យុទ្ធនាការអប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោក នៅមុនឱកាសពិធីបុណ្យភ្ជុំបិណ្ឌ រាជធានីភ្នំពេញ៖ នាថ្ងៃ ទី១៧ ខែកញ្ញា ឆ្នាំ២០២៥ នាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន បានសហការជាមួយអគ្គលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក សហភាពសហព័ន្ធយុវជនកម្ពុជាវិស័យសាធារណការ និងដឹកជញ្ជូន មន្ទីរសាធារណការ និងដឹកជញ្ជូនរាជធានីភ្នំពេញ អង្គការមូលនិធិបង្ការរបួសអាស៊ី ក្រុមហ៊ុនហុងដា និងមានចូលរួមពីកងកម្លាំងនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ និងកងរាជអាវុធហត្ថរាជធានីភ្នំពេញ បានចុះធ្វើយុទ្ធនាការអប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោក ដើម្បីពញ្ញាក់ស្មារតីដល់អ្នកប្រើប្រាស់ផ្លូវឱ្យមានការប្រុងប្រយ័ត្ននៅមុនឱកាសពិធីបុណ្យភ្ជុំបិណ្ឌ។ យុទ្ធនាការអប់រំផ្សព្វផ្សាយនេះបានប្រារព្ធធ្វើឡើងនៅមុខវត្តនិរោធិ៍ តាមបណ្តោយផ្លូវជាតិលេខ១ ក្រោមអធិបតីភាព លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គ.ស.ច.គ។ ក្នុងយុទ្ធនាការនេះ មានការអប់រំផ្សព្វផ្សាយ រួមទាំងធ្វើការណែនាំដល់អ្នកប្រើប្រាស់យានយន្ត ជាពិសេសអ្នកបើកបរទោចក្រយានយន្តឱ្យយល់ដឹងអំពីច្បាប់ចរាចរណ៍ផ្លូវគោក និងបានចែកជូននូវឯកសារពាក់ព័ន្ធនឹងច្បាប់ស្តីពីសុវត្ថិភាពចរាចរណ៍ផ្លូវគោក តាមរយៈការសួរនិងឆ្លើយសំណួរដើម្បីទទួលបានមួកសុវត្ថិភាពជារង្វាន់។ ជាលទ្ធផលនៅក្នុងយុទ្ធនាការនេះ អគ្គលេខាធិការដ្ឋាន គ.ស.ច.គ បានចែកជូននូវសម្ភារៈមួយចំនួនដូចជា៖ ១). មួកសុវត្ថិភាពចំនួន ៧៥មួក ២).សៀវភៅច្បាប់ស្តីពីចរាចរណ៍ផ្លូវគោក ២០០ក្បាល ៣). ស្ទីកឃ័រចំណាំងផ្លាត ១០០០សន្លឹក ៤). សៀវភៅអ្វីដែលអ្នកបើកបរម៉ូតូត្រូវយល់ដឹង ១៥០០ក្បាល ៥). ខិតបណ្ណជំនួយស្មារតីស្តីពីសុវត្ថិភាពចរាចរណ៍ផ្លូវគោក ១៥០០ ច្បាប់ ៦). ខិតបណ្ណអនុក្រឹត្យផាកពិន័យ ១៥០០សន្លឹក ៧). ខិតបណ្ណ ស.ស.យ.ក ៥០០សន្លឹក ៨). ស្ទីកឃ័រសីលធម៌១០ចំណុច ១០០០សន្លឹក និង ៩). ដបទឹក ១០ដប៕