កិច្ចប្រជុំត្រួតពិនិត្យ និងវាយតម្លៃលើវឌ្ឍនភាពការងាររបស់ក្រុមប្រតិបត្តិការងារធ្វើឱ្យប្រសើរឡើងនូវការគ្រប់គ្រងការដឹកជញ្ជូនតាមផ្លូវគោក និងផ្លូវដែក (WG2) ក្នុងក្របខណ្ឌនៃគម្រោងស្ដីពីការពង្រឹងសមត្ថភាពក្នុងការសម្របសម្រួលការធ្វើឱ្យប្រសើរឡើងនូវប្រព័ន្ធភស្ដុភារកម្មកម្ពុជា (SF-CLIP) ទីស្ដីការក្រសួង៖ នាព្រឹកថ្ងៃចន្ទ ទី១៣ ខែតុលា ឆ្នាំ២០២៥ ឯកឧត្តម សុន សុខកេង អនុរដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុម WG2 បានដឹកនាំកិច្ចប្រជុំតាមដានវឌ្ឍនភាពការងាររបស់ក្រុមការងារ WG2 ដោយមានការចូលរួមពីសមាជិក សមាជិកានៃក្រុមការងារWG2 តំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA) អ្នកជំនាញប្រឹក្សាយោបល់អន្តរជាតិ និងមន្រ្តីពាក់ព័ន្ធជាច្រើនរូបទៀត។ អង្គប្រជុំបានពិនិត្យ និងពិភាក្សាទៅលើវឌ្ឍនភាពការងារដែលក្រុមការងារបានខិតខំបំពេញកន្លងមក ពិសេសលើវឌ្ឍនភាពនៃការរៀបចំសេចក្តីព្រាងប្រកាសស្តីពីការដឹកជញ្ជូនទំនិញគ្រោះថ្នាក់ លទ្ធផលនៃសិក្ខាសាលាបណ្តុះបណ្តាលអំពីការដឹកជញ្ជូនទំនិញគ្រោះថ្នាក់ និងគោលគំនិតនៃការបើកបរដោយសន្សំសំចៃ ហើយព្រមទាំងវាយតម្លៃខ្ពស់លើបទបង្ហាញអំពីប្រព័ន្ធគ្រប់គ្រងប្រតិបត្តិការដឹកជញ្ជូនតាមផ្លូវដែក។ ឯកឧត្តមអនុរដ្ឋលេខាធិការ បានណែនាំឱ្យក្រុមការងារទាំងអស់ បន្តសហការគ្នាយ៉ាងជិតស្និទ្ធិបន្ថែមទៀត ដើម្បីធានាថាត្រូវសម្រេចតាមផែនការដែលបានគ្រោងទុក និងទទួលបានលទ្ធផលផ្លែផ្កា ដើម្បីជាមុខមាត់ក្រសួង ក៏ដូចជាប្រទេសជាតិទាំងមូល៕