ក្រសួងសាធារណការ និងដឹកជញ្ជូនកម្ពុជា សហការជាមួយក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន រៀបចំសិក្ខាសាលាស្តីពី ការសម្រេចបានកំពង់ផែអព្យាក្រឹតកាបូន នៅក្នុងតំបន់អាស៊ាន រាជធានីភ្នំពេញ៖ នាថ្ងៃពុធ ទី១០ ខែធ្នូ ឆ្នាំ២០២៥ លោកជំទាវ កុយ សុដានី រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្រ្ដីក្រសួងសាធារណការ និងដឹកជញ្ជូន ឯកឧត្តម អ៊ូអិណូ អាត់ស៊ូស៊ី (UENO Atsushi) ឯកអគ្គរាជទូតជប៉ុនប្រចាំកម្ពុជា និង លោក KANEMARU Keisuke ប្រធានការិយាល័យផែនការគោលនយោបាយអន្តរជាតិ នៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន បានអញ្ជើញជាសហធិបតីបើកសិក្ខាសាលាជាផ្លូវការ និងទទួលស្វាគមន៍គណៈប្រតិភូនៃបណ្ដាប្រទេសជាសមាជិកអាស៊ាន លេខាធិការដ្ឋានអាស៊ាន និងតំណាងក្រុមហ៊ុនឯកជន ដែលអញ្ជើញចូលរួមសិក្ខាសាលាស្តីពី "ការសម្រេចបានកំពង់ផែអព្យាក្រឹតកាបូន នៅក្នុងតំបន់អាស៊ាន" និងកិច្ចប្រជុំ "ក្រុមបច្ចេកវិទ្យាកំពង់ផែអាស៊ាន-ជប៉ុន លើកទី២៣" ក្នុងគោលបំណងពង្រឹងការយល់ដឹងអំពីកំពង់ផែអព្យាក្រឹតកាបូនក្នុងអាស៊ាន ដល់ប្រតិបត្តិករកំពង់ផែទាំងអស់ និងវិស័យពាក់ព័ន្ធ។ សិក្ខាសាលាត្រូវបានរៀបចំឡើង ក្រោមកិច្ចសហការរៀបចំដោយក្រសួងសាធារណការ និងដឹកជញ្ជូនកម្ពុជា ជាមួយក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ដែលប្រព្រឹត្តទៅចាប់ពីថ្ងៃទី១០-១១ ខែធ្នូ ឆ្នាំ២០២៥ ដោយមានការចូលរួមពីគណៈប្រតិភូនៃបណ្តាប្រទេសជាសមាជិកអាស៊ាន (ព្រុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី) លេខាធិការដ្ឋានអាស៊ាន JICA Overseas Coastal Area Development Institute of Japan (OCDI) ក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ក្រសួងសាធារណការ និងដឹកជញ្ជូនកម្ពុជា តំណាងក្រសួងការបរទេស និងសហប្រតិបត្តិការអន្តរជាតិ ក្រសួងបរិស្ថាន ក្រសួងរ៉ែ និងថាមពល ក្រសួងធនធានទឹក និងឧតុនិយម ក្រុមហ៊ុនជប៉ុន និងក្រុមហ៊ុនអភិវឌ្ឍន៍កំពង់ផែនៅកម្ពុជា និងស្ថាប័នពាក់ព័ន្ធ សរុបប្រមាណ១៤០នាក់ ផងដែរ។ លោកជំទាវរដ្ឋលេខាធិការប្រចាំការ បានជម្រាបជូនអង្គសិក្ខាសាលាអំពីការអភិវឌ្ឍឯកសារយុទ្ធសាស្ត្រសំខាន់ៗចំនួន ៣ របស់ក្រសួងសាធារណការ និងដឹកជញ្ជូន ដើម្បីបង្កើនប្រសិទ្ធភាពវិស័យកំពង់ផែ រួមមាន៖ ១). ក្របខណ្ឌអភិវឌ្ឍន៍សម្រាប់ការអភិវឌ្ឍ និងគ្រប់គ្រងមជ្ឈមណ្ឌលអាជីវកម្មកំពង់ផែ ឆ្នាំ២០២៥–២០៣៣ ២). គោលការណ៍ណែនាំ សម្រាប់ការធ្វើផែនការអភិវឌ្ឍន៍កំពង់ផែ ស្តង់ដាបច្ចេកទេសកំពង់ផែនៅកម្ពុជា និងផែនការតំបន់កំពង់ផែ ដោយមានការគាំទ្រពី JICA និង ៣). ការកំពុងដំណើរការអភិវឌ្ឍផែនការមេ ដើម្បីកែប្រែកំពង់ផែស្វយ័តក្រុងព្រះសីហនុឱ្យក្លាយជាកំពង់ផែ និងមជ្ឈមណ្ឌលភស្ដុភារកម្មថ្នាក់តំបន់ ក្នុងឆ្នាំ២០២៥៕