ភ្នំពេញ ៖ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានណែនាំឱ្យមន្ត្រីក្រោមឱវាទបន្តនូវកិច្ចខិតខំប្រឹងប្រែងបន្ថែមទៀត ដើម្បីសម្រេចឱ្យបាននូវចក្ខុវិស័យនិងទិសដៅការងាររបស់ក្រសួងដែលបានដាក់ចេញ។ ក្នុងឱកាសដឹកនាំកិច្ចប្រជុំថ្នាក់ដឹកនាំក្រសួង ដោយមានការចូលរួមពី លោកជំទាវ ឯកឧត្តម ជាថ្នាក់ដឹកនាំក្រសួង ថ្នាក់ដឹកនាំអង្គភាព និងមន្ត្រីជំនាញជាច្រើនរូបទៀត កាលពីថ្ងៃទី៥ ខែសីហា ឆ្នាំ២០២៥ នាទីស្តីការក្រសួង ឯកឧត្តម ប៉េង ពោធិ៍នា បានអបអរសាទរដល់មន្ត្រី ដែលទទួលបានការតែងតាំងថ្មី និងបានណែនាំឱ្យបន្តនូវកិច្ចខិតខំប្រឹងប្រែងបន្ថែមទៀត ដើម្បីសម្រេចឱ្យបាននូវចក្ខុវិស័យ និងទិសដៅការងាររបស់ក្រសួងដែលបានដាក់ចេញ។ ឯកឧត្តមរដ្ឋមន្រ្តី ក៏បានលើកឡើងសមិទ្ធផលការងារថ្មីៗដែលក្រសួងសម្រេចបាននាពេលថ្មីៗនេះ រួមមាន ១.បានចុះសួរសុខទុក្ខ និងនាំយកអំណោយជូនដល់កងការពារព្រំដែនគោកលេខ ៤០២ និង៤០៣ និងពលទាហាននៃបញ្ជាការដ្ឋានកាំភ្លើងធំ និងបានបង្កើតមូលនិធិចូលរួមឧបត្តម្ភ ដល់ជនភៀសសឹកនៅខេត្តព្រះវិហារ រួមាន សម្ភារប្រើប្រាស់ ចំណីអាហារ និងបង្គន់អនាម័យចំនួន ៧០ នៅទីតាំង ២. បានដាក់ដំណើរការផ្លូវការប្រព័ន្ធលក់លេខពិសេសសម្រាប់ត្រីចក្រយានយន្ត ទោចក្រយានយន្ត និងម៉ូតូកង់បួន និងមណ្ឌលផ្តល់សេវាសាធារណៈ ផ្សារទំនើបអូឡាំព្យា ៣. បានចុះ MoU ថែទាំបណ្តោះអាសន្នផ្លូវដែកជាមួយក្រុមហ៊ុន Royal Railway ៤.បានចុះ MoU លើកំណត់ត្រានៃកិច្ចពិភាក្សា ស្ដីពីគម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុទៅជាកំពង់ផែ និងមជ្ឈមណ្ឌលឡូជីស្ទីកថ្នាក់តំបន់ ៥. បានបញ្ចប់ការងារនិយាមការ និងបោះបង្គោលព្រំដីជានិមិត្តរូបនៃគម្រោងព្រែកជីកហ្វូណនតេជោ និង ៦. ការងារសាធារណការដូចជា ចាក់បេតុងតភ្ជាប់ស្ពានមិត្តភាពកម្ពុជា-ចិន មេគង្គក្រចេះ បញ្ចប់ការកែសម្រួលកំណាត់ផ្លូវរថភ្លើងមេ តភ្ជាប់ចូលអាកាសយានដ្ឋានអន្តរជាតិភ្នំពេញ ដោយកាយយកដែកចេញ និងចាក់បេតុង ដាក់ដំណើរការបណ្តោះអាសន្នផ្លូវលេខ ១០ និងប្រគល់ទទួលរួចរាល់ផ្លូវជាតិលេខ ៤៨។ ឯកឧត្តមរដ្ឋមន្រ្តី បានវាយតម្លៃខ្ពស់ និងកោតសរសើរដល់ ឯកឧត្តម លោកជំទាវជាថ្នាក់ដឹកនាំក្រសួង ថ្នាក់ដឹកនាំអគ្គនាយកដ្ឋាន នាយកដ្ឋាន និងអង្គភាពទាំងអស់ ព្រមទាំងមន្ទីរសាធារណការ និងដឹកជញ្ជូនរាជធានី-ខេត្ត ដែលបានខិតខំអនុវត្តការងារប្រកប ដោយស្មារតីបុរេសកម្ម និងសម្រេចបានវឌ្ឍនភាពថ្មីៗជូនក្រសួង និងសង្គមជាតិ៕