ឯកឧត្តម ផែង សុវិជ្ជានោ អនុប្រធានក្រុមការងារគណបក្សចុះមូលដ្ឋានស្រុកកោះធំ អញ្ជើញជាអធិបតីក្នុងពិធីបិទវគ្គសិក្សាបំប៉ន ការងារជំនាញត្រួតពិនិត្យគណបក្ស នៅទីស្នាក់ការគណបក្សប្រជាជនកម្ពុជាស្រុកកោះធំ ខេត្តកណ្តាល ស្រុកកោះធំ ៖ នាថ្ងៃទី ១៩ ខែកក្កដា ឆ្នាំ២០២៥ ឯកឧត្តម ផែង សុវិជ្ជានោ អនុប្រធានក្រុមការងារគណបក្សចុះមូលដ្ឋានស្រុកកោះធំ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា សមាជិកគណៈអចិន្រ្តៃយ៍គណៈកម្មាធិការកណ្តាលគណបក្សប្រជាជនកម្ពុជា ប្រធានគណៈកម្មាធិការគណបក្សក្រសួងសាធារណការ និងដឹកជញ្ជូន និងជាប្រធានក្រុមការងារគណបក្សចុះមូលដ្ឋានស្រុកកោះធំ បានអញ្ជើញជាអធិបតីក្នុងពិធីបិទវគ្គ សិក្សាបំប៉ន ការងារជំនាញត្រួតពិនិត្យគណបក្ស នៅទីស្នាក់ការគណបក្សប្រជាជនកម្ពុជាស្រុកកោះធំ ខេត្តកណ្តាល ដោយមានការចូលរួមពី ឯកឧត្តម ថ្នាក់ដឹកនាំ លោក លោកស្រី មកពីគណៈកម្មាធិការគណបក្សស្រុក ទទួលបន្ទុកការងារត្រួតពិនិត្យគណបក្ស ស្រុកកោះធំ ។ វគ្គសិក្សាមានរយៈពេលពេញមួយថ្ងៃ និងរៀបចំឡើងក្នុងគោលបំណង ពង្រឹងសមត្ថភាព ប្រសិទ្ធភាពការងារត្រួតពិនិត្យគណបក្សឱ្យមានប្រសិទ្ធភាព ក្នុងតួនាទីជាជំនួយការជូនគណៈកម្មាធិការគណបក្សគ្រប់ថ្នាក់ ព្រមទាំងលើកកម្ពស់ការយល់ដឹងអំពីគោលការណ៍គ្រឹះនៃការងារត្រួតពិនិត្យគណបក្ស និងពិភាក្សា ផ្លាស់ប្តូរបទពិសោធន៍ដើម្បីលើកកម្ពស់សមត្ថភាព និងស្មារតីទទួលខុសត្រូវក្នុងការចាត់តាំងអនុវត្តជំនាញត្រួតពិនិត្យគណបក្ស និងបណ្ដុះបណ្តាលមន្ត្រីជំនាន់ក្រោយបន្តវេន។ ឆ្លៀតក្នុងឱកាសនោះ ឯកឧត្តមគណៈធិបតី បានរំលឹកឡើងវិញមតិដឹកនាំដ៏មានតម្លៃថ្លៃថ្លា បំផុតដែល សម្តេចតេជោ ប្រធានគណបក្ស និងថ្នាក់ដឹកនាំគណបក្សតែងតែរំលឹក ដូចជា ៖ មានការដឹកនាំ គឺត្រូវមានការត្រួតពិនិត្យ បន្តជំរុញកែទម្រង់ស៊ីជម្រៅតាមរយៈអភិក្រម៥៖ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ធានាការផ្តល់សេវាសាធារណៈប្រកបដោយតម្លា ភាពគណនេយ្យភាព និងឆាប់រហ័សជូនប្រជាពលរដ្ឋ បង្កើនការអប់រំមន្ត្រីគ្រប់ថ្នាក់ មានអត្តចរិក សីលធម៌ល្អ ឥរិយាបថរស់នៅសមរម្យទទួលបានការស្រលាញ់រាប់អានពីប្រជាជន និងអនុវត្តគោលការណ៍រក្សាចាស់ កសាងថ្មី រួមទាំងពង្រឹងការគ្រប់គ្រងសមាជិកគណបក្សទាំងខាងបរិមាណ និងគុណភាព តាមយុទ្ធសាស្ត្ររបស់គណបក្ស សមាជិកម្នាក់ជាសម្លេងឆ្នោតគាំទ្រគណបក្សមួយសន្លឹក ថែរក្សាសាមគ្គីភាព ឯកភាពផ្ទៃក្នុងរបស់គណបក្សឱ្យកាន់តែរឹងមាំ ដែលទាំងនេះ ចាត់ទុកជាគោលការណ៍ និងជាត្រីវិស័យរបស់គណបក្ស ដែលមន្ត្រីសមាជិកគណបក្សត្រូវតែអនុវត្ត។ ក្នុងឱកាសនោះដែរ ឯកឧត្តមគណៈធិបតី បានពាំនាំនូវការផ្តាំផ្ញើរបស់ថ្នាក់ដឹកនាំជូនដល់សិក្ខាកាមទាំងអស់ ពេលត្រឡប់ទៅវិញត្រូវយកចំណេះដឹង និងបទពិសោធន៍ ដែលទទួលបានពីវគ្គសិក្សានេះទៅអនុវត្តឱ្យបានល្អត្រឹមត្រូវ ក្នុងការបំពេញភារកិច្ចជួយដល់គណៈកម្មាធិការគណបក្សតាមមូលដ្ឋានរបស់ខ្លួន និងត្រូវបន្តខិតខំស្រាវជ្រាវ និងរៀនសូត្រជាប្រចាំនូវលក្ខន្តិកៈ បទបញ្ជាផ្ទៃក្នុងគណបក្ស គោលការណ៍ កម្មវិធីនយោបាយ សេចក្តីសម្រេចនានារបស់គណបក្ស ដើម្បីជាមូលដ្ឋានក្នុងការបំពេញភារកិច្ចឱ្យបានត្រឹមត្រូវ ៕