សិក្ខាសាលាស្ដីពីវិធីសាស្រ្តក្នុងការប្រមូល ចងក្រង និងវិភាគស្ថិតិ និងផ្សព្វផ្សាយស្ថិតិវិស័យសាធារណការ និងដឹកជញ្ជូនប្រចាំឆ្នាំ សៀមរាប៖ នាថ្ងៃព្រហស្បតិ៍ ទី២០ ខែវិច្ឆិកា ឆ្នាំ២០២៥ ឯកឧត្ដម សឿន ប៊ុនលី អគ្គនាយកនៃអគ្គនាយកដ្ឋានផែនការ និងគោលនយោបាយ បានអញ្ជើញជាអធិបតីដឹកនាំសិក្ខាសាលាស្ដីពីវិធីសាស្រ្តក្នុងការប្រមូល ចងក្រង និងវិភាគស្ថិតិ និងផ្សព្វផ្សាយស្ថិតិវិស័យសាធារណការ និងដឹកជញ្ជូនប្រចាំឆ្នាំ ដោយមានការអញ្ជើញចូលរួមពីតំណាងអគ្គនាយកដ្ឋាន និងអង្គភាពក្រោមឱវាទក្រសួង រួមទាំងសិក្ខាកាមដែលជាមន្ត្រីបង្គោលទទួលបន្ទុកការងារស្ថិតិរបស់ក្រសួងមកពីគ្រប់អគ្គនាយកដ្ឋានជំនាញ សហគ្រាសសាធារណៈ និងមន្ទីរសាធារណការ និងដឹកជញ្ជូន ទាំង២៥ រាជធានី-ខេត្ត សរុបប្រមាណជាង ១០០នាក់។ សិក្ខាសាលានេះត្រូវបានរៀបចំឡើងក្នុងគោលបំណងដើម្បីផ្តល់នូវមូលដ្ឋានចំណេះដឹងទាំងផ្នែកទ្រឹស្តី និងការអនុវត្តផ្ទាល់ជូនដល់សិក្ខាកាមពាក់ព័ន្ធនឹងវិធីសាស្ត្រក្នុងការប្រមូលនិងវិភាគស្ថិតិ ការណែនាំអំពីទម្រង់ស្ថិតិសូចនាករដែលបានសិក្សាស្រាវជ្រាវ និងធ្វើបច្ចុប្បន្នភាពស្របតាមបរិបទជាតិ តំបន់ និងសកលលោក និងការពិនិត្យសម្អាតទិន្នន័យគ្រោះថ្នាក់ចរាចរណ៍ផ្លូវគោក ជាពិសេតម្រង់ទិសដល់មន្ត្រីបង្គោលក្នុងការចូលរួមសហការបំពេញ និងផ្ដល់ទិន្នន័យស្ថិតិ ប្រកបដោយគុណភាព សុក្រឹត្យភាព និងគ្រប់ជ្រុងជ្រោយ។ ជាមួយគ្នានេះ សិក្ខាសាលានេះ ក៏បានផ្សព្វផ្សាយសៀវភៅទិន្នន័យស្ថិតិវិស័យសាធារណការនិងដឹកជញ្ជូនប្រចាំឆ្នាំ ដែលជាកិច្ចខិតខំប្រឹងប្រែង និងសមិទ្ធផលរួមគ្នាជាមួយអគ្គនាយកដ្ឋានជំនាញ សហគ្រាសសាធារណៈ និងមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត ដើម្បីប្រើប្រាស់ជាមូលដ្ឋានក្នុងការជួយដល់គាំទ្រដល់ការរៀបចំក្របខ័ណ្ឌគោលនយោបាយ ផែនការមេអភិវឌ្ឍន៍វិស័យហេដ្ឋារចនាសម្ព័ន្ធដឹកជញ្ជូន ផែនការយុទ្ធសាស្ត្រអភិវឌ្ឍន៍ជាតិ ផែនការសកម្មភាពអាទិភាព និងការសិក្សាស្រាវជ្រាវគម្រោងផ្សេងៗទៀត៕