ថ្នាក់ដឹកនាំក្រសួងចុះពិនិត្យ និងពិភាក្សាលើដំណើរការនៃប្រតិបត្តិការ និងការថែទាំស្ថានីយប្រព្រឹត្តកម្មទឹកកខ្វក់ នៅក្នុងក្រុងកំពង់ឆ្នាំង និងក្រុងពោធិ៍សាត់ កំពង់ឆ្នាំង-ពោធិ៍សាត់៖ នាថ្ងៃចន្ទ ទី២៧ ខែតុលា ឆ្នាំ២០២៥ ឯកឧត្តម គួច ប៊ុនលាត រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញចុះពិនិត្យ និងពិភាក្សាលើដំណើរការនៃប្រតិបត្តិការ និងការថែទាំស្ថានីយប្រព្រឹត្តកម្មទឹកកខ្វក់ នៅក្នុងក្រុងកំពង់ឆ្នាំង និងក្រុងពោធិ៍សាត់ ដោយមានការចូលរួមពីសំណាក់ ឯកឧត្តមអគ្គនាយក លោកអគ្គនាយករង លោកប្រធាន អនុប្រធាននាយកដ្ឋាន មន្ត្រីបច្ចេកទេសពាក់ព័ន្ធ នៃអគ្គនាយកដ្ឋានប្រព័ន្ធចម្រោះទឹកកខ្វក់ ព្រមទាំងលោកប្រធាន លោកប្រធានស្តីទី អនុប្រធានមន្ទីរ និងមន្ត្រីបច្ចេកទេស នៃមន្ទីរសាធារណការ និងដឹកជញ្ជូនខេត្តកំពង់ឆ្នាំង និងខេត្តពោធិ៍សាត់។ កិច្ចប្រជុំនាពេលនេះមានគោលបំណងសំខាន់ដើម្បីពិនិត្យពិភាក្សាពីកិច្ចដំណើរការនៃប្រតិបត្តិការ និងការថែទាំស្ថានីយប្រព្រឹត្តកម្មទឹកកខ្វក់នៅក្នុងក្រុងកំពង់ឆ្នាំង និងក្រុងពោធិ៍សាត់ និងស្ថានភាពបច្ចុប្បន្ននៃប្រព័ន្ធទឹកកខ្វក់នៅតាមតំបន់នានា ដើម្បីកំណត់វិធានការសមរម្យណាមួយ សម្រាប់ការគ្រប់គ្រង និងអភិវឌ្ឍន៍ប្រព័ន្ធទឹកកខ្វក់ឱ្យមានប្រសិទ្ធភាព និងចីរភាពកាន់តែប្រសើរ។ ឯកឧត្តមប្រធានអង្គប្រជុំ ក៏បានផ្តល់អនុសាសន៍ណែនាំដល់ មន្ទីរសាធារណការ និងដឹកជញ្ជូនខេត្តកំពង់ឆ្នាំង និងខេត្តពោធិ៍សាត់ ត្រូវបង្កើតក្រុមការងារថែទាំស្ថានីយប្រព័ន្ធទឹកកខ្វក់ ចាំបាច់ត្រូវមានអ្នកបច្ចេកទេសពាក់ព័ន្ធនឹងគ្រឿងអេឡិចត្រូនិច-អគ្គិសនីប្រព័ន្ធសូឡា ជាដើម ដោយត្រូវច្នៃប្រើប្រាស់ធនធានមន្ត្រីដែលខ្លួនមានស្រាប់។ ឯកឧត្តមបានបន្ថែមថា មន្ទីរសាធារណការ និងដឹកជញ្ជូនខេត្តកំពង់ឆ្នាំង ខេត្តពោធិ៍សាត់ ត្រូវគិតគូរពិចារណាបង្កើតក្រុមការងារសន្តិសុខប្រព័ន្ធទឹកក្វក់ ដោយមានការចូលរួមពីអាជ្ញាធរមូលដ្ឋានពាក់ព័ន្ធ នៅតាមទីប្រជុំជន ផ្សារ សាលារៀន សហគ្រាសសាធារណៈ តំបន់សេដ្ឋកិច្ចពិសេស ក្រុង ស្រុក តាមប្រព័ន្ធតេឡេក្រាមរួមគ្នាតែមួយ ដើម្បីងាយស្រួលនៅពេលមានបញ្ហាប្រឈមណាមួយពាក់ព័ន្ធនឹងទឹកកខ្វក់ ដូចជា ពេលភ្លៀងធ្លាក់ខ្លាំងបណ្តាលឱ្យមានការកកស្ទះប្រព័ន្ធលូសាធារណៈជាដើម គឺអាចទាក់ទងគ្នាបានឆាប់រហ័ស និងងាយស្រួលក្នុងការស្វែងរកដំណោះស្រាយបានភ្លាមៗផងដែរ ព្រមទាំងស្នើឱ្យ លោកប្រធានមន្ទីរ លោកប្រធានមន្ទីរស្តីទី និងមន្ត្រីក្រោមឱវាទទាំងអស់ ត្រូវចាត់ទុកថាខ្លួនជា គ្រូពេទ្យសាធារណៈ ដើម្បីត្រៀមខ្លួនក្នុងការងារថែទាំ ជួសជុល ស្តារឡើងវិញនូវប្រព័ន្ធទឹកកខ្វក់ឱ្យបានល្អប្រសើរ៕