បើតាមការឲ្យដឹងរបស់លោក សូ ប្លាតុង អភិបាលស្រុកប្រាសាទបាគង ខេត្តសៀមរាបបានឲ្យកម្ពុជាថ្មីដឹងថា ផ្លូវទៅកំពង់ភ្លុកជាប់មាត់បឹងទន្លេសាបបានបញ្ចប់ការស្ថាបនា ១០០% និងកំពុងបន្តរៀបចំគំនូសចរាចរណ៍ និងដំឡើងស្លាកសញ្ញាចរាចរណ៍ដែលគ្រោងបញ្ចប់នៅសប្ដាហ៍នេះ។លោក សូរ ប្លាតុង បានបញ្ជាក់ថា ផ្លូវទៅតំបន់ទេសចរណ៍កំពុងភ្លុកបានបញ្ចប់ការស្ថាបនាតាំងពីដើមខែកក្កដា។ ការងារដែលនៅសេសសល់គឺក្រុមបច្ចេកទេសកំពុងរៀបចំគំនូសចរាចរណ៍ និងការតម្លើងស្លាកសញ្ញាចរាចរណ៍ដែលគ្រោងបញ្ចប់នៅសប្ដាហ៍នេះ។លោក សូរ ប្លាតុង បានបញ្ជាក់ថា ផ្លូវទៅតំបន់ទេសចរណ៍កំពុងភ្លុកបានបញ្ចប់ការស្ថាបនាតាំងពីដើមខែកក្កដា។ ការងារដែលនៅសេសសល់គឺក្រុមបច្ចេកទេសកំពុងរៀបចំគំនូសចរាចរណ៍ និងការតម្លើងស្លាកសញ្ញាចរាចរណ៍ដែលគ្រោងបញ្ចប់នៅសប្ដាហ៍នេះ។បើតាមលោក សូរ ប្លាតុង តាមរយៈផ្លូវដែលស្ថាបនានេះនឹងជួយសម្រួលដល់ការធ្វើដំណើររបស់ប្រជាពលរដ្ឋ រួមទាំងជាផ្នែកបម្រើដល់វិស័យទេសចរណ៍ដែលងាយស្រួលមកទស្សនានៅតំបន់កំពង់ភ្លុកជាប់មាត់បឹងទន្លេសាប ដែលជាគោលដៅទេសចរណ៍ដ៏សំខាន់មួយនៅក្នុងខេត្តសៀមរាប។ ផ្លូវទៅកំពង់ភ្លុកដែលបានស្ថាបនាមានប្រវែងសរុបជាង ១៥ គីឡូម៉ែត្រ ចាប់ពីផ្លូវជាតិលេខ ៦ ដោយឆ្លងកាត់ឃុំចំនួន ៣ មានឃុំរលួស ឃុំមានជ័យ រហូតដល់ឃុំកំពង់ភ្លុកជាប់មាត់បឹងទន្លេសាប។ កន្លងទៅផ្លូវនេះមួយកំណាត់ជាផ្លូវបេតុង ដែលសាងសង់រួចបានប្រវែងជាង ២ គីឡូម៉ែត្រ ចេញពីផ្លូវជាតិលេខ ៦ ខណៈកំណាត់ផ្លូវនៅសល់ជាផ្លូវដី ដែលខែប្រាំងហ៊ុយពិបាកធ្វើដំណើរ និងខែវស្សារងការជន់លិចថែមទៀត។ផ្លូវដែលបានសាងសង់ជាផ្លូវពីរប្រភេទ គឺបេតុង និងក្រាលកៅស៊ូ ក្នុងនោះ ផ្លូវបេតុងប្រវែង ៣,២៥ គីឡូម៉ែត្រ សាងសង់ចាប់ពីផ្លូវជាតិលេខ ៦ ដល់ភូមិតាប្រាក់ ឃុំមានជ័យ និងផ្លូវក្រាលកៅស៊ូប្រវែង ៩ គីឡូម៉ែត្រចាប់ពីភូមិតាប្រាក់ ទៅដល់ចំណតទូកឃុំកំពង់ភ្លុក។ ទន្ទឹមនឹងនេះ នៅឆ្នាំក្រោយ បើតាមអាជ្ញាធរក៏មានគម្រោងសាងសង់បន្តពីចំណតទូកឃុំកំពង់ភ្លុកទៅសាលាឃុំកំពង់ភ្លុកផងដែរ។ ក្នុងដំណើរចុះជួបសំណេះសំណាលជាមួយប្រជាពលរដ្ឋនៅសហគមន៍កំពង់ភ្លុក សម្ដេចធិបតី ហ៊ុន ម៉ាណែត បានបញ្ជាឲ្យកងវិស្វកម្មសាងសង់បន្តផ្លូវប្រវែងជាង ៨ គីឡូម៉ែត្រ ដោយពង្រីកទទឹង ៨ ម៉ែត្រ ចាប់ពីឃុំមានជ័យរហូតដល់ឃុំកំពង់ភ្លុកជាប់មាត់បឹងទន្លេសាបជាផ្លូវកៅស៊ូ។ តាមរយៈការស្ថាបនាផ្លូវនេះ នឹងផ្តល់ប្រយោជន៍ជាច្រើនសម្រាប់ពលរដ្ឋក្នុងការធ្វើដំណើរ និងការដឹកជញ្ជូនកសិផលផ្សេងៗ ជាពិសេសក៏សម្រួលដល់ការធ្វើដំណើររបស់ភ្ញៀវទេសចរមកកម្សាន្តនៅសហគមន៍កំពង់ភ្លុក ដែលជាតំបន់គោលដៅទេសចរណ៍ដ៏ល្បីទាក់ទាញមួយនៅខេត្តសៀមរាប ហើយក៏នឹងជួយលើកកម្ពស់ជីវភាពរស់នៅរបស់ពលរដ្ឋក្នុងមូលដ្ឋានឲ្យកាន់តែល្អប្រសើរ ដោយសាររំពឹងថានឹងទទួលភ្ញៀវទេសចរមកកម្សាន្តកាន់តែច្រើន នៅពេលមានផ្លូវល្អស្អាតងាយស្រួលធ្វើដំណើរ៕