កិច្ចប្រជុំពិនិត្យ និងពិភាក្សាលើសេចក្តីព្រាងអនុក្រឹត្យ ស្តីពីការរៀបចំ និងការប្រព្រឹត្តទៅរបស់គណៈកម្មាធិការជាតិសម្របសម្រួលការដឹកជញ្ជូនឆ្លងកាត់ ទីស្ដីការក្រសួង៖ នាថ្ងៃសុក្រ ទី១៤ ខែវិច្ឆិកា ឆ្នាំ២០២៥ ឯកឧត្តម តូច ចាន់កុសល និងឯកឧត្តម ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាសហប្រធានអញ្ជើញដឹកនាំកិច្ចប្រជុំពិនិត្យ និងពិភាក្សាលើសេចក្ដីព្រាងអនុក្រឹត្យ ស្តីពីការរៀបចំ និងការប្រព្រឹត្តទៅរបស់គណៈកម្មាធិការជាតិសម្របសម្រួលការដឹកជញ្ជូនឆ្លងកាត់ ដោយមានការចូលរួមពីថ្នាក់ដឹកនាំក្រសួង ថ្នាក់ដឹកនាំអគ្គនាយកដ្ឋានជំនាញពាក់ព័ន្ធក្រោមឱវាទក្រសួង ព្រមទាំងមន្ត្រីជំនាញជាច្រើនរូបផងដែរ។ កិច្ចប្រជុំនេះ រៀបចំឡើងក្នុងគោលបំណងដើម្បីពិនិត្យ និងពិភាក្សាប្រមូលធាតុចូលបន្ថែមពីអង្គភាពពាក់ព័ន្ធទៅលើចំណងជើង និងមាត្រាមួយចំនួន សំដៅធ្វើយ៉ាងណាធានាថាសេចក្តីព្រាងអនុក្រឹត្យនេះ ប្រកបដោយអត្ថន័យខ្លឹមសារត្រឹមត្រូវ គ្រប់គ្រាន់មានភាពគ្រប់ជ្រុងជ្រោយ និងកែសម្រួលបន្ថែមនូវពាក្យពេចន៍ ឃ្លោងឃ្លា និងប្រយោគដែលមានភាពខ្វះចន្លោះនៅលើមាត្រាមួយចំនួនឱ្យមានសង្គតិភាព ឆ្លើយតបទៅនឹងស្ថានភាពបច្ចុប្បន្នជាក់ស្ដែង ព្រមទាំងជួយពន្លឿនដល់ការរៀបចំឱ្យបានកាន់តែឆាប់រហ័ស ដើម្បីដាក់ជូនថ្នាក់ដឹកនាំក្រសួង នាពេលឆាប់ៗខាងមុខ៕