ពិធីចុះហត្ថលេខាលើកិច្ចសន្យា រវាងអង្គភាពគ្រប់គ្រងគម្រោងជំរុញការតភ្ជាប់ហេដ្ឋារចនាសម្ព័ន្ធច្រកទ្វារព្រំដែននៅព្រះរាជាណាចក្រកម្ពុជា(PMU-3CEP) ជាមួយនឹងក្រុមហ៊ុនទីប្រឹក្សាបច្ចេកទេសសម្រាប់គម្រោង 3CEP ទីស្ដីការក្រសួង៖ នាព្រឹកថ្ងៃចន្ទ ទី៦ ខែតុលា ឆ្នាំ២០២៥ លោកជំទាវ ឥម នីថារ៉ា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងជំរុញការតភ្ជាប់ហេដ្ឋារចនាសម្ព័ន្ធច្រកទ្វារព្រំដែន(3CEP) បានចុះហត្ថលេខាលើកិច្ចសន្យាជាមួយ លោក Kim Il Hwan តំណាងសម្ព័ន្ធក្រុមហ៊ុនទីប្រឹក្សាបច្ចេកទេស KCIeng Co., Ltd. (Lead Firm of Joint Venture) Joint Venture with BOTEK Bosphorus Technical Consulting Corporation (Member of Joint Venture) ហៅកាត់ថា KCI-BOTEK JV សម្រាប់ចូលរួមលើការសិក្សាសមិទ្ធិលទ្ធភាព(FS) និងរៀបចំគំនូសប្លង់វិស្វកម្មលម្អិត(Detailed Engineering Designs–DEDs) របស់គម្រោង (3CEP) ដែលគ្រោងចំណាយរយៈពេល ១៨ខែ ដោយមានការអញ្ជើញចូលរួមពី ឯកឧត្តម លោកជំទាវ លោក-លោកស្រី ដែលជាសមាជិក-សមាជិកា នៃអង្គភាពគ្រប់គ្រងគម្រោង (3CEP)តំណាងមន្ទីរសាធារណការ និងដឹកជញ្ជូន ទាំង៤ខេត្ត(រួមមាន៖ ខេត្តតាកែវ ត្បូងឃ្មុំ ក្រចេះ និងរតនគិរី) និងមន្ត្រីជំនាញពាក់ព័ន្ធ។ ឆ្លៀតក្នុងឱកាសនោះ លោកជំទាវរដ្ឋលេខាធិការ ក៏បានបន្តដឹកនាំកិច្ចប្រជុំពិភាក្សាលើទិសដៅការងារបន្តរបស់គម្រោង 3CEP ដើម្បីសហការក្នុងលក្ខខណបុរេសកម្ម សំដៅជំរុញ និងពន្លឿនការងារសិក្សា FS និងគំនូសប្លង់ DEDs ឱ្យស្របតាមផែនការដែលបានគ្រោងទុក បន្ទាប់ពីជ្រើសរើសបានជាផ្លូវការនូវក្រុមហ៊ុនទីប្រឹក្សាបច្ចេកទេស។ បន្ថែមពីនេះ លោកជំទាវនាយកគម្រោងបានវាយតម្លៃខ្ពស់លើកិច្ចខិតខំប្រឹងប្រែងរបស់ក្រុមការងារនៃអង្គភាព PMU-3CEP តំណាងក្រសួងសេដ្ឋកិច្ច និងហិរញ្ញវត្ថុ និងអាជ្ញាធរពាក់ព័ន្ធនៃខេត្តទាំង៤ ដែលបានសហការធ្វើការងារជាមួយគ្នាកន្លងមក រហូតទទួលបានជាលទ្ធផលផ្លែផ្កា ព្រមទាំងបានផ្ដាំផ្ញើដល់អាជ្ញាធរពាក់ព័ន្ធនៃខេត្តទាំង៤ បន្តចូលរួមផ្ដល់កិច្ចសហការយ៉ាងជិតស្និទ្ធដល់សម្ព័ន្ធក្រុមហ៊ុនទីប្រឹក្សាបច្ចេកទេស KCI-BOTEK JV ក្នុងកំឡុងពេល ១៨ខែ នៃការចុះសិក្សា FS និងគូសគំនូសប្លង់ DEDs នេះ។ សូមបញ្ជាក់ជូនបន្ថែមថា៖ គម្រោង 3CEP នេះ នឹងប្រើប្រាស់ហិរញ្ញប្បទានសហប្រតិបត្តិការពីធនាគារវិនិយោគហេដ្ឋារចនាសម្ព័ន្ធអាស៊ី(AIIB) ដែលត្រូវបានរំពឹងទុកថា សមិទ្ធផលនៃគម្រោងនេះ នឹងជួយគាំទ្រដល់វិស័យដឹកជញ្ជូនក្នុងការពង្រឹងការតភ្ជាប់ និងជំរុញកំណើននៃរំហូរប្រតិបត្តិការដឹកញ្ជូនក្នុងតំបន់ភូមិភាគឦសាន និងឆ្លងកាត់ព្រំដែន ប្រកបដោយប្រសិទ្ធភាពនិងប្រសិទ្ធផល។ ជាពិសេស គម្រោងនេះក៏នឹងជំរុញការតភ្ជាប់ និងធ្វើឱ្យប្រសើរឡើងស្ថានីយ និងហេដ្ឋារចនាសម្ព័ន្ធច្រកទ្វារព្រំដែនអន្តរជាតិ(CBF) សម្រួលការដឹកជញ្ជូន ពាណិជ្ជកម្ម ទេសចរណ៍ឆ្លងកាត់ព្រំដែនអន្តរជាតិ និងការតភ្ជាប់សេដ្ឋកិច្ចក្នុងក្របខ័ណ្ឌ រួមមាន៖ ១)កិច្ចសហប្រតិបត្តិការក្នុងមហាអនុតំបន់មេគង្គ(GMS) ២)កិច្ចសហប្រតិបត្តិការទ្វេភាគីកម្ពុជា-វៀតណាម ៣)ចូលរួមចំណែកអនុវត្តផែនការមេអភិវឌ្ឍន៍តំបន់ភូមិភាគឦសាន (ប៉ូលសេដ្ឋកិច្ចទី៥) និង ៤)អនុវត្តយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលកកម្ពុជា ផងដែរ៕