ក្រសួងសាធារណការ និងដឹកជញ្ជូន បន្តវគ្គបណ្ដុះបណ្ដាលអនុវត្តជាក់ស្ដែង ស្ដីពីការពិសោធដីសម្រាប់តួផ្លូវ ទីស្ដីការក្រសួង៖ នាថ្ងៃសុក្រ ទី១០ ខែតុលា ឆ្នាំ២០២៥ ក្រសួងសាធារណការ និងដឹកជញ្ជូន បានបន្តវគ្គបណ្ដុះបណ្ដាលអនុវត្តជាក់ស្ដែង ស្ដីពី “ការពិសោធដីសម្រាប់តួផ្លូវ” សម្រាប់មន្ត្រីបច្ចេកទេសមកពីនាយកដ្ឋានត្រួតពិនិត្យបច្ចេកទេសគម្រោង ក្រោមឱវាទអគ្គនាយកដ្ឋានបច្ចេកទេស នៅមន្ទីរពិសោធតេជោសែន សាធារណការ កម្ពុជា-កូរ៉េ នៃវិទ្យាស្ថានតេជោសែនសាធារណការ និងដឹកជញ្ជូន ក្រោមការដឹកនាំដោយ ឯកឧត្តម ហ៊ាង វុត្ថា អគ្គនាយកនៃអគ្គនាយកដ្ឋានបច្ចេកទេស និងសម្របសម្រួលដោយគ្រូបង្គោលដែលជាទីប្រឹក្សាក្រសួង អគ្គនាយករងបច្ចេកទេស និងក្រុមគ្រូបង្គោលនៃអគ្គនាយកដ្ឋានបច្ចេកទេស។ វគ្គបណ្តុះបណ្តាលផ្នែកអនុវត្ត រៀបចំឡើងក្នុងគោលបំណងផ្លាស់ប្តូរពីចំណេះដឹងផ្នែកទ្រឹស្ដី ទៅជាការអនុវត្តជាក់ស្ដែង ដើម្បីអភិវឌ្ឍសមត្ថភាព និងជំនាញអនុវត្តរបស់សិក្ខាកាមលើដំណើរការជ្រើសរើសម្ភារៈ ដំណើរការពិសោធ ការគណនា និងវាយតម្លៃគុណភាពដីយ៉ាងម៉ត់ចត់ ដែលជាជំហានដ៏សំខាន់មួយមុននឹងយកមកប្រើប្រាស់ ដើម្បីធានាឱ្យសំណង់ហេដ្ឋារចនាសម្ព័ន្ធផ្លូវថ្នល់មានគុណភាព ប្រើប្រាស់បានយូរអង្វែង និងធន់នឹងការប្រែប្រួលអាកាសធាតុ។ ក្នុងថ្ងៃនេះ សិក្ខាកាមបានអនុវត្តជាក់ស្តែងលើការជ្រើសរើសសំណាកដី ការវាស់វែងបរិមាណសំណើមដី ការពិសោធរបាយទំហំគ្រាប់ និងលក្ខណៈផ្ទៃក្នុងរបស់ដី រួមទាំងការធ្វើពិសោធលីមីតភាពរាវ ភាពស្អិត សន្ទស្សន៍ភាពស្អិត និងការបង្ហាប់ដី ព្រមទាំងការធ្វើពិសោធ CBR សម្រាប់វាស់សមត្ថភាពទ្រទ្រង់ដីបង្ហាប់ ក្នុងសភាពមិនត្រាំទឹក និងសភាពត្រាំទឹក។ សូមជម្រាបផងដែរ វគ្គបណ្តុះបណ្តាលបច្ចេកទេសស្ដីពី “ការពិសោធដីសម្រាប់តួផ្លូវ” ដែលរៀបចំដោយអគ្គនាយកដ្ឋានបច្ចេកទេស នឹងត្រូវរៀបចំក្នុងរយៈពេល ៣ថ្ងៃ ដែលបានចាប់ផ្ដើមវគ្គទ្រឹស្ដីកាលពីថ្ងៃទី៩ ខែតុលា ឆ្នាំ២០២៥ ម្សិលមិញ។ ចំពោះ ផ្នែកអនុវត្តជាក់ស្ដែងនឹងរៀបចំសរុបចំនួន ៤លើក ចាប់ពីថ្ងៃទី១០ ខែតុលា ឆ្នាំ២០២៥ ដល់ ថ្ងៃទី១៤ ខែវិច្ឆិកា ឆ្នាំ២០២៥ ដោយរៀបចំនៅទីស្តីការក្រសួងសាធារណការ និងដឹកជញ្ជូន ចំនួន ២លើក សម្រាប់មន្ត្រីបច្ចេកទេសថ្នាក់កណ្ដាលក្រសួង អង្គភាពវិស្វកម្ម និងក្រុមហ៊ុនឯកជន និងចំនួន ២លើក រៀបចំនៅមន្ទីរសាធារណការ និងដឹកជញ្ជូន ខេត្តតាកែវ និងខេត្តក្រចេះ សម្រាប់មន្ទីរសាធារណការ និងដឹកជញ្ជូន ទាំង២៥ រាជធានី-ខេត្ត៕