កិច្ចប្រជុំពិនិត្យវឌ្ឍនភាពការងារស្ដីពីការរៀបចំផែនការយុទ្ធសាស្ត្របញ្ជ្រាបសមភាពយេនឌ័រ ក្នុងវិស័យសាធារណការ និងដឹកជញ្ជូន ឆ្នាំ២០២៥-២០២៨ ទីស្ដីការក្រសួង៖ នាថ្ងៃពុធ ទី៦ ខែសីហា ឆ្នាំ២០២៥ លោកជំទាវ សន សុភាវត្តី អគ្គនាយក នៃអគ្គនាយកដ្ឋានភស្តុភារកម្ម និងជាប្រធានក្រុមការងារចំពោះកិច្ច បានអញ្ជើញដឹកនាំកិច្ចប្រជុំពិភាក្សាអំពីការរៀបចំផែនការយុទ្ធសាស្ត្របញ្ជ្រាបសមភាពយេនឌ័រក្នុងវិស័យសាធារណការ និងដឹកជញ្ជូន ឆ្នាំ២០២៥-២០២៨ ដោយមានការអញ្ជើញចូលរួមពីថ្នាក់ដឹកនាំក្រសួង ក្រុមការងារចំពោះកិច្ចធ្វើបច្ចុប្បន្នភាពផែនការយុទ្ធសាស្ត្របញ្ជ្រាបសមភាពយេនឌ័រក្រសួងសាធារណការ និងដឹកជញ្ជូន តំណាងមូលនិធិអាស៊ី និងតំណាងមកពី P4I នៃប្រទេសអូស្រ្ដាលីផងដែរ។ កិច្ចប្រជុំនេះ រៀបចំឡើងក្នុងគោលបំណងបង្ហាញពីសេចក្ដីព្រាងដំបូងនៃរៀបចំផែនការយុទ្ធសាស្ត្រ ស្ដីពីលទ្ធផលសិក្សាបឋមក្នុងការប្រមូលទិន្នន័យពីមន្ត្រីរាជការក្នុងក្រសួង លើមតិយោបល់ និងយល់ឃើញសមភាពយេនឌ័រ និងបរិយាកាសការងារ ដើម្បីកំណត់ជំហានបន្ទាប់សម្រាប់អនុវត្តលើការងារនេះ។ ជាលទ្ធផលនៃកិច្ចប្រជុំនេះ ក្រុមការងារចំពោះកិច្ចបានទទួលបានយោបល់បន្ថែមពីអ្នកប្រឹក្សាអូស្ត្រាលី ក្នុងការកំណត់ការប្រមូលព័ត៌មានបន្ថែម ក្នុងការកំណត់ការចាប់ផ្ដើមវិភាគទិន្នន័យដែលទទួលបាន និងសរសេរសេចក្ដីព្រាងដំបូង នៃសៀវភៅផែនការយុទ្ធសាស្ត្រ ដើម្បីកំណត់សិក្ខាសាលាពិគ្រោះយោបល់ នៅដើមខែកញ្ញាខាងមុខនេះ៕