ការពង្រឹងការងារផ្តល់សេវាសាធារណៈលើវិស័យដឹកជញ្ជូនផ្លូវគោក នៅមន្ទីសាធារណការ និងដឹកជញ្ជូនខេត្តស្វាយរៀង និងខេត្តព្រៃវែង ផ្ដល់ជូនប្រជាពលរដ្ឋឱ្យកាន់តែមានភាពងាយស្រួល រហ័ស និងមានប្រសិទ្ធភាព ខេត្តស្វាយរៀង និងខេត្តព្រៃវែង ៖ នាថ្ងៃពុធ ទី២២ ខែតុលា ឆ្នាំ២០២៥ ឯកឧត្តម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក តំណាង ឯកឧត្តម ពៅ ម៉ាលី រដ្ឋលេខាធិការក្រសួងសាធារណការ និងដឹកជញ្ជូន អញ្ជើញចុះជួបសំណេះសំណាល ក្នុងការពង្រឹងការងារផ្តល់សេវាសាធារណៈលើវិស័យដឹកជញ្ជូនផ្លូវគោក នៅមន្ទីរសាធារណការ និងដឹកជញ្ជូនខេត្តស្វាយរៀង និងខេត្តព្រៃវែង ដោយមានការអមដំណើរដោយ លោកអគ្គនាយករង លោកប្រធាន និងអនុប្រធាននាយកដ្ឋានពាក់ព័ន្ធ នៃអគ្គនាយកដ្ឋានដឹកជញ្ជូនផ្លូវគោក។ ជាកិច្ចចាប់ផ្ដើម លោកប្រធានមន្ទីរសាធារណការ និងដឹកជញ្ជូនខេត្តទាំងពីរ បានធ្វើរបាយការណ៍សង្ខេបជូន ឯកឧត្តមអគ្គនាយកអំពីវឌ្ឍនភាពការងារផ្តល់សេវាសាធារណៈលើវិស័យដឹកជញ្ជូនផ្លូវគោក បញ្ហាប្រឈម សំណូមពរ និងបានលើកឡើងនូវសំណួរក៏ដូចជាចម្ងល់ផ្សេងៗ ពាក់ព័ន្ធនឹងការត្រួតពិនិត្យលក្ខណៈបច្ចេកទេសយានជំនិះ ការចុះបញ្ជីយានជំនិះ អាជីវកម្មដឹកជញ្ជូនផ្លូវគោក ការប្រឡងឬប្តូរបណ្ណបើកបរយានយន្ត ការងារយានដ្ឋានជួសជុល កែច្នៃ តម្លើងយានជំនិះ ជាដើម -ល-។ បន្ថែមពីនោះ ឯកឧត្តមអគ្គនាយក បានណែនាំដល់ថ្នាក់ដឹកនាំ និងមន្ត្រីជំនាញពាក់ព័ន្ធ នៃមន្ទីរសាធារណការ និងដឹកជញ្ជូនខេត្តទាំងពីរ ឱ្យបន្តខិតខំពង្រឹងការងារផ្តល់សេវាសាធារណៈលើវិស័យដឹកជញ្ជូនផ្លូវគោក ជូនប្រជាពលរដ្ឋឱ្យកាន់តែល្អ និងមានប្រសិទ្ធភាព ៕