ ដោយមានការចូលរួមពីឯកឧត្ដមអគ្គនាយក លោក លោកស្រី អគ្គនាយករង ប្រធាននាយកដ្ឋាន អនុប្រធាននាយកដ្ឋាន ប្រធានការិយាល័យ អនុប្រធានការិយាល័យ និងមន្ត្រីរាជការពាក់ព័ន្ធមួយចំនួន។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យវឌ្ឍនភាពការងាររបស់នាយកដ្ឋានក្រោមឱវាទ ដែលបានអនុវត្តនៅក្នុងឆ្នាំ២០២៥ និងកំណត់ទិសដៅអនុវត្តនៅឆ្នាំបន្ទាប់ ជាពិសេសរៀបចំយន្តការគ្រប់គ្រង និងអនុវត្តការងារឱ្យឆ្លើយតបទៅនឹងផែនការសកម្មភាព និងចក្ខុវិស័យរបស់ក្រសួង។ ជាការកត់សម្គាល់ អគ្គនាយកដ្ឋានផែនការ និងគោលនយោបាយ បានសម្រេចការងារសំខាន់ៗ ដូចជា៖ ផែនការយុទ្ធសាស្ត្រថវិកា (BSP) , គម្រោងកម្មវិធីវិនិយោគសាធារណៈ ៣ឆ្នាំរំកិល ២០២៦-២០២៨, ការងារបរិស្ថាននិងសង្គម, ការងារចងក្រង និងផ្សព្វផ្សាយស្ថិតិប្រចាំឆ្នាំ, ការផ្សព្វផ្សាយក្របខណ្ឌគោលនយោបាយពាក់ព័ន្ធវិស័យសាធារណការ និងដឹកជញ្ជូន, ការពង្រឹងគុណភាពសេវាសាធារណៈក្នុងវិស័យសាធារណការ និងដឹកជញ្ជូន និងការដាក់ឱ្យអនុវត្តគោលការណ៍ណែនាំស្តីពីក្របខ័ណ្ឌតាមដាន ត្រួតពិនិត្យ និងវាយតម្លៃសមិទ្ធកម្មផែនការសកម្មភាពអាទិភាពក្នុងវិស័យសាធារណការ និងដឹកជញ្ជូន។ ជាអនុសាសន៍សម្រាប់ការដាក់ចេញនូវទិសដៅអនុវត្តបន្ត ឯកឧត្តមប្រធានអង្គប្រជុំ បានណែនាំឱ្យអគ្គនាយកដ្ឋានផែនការ និងគោលនយោបាយ ជាពិសេសនាយកដ្ឋានក្រោមឱវាទត្រូវរៀបចំកំណត់ផែនការសកម្មការងារសម្រាប់ឆ្នាំ២០២៦ ឱ្យបានមុតស្រួចលើការងារស្នូលឆ្លើយតបទៅនឹងចក្ខុវិស័យរបស់ក្រសួង និងគោលនយោបាយអាទិភាពនានារបស់រាជរដ្ឋាភិបាល ជាពិសេសយុទ្ធសាស្រ្តបញ្ចកោណ-ដំណាក់កាលទី១។ ជាមួយគ្នានេះ ឯកឧត្ដមប្រធានអង្គប្រជុំ ក៏បានណែនាំឱ្យនាយកដ្ឋានក្រោមឱវាទ ត្រូវពង្រឹងស្ថាប័ន និងប្រព័ន្ធការងាររបស់ខ្លួន ឱ្យកាន់តែមានគុណភាព គណនេយ្យភាព និងប្រសិទ្ធភាពខ្ពស់ផងដែរ៕