សិក្ខាសាលាស្តីពីការប្រើប្រាស់ឧបករណ៍ដ្រូនភ្ជាប់ជាមួយកម្មវិធី KUMIKI ក្នុងការងារវាស់វែង ទីស្តីការក្រសួង៖ នាថ្ងៃពុធ ទី១០ ខែកញ្ញា ឆ្នាំ២០២៥ អគ្គនាយកដ្ឋានសាធារណការ នៃក្រសួងសាធារណការ និងដឹកជញ្ជូន សហការជាមួយទីភ្នាក់ងារសហប្រតិបត្តិការអន្ដរជាតិជប៉ុន JICA និងក្រុមហ៊ុន SkymatiX របស់ប្រទេសជប៉ុន ក្នុងការរៀបចំសិក្ខាសាលាស្តីពីការប្រើប្រាស់ឧបករណ៍ដ្រូនភ្ជាប់ជាមួយកម្មវិធី KUMIKI ( The Closing Event for Introduction of Japanese DX Infrastructure Measurement Survey and Management with Remote Sensing Technology Using Drones ) ក្រោមអធិបតីភាព ឯកឧត្តម ហេង រត្នពិសិដ្ឋ អគ្គនាយក នៃអគ្គយកដ្ឋានសាធារណការ និងមានការចូលរួមពី លោក ABE Keisuke លេខាទី៣ នៃស្ថានទូតជប៉ុនប្រចាំកម្ពុជា លោកស្រី MIURA Yoshiko តំណាងទីភ្នាក់ងារសហប្រតិបត្តិការអន្តរជាតិជប៉ុន ប្រចាំកម្ពុជា (JICA) និង លោក OGAMA Masaki តំណាងទីស្នាក់ការកណ្ដាល ទីភ្នាក់ងារសហប្រតិបត្តិការអន្ដរជាតិជប៉ុន (JICA Headquater) ព្រមទាំងថ្នាក់ដឹកនាំនិងមន្ត្រីបច្ចេកទេស នៃអគ្គនាយកដ្ឋានពាក់ព័ន្ធ និងមន្ទីរសាធារណការ និងដឹកជញ្ជូនរាជធានី-ខេត្ត។ សិក្ខាសាលានេះ ប្រព្រឹត្តទៅក្នុងគោលបំណងផ្សព្វផ្សាយ ចែករំលែក ចំណេះដឹង និងបទពិសោធន៍អំពីការប្រើប្រាស់ឧបករណ៍ដ្រូនភ្ជាប់ជាមួយនឹងកម្មវិធីបច្ចេកវិទ្យាថ្មីសម្រាប់ការវាស់វែង ដើម្បីលើកកម្ពស់សមត្ថភាពមន្ត្រីជំនាញ និងលើកស្ទួយការអភិវឌ្ឍគុណភាពហេដ្ឋារចនាសម្ព័ន្ធ ផ្លូវថ្នល់នៅកម្ពុជាប្រកបដោយភាពធន់ និងចីរភាព៕