វគ្គបណ្តុះបណ្តាលស្តីពី “មូលដ្ឋានគ្រឹះ នៃការរៀបចំប្រព័ន្ធដឹកជញ្ជូនសាធារណៈ” ទីស្ដីការក្រសួង៖ នាថ្ងៃចន្ទ ទី១៥ ខែកញ្ញា ឆ្នាំ២០២៥ ឯកឧត្តម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក បានអញ្ជើញជាអធិបតីក្នុងកម្មវិធីបើកវគ្គបណ្តុះបណ្តាលស្តីពី “មូលដ្ឋានគ្រឹះ នៃការរៀបចំប្រព័ន្ធដឹកជញ្ជូនសាធារណៈ” ដោយមានសមាសភាពចូលរួមពី លោកអគ្គនាយករង លោកប្រធាននាយកដ្ឋាន លោក លោកស្រីអនុប្រធាននាយកដ្ឋាន លោក លោកស្រីប្រធានការិយាល័យ និងមន្ត្រីជំនាញ នៃអគ្គនាយកដ្ឋានដឹកជញ្ជូនផ្លូវគោក តំណាងនាយកដ្ឋានផ្លូវដែក តំណាងមន្ទីរសាធារណការ និងដឹកជញ្ជូនរាជធានីភ្នំពេញ ខេត្តកណ្តាល សៀមរាប ព្រះសីហនុ កំពត បាត់ដំបង និងខេត្តកំពង់ចាម តំណាងរដ្ឋាករស្វយ័តដឹកជញ្ជូនសាធារណៈរថយន្តក្រុងរាជធានីភ្នំពេញ និងតំណាងប្រតិបត្តិករដឹកជញ្ជូនអ្នកដំណើរ និងទំនិញ។ វគ្គបណ្ដុះបណ្ដាលនេះ ត្រូវបានរៀបចំឡើងក្នុងគោលបំណងពង្រឹងសមត្ថភាព និងការយល់ដឹង (Sharing Knowledge) ដល់មន្ត្រីរាជការ និងភាគីពាក់ព័ន្ធ អំពីមូលដ្ឋានគ្រឹះ និងការរៀបចំផែនការដឹកជញ្ជូនទាំងក្នុងទីក្រុង និងទូទាំងប្រទេស។ ការបង្កើនសមត្ថភាពមន្ត្រី និងភាគីពាក់ព័ន្ធលើវិស័យនេះ ពិតជាមានសារសំខាន់ណាស់ ដោយហេតុថាតម្រូវការនៃការដឹកជញ្ជូន បាននិងកំពុងរីកចម្រើនឥតឈប់ឈរ និងបង្កឱ្យមានបញ្ហាចោទផ្សេងៗ ដែលទាមទារឱ្យមានការរៀបចំ និងដោះស្រាយបានត្រឹមត្រូវ និងទាន់ពេលវេលា។ ឆ្លៀតក្នុងឱកាសនេះផងដែរ ឯកឧត្តមអគ្គនាយក ក៏បានផ្តាំផ្ញើ និងលើកទឹកចិត្តឱ្យសិក្ខាកាមទាំងអស់យកចិត្តទុកដាក់ និងចូលរួមឱ្យបានសកម្មក្នុងការផ្លាស់ប្ដូរយោបល់ និងសួរសំណួរ ក៏ដូចជាយកចំណេះដឹងទៅប្រើប្រាស់ក្នុងការអភិវឌ្ឍវិស័យដឹកជញ្ជូនផ្លូវគោក តាមជំនាញរៀងៗខ្លួន៕