សិក្ខាសាលាផ្សព្វផ្សាយ ស្ដីពី "ការសិក្សាអភិវឌ្ឍតំបន់កំពង់ផែ" ក្រោមគម្រោងពង្រឹងសមត្ថភាពរដ្ឋបាលកំពង់ផែក្នុងព្រះរាជាណាចក្រកម្ពុជា រាជធានីភ្នំពេញ: នាថ្ងៃព្រហស្បតិ៍ ទី២០ ខែវិច្ឆិកា ឆ្នាំ២០២៥ អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានសហការជាមួយក្រុមការងារអនុវត្តគម្រោងរបស់វិទ្យាស្ថាន OCDI និងទីភ្នាក់ងារសហប្រតិបត្តិការអន្តរជាតិ JICA នៃប្រទេសជប៉ុន រៀបចំសិក្ខាសាលាផ្សព្វផ្សាយស្ដីពី"ការសិក្សាអភិវឌ្ឍតំបន់កំពង់ផែ" ក្រោមគម្រោងពង្រឹងសមត្ថភាពពង្រឹងសមត្ថភាពរដ្ឋបាលកំពង់ផែក្នុងព្រះរាជាណាចក្រកម្ពុជា ក្រោមអធិបតីភាព ឯកឧត្ដម អៀង វ៉េងស៊ុន រដ្ឋលេខាធិការ ក្រសួងសាធារការ និងដឹកជញ្ជូន ដោយមានការចូលរួមពីសំណាក់ ឯកឧត្ដម-លោកជំទាវអនុរដ្ឋលេខាធិការ ឯកឧត្ដមអគ្គនាយក លោក-លោកស្រីអគ្គនាយករង លោកប្រធាននាយកដ្ឋាន និងមន្រ្តីជំនាញពាក់ព័ន្ធពីអគ្គនាយកដ្ឋាន រួមជាមួយនឹងក្រសួង-ស្ថាប័នពាក់ព័ន្ធ តំណាងកំពង់ស្វយ័តទាំងពីរ មន្ទីររាជធានីភ្នំពេញ-ខេត្ត ក្រុមហ៊ុនកំពង់ផែឯកជន និងក្រុមហ៊ុនពាក់ព័ន្ធដែលកំពុងប្រកបអាជីវកម្មក្នុងវិស័យដឹកជញ្ជូនតាមផ្លូវទឹកក្នុងព្រះរាជាណាចក្រកម្ពុជា។ គោលបំណងនៃសិក្ខាសាលាផ្សព្វផ្សាយនេះ ដើម្បីបង្ហាញពីលទ្ធផលនៃការសិក្សាជូនដល់ភាគីពាក់ព័ន្ធក្នុងវិស័យដឹកជញ្ជូនតាមផ្លូវទឹកក្នុងព្រះរាជាណាចក្រកម្ពុជា ដែលជាផ្នែកមួយក្នុងការជួយជំរុញការអភិវឌ្ឍវិស័យកំពង់ផែ និងលើកកម្ពស់វិស័យដឹកជញ្ជូនតាមផ្លូវទឹករបស់ប្រទេសកម្ពុជាឱ្យកាន់តែមានប្រសិទ្ធភាព។ លទ្ធផលដែលបង្ហាញក្នុងការសិក្សាគម្រោងនេះនឹងក្លាយជាធាតុចូលដ៏សំខាន់ដល់ក្រុមការងារជំនាញក្នុងការអភិវឌ្ឍ និងកំណត់ដែនកំពង់ផែឱ្យកាន់តែមានភាពជាក់លាក់ប្រកបដោយចីរភាព និងប្រសិទ្ធភាពខ្ពស់ ស្របតាមផែនការមេគ្រប់ជ្រោយស្ដីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា២០២៣-២០៣៣ របស់រាជរដ្ឋាភិបាលម្ពុជា៕