ការពិនិត្យ និងពិភាក្សាលើការងារកែសម្រួលប្រកាសអន្តរក្រសួង លើការប្រមូលចំណូលមិនមែនសារពើពន្ធពីសេវាសាធារណៈ និងការពិន័យ ទីស្តីការក្រសួង៖ នាព្រឹកថ្ងៃទី ១៦ ខែតុលា ឆ្នាំ ២០២៥ ឯកឧត្តម សុខ សុខកេង អនុរដ្ឋលេខាធិការ និងជាអនុប្រធានទី២ នៃក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈរបស់ក្រសួងសាធារណការ និងដឹកញ្ជូន បានអញ្ជើញដឹកនាំ កិច្ចប្រជុំស្តីពី ការពិនិត្យ និងពិភាក្សាលើការងារកែសម្រួលប្រកាសអន្តរក្រសួង លើការប្រមូលចំណូលមិនមែនសារពើពន្ធពីសេវាសាធារណៈ និងការពិន័យ របស់ក្រសួងសាធារណការ និងដឹកជញ្ជូន និងដោយមានការអញ្ជើញចូលរួមពីថ្នាក់ដឹកនាំ និងមន្ត្រីបច្ចេកទេសពីអគ្គនាយកដ្ឋានពាក់ព័ន្ធជាច្រើនរូប។ កិច្ចប្រជុំនេះ មានគោលបំណងដើម្បីរៀបចំ និងចងក្រងសេវាសាធារណៈ និងការផាកពិន័យរបស់ក្រសួងឱ្យមានភាពសមស្របទៅតាមប្រកាសលេខ ១៤៥ សហវ.ប្រក.អគហ របស់ក្រសួងសេដ្ឋកិច្ច និងហិរញ្ញវត្ថុ និងជាពិសេសដើម្បីញែកឱ្យបានច្បាស់រវាងមុខងារប្រមូលចំណូលពីសេវាសាធារណៈ និងការពិន័យដែលស្ថិតក្នុងដែនសមត្ថកិច្ចផ្ទាល់របស់ក្រសួង មុខងារដែរលបានប្រគល់និងមុខងារដែលបានប្រតិភូកម្មជូនរដ្ឋបាលថ្នាក់ក្រោមជាតិ។ ឯកឧត្តមប្រធានអង្គប្រជុំ បានណែនាំឱ្យក្រុមការងារទាំងអស់ បន្តសហការគ្នាយ៉ាងជិតស្និទ្ធិបន្ថែមទៀត ដើម្បីធ្វើយ៉ាងណាបញ្ចប់ការងាររៀបចំកែសម្រួលប្រកាសអន្តរក្រសួង ដែលពាក់ព័ន្ធនឹងការប្រមូលចំណូលមិនមែនសារពើពន្ធពីសេវាសាធារណៈ និងការពិន័យនេះឱ្យបានឆាប់រហ័ស៕