ក្រសួងសាធារណការនិងដឹកជញ្ជូន បានរំលេចពីសមិទ្ធផលការងារធំៗដែលសម្រេចបានក្នុងរយៈកាលថ្មីៗចុងក្រោយនេះ ដែលបង្ហាញពីការខិតខំប្រឹងប្រែងលើការងារអភិវឌ្ឍន៍វិស័យសាធារណការនិងដឹកជញ្ជូន។ក្នុងឱកាសដឹកនាំកិច្ចប្រជុំ និងប្រកាសតែងតាំងសមាសភាពមន្រ្តីរាជការទើបតែងតាំងថ្មីកាលពីម្សិលមិញនេះ លោក ប៉េង ពោធិ៍នា រដ្ឋមន្រ្តីក្រសួងសាធារណការនិងដឹកជញ្ជូន បានបង្ហាញពីសមិទ្ធផលការងារធំៗដែលក្រសួងសម្រេចបានថ្មីៗពាក់ព័ន្ធវិស័យសាធារណការ និងដឹកជញ្ជូនដែលក្នុងនោះរួមមាន៖១). ការដាក់ឲ្យដំណើរការផ្លូវការប្រព័ន្ធលក់លេខពិសេសសម្រាប់ត្រីចក្រយានយន្ត ទោចក្រយានយន្ត និងម៉ូតូកង់បួន និងមណ្ឌលមណ្ឌលផ្តល់សេវាសាធារណៈផ្សារទំនើបអូឡាំព្យា ២). ការចុះ MoU ថែទាំបណ្តោះអាសន្នផ្លូវដែកជាមួយក្រុមហ៊ុន Royal Railway ៣).ការចុះ MoU លើកំណត់ត្រានៃកិច្ចពិភាក្សាស្ដីពីគម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុទៅជាកំពង់ផែ និងមជ្ឈមណ្ឌលឡូជីស្ទីកថ្នាក់តំបន់ ៤). បានបញ្ចប់ការងារនិយាមការ និងបោះបង្គោលព្រំដីជានិមិត្តរូបនៃគម្រោងព្រែកជីកហ្វូណនតេជោ ៥). ចាក់បេតុងតភ្ជាប់ស្ពានមិត្តភាពកម្ពុជា-ចិន មេគង្គក្រចេះ ៦) បញ្ចប់ការកែសម្រួលកំណាត់ផ្លូវរថភ្លើងមេតភ្ជាប់ចូលអាកាសយានដ្ឋានអន្តរជាតិភ្នំពេញ ដោយកាយយកដែកចេញនិងចាក់បេតុង ៧) ដាក់ឲ្យដំណើរការបណ្តោះអាសន្នផ្លូវជាតិលេខ ១០ និងប្រគល់ទទួលរួចរាល់ផ្លូវជាតិលេខ ៤៨៕