ក្រចេះ៖ មន្ត្រីមន្ទីរសាធារណការ និងដឹកជញ្ជូនខេត្តក្រចេះបានឱ្យដឹងថា គិតចាប់ពីខែមករា ដល់ខែកញ្ញា ឆ្នាំ២០២៥ ក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសខេត្តបានដាក់គោលដៅត្រួតពិនិត្យចល័តនៅតាមបណ្តាផ្លូវជាតិ-ខេត្តសំខាន់ៗលើរថយន្តចំនួន៣.១០៧គ្រឿង ក្នុងនោះរកឃើញរកឃើញរថយន្តកែច្នៃខុសលក្ខណ:បច្ចេកទេស និងខ្វះឯកសារជិត១០០០គ្រឿង ។ លោក សាំង ប៊ុនថេន ប្រធានមន្ទីរសាធារណការ និងដឹកជញ្ជូន ខេត្តក្រចេះ បានឱ្យដឹងទៀតថា ក្នុងចំណោមរថយន្តជាង៣០០០គ្រឿងដែលមន្ត្រីជំនាញចុះត្រួតពិនិត្យក្នុងរយៈពេល៩ខែនោះ គឺមានរថយន្តចំនួន២៦គ្រឿងត្រូវបានឃាត់ទុកនិងកាត់ទ្រុងចេញ ក្រៅពីនេះ មានរថយន្តគ្មានស្លាកលេខ ដឹកទំនិញខុសលក្ខណៈបច្ចេកទេស គ្មានភ្លើងបំភ្លឺ រថយន្តខុសបច្ចេកទេសចំនួន២១គ្រឿង ខ្វះឯកសារចំនួន ៧៦៦គ្រឿង ប្រើប្រាស់បណ្ណបើកបរខុសប្រភេទយានយន្ត១២០នាក់ និងគ្មានបណ្ណបើកបរ ០១នាក់ ។លោកប្រធានមន្ទីរបញ្ជាក់ថា មន្ត្រីជំនាញនឹងបន្តត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់អតិបរមា និងយានយន្តកែច្នៃខុសលក្ខណៈបច្ចេកទេស ព្រមទាំងបន្តការងារការចុះផ្សព្វផ្សាយស្តីពីសុវត្ថិភាពចរាចរណ៍ផ្លូវគោកតាមបណ្តាក្រុង-ស្រុកថែមទៀត។ ជាមួយគ្នានេះ លោក សាំង ប៊ុនថេនក៏បានអំពាវនាវដល់ម្ចាស់យានយន្ត និងអ្នកបើកបរ ត្រូវគោរពទៅតាមសារាចរ ណែនាំរបស់ក្រសួងឱ្យបានត្រឹមត្រូវហើយចូលរួមគោរពច្បាប់ចរាចរណ៍ទាំងអស់គ្នាដើម្បីសោភ័ណ្ឌភាព-សុវត្ថិភាពយានយន្ត អ្នកបើកបរ និងអ្នកធ្វើដំណើររួមលើដងផ្លូវសាធារណៈផងដែរ ៕