សិក្ខាសាលាស្តីពី “ការដឹកជញ្ជូនពហុមធ្យោបាយ” រៀបចំដោយវិទ្យាស្ថានតេជោសែន សាធារណការ និងដឹកជញ្ជូន ជូនដល់មន្ត្រីរាជការ ក្រោមឱវាទក្រសួង និងមន្ទីរសាធារណការ និងដឹកជញ្ជូនទាំង២៥រាជធានី-ខេត្ត ទីស្តីការក្រសួង៖ នាថ្ងៃអង្គារ ទី២៤ ខែមិថុនា ឆ្នាំ២០២៥ ឯកឧត្តម ប្រាងហង្ស សេរីរិទ្ធ នាយកវិទ្យាស្ថាន បានអញ្ជើញជាអធិបតី ក្នុងសិក្ខាសាលាសិក្ខាសាលាស្តីពី “ ការដឹកជញ្ជូនពហុមធ្យោបាយ” រៀបចំដោយវិទ្យាស្ថានតេជោសែន សាធារណការ និងដឹកជញ្ជូន ជូនដល់មន្ត្រីរាជការ ក្រោមឱវាទក្រសួងសាធារណការ និងដឹកជញ្ជូន និងរាជធានី-ខេត្ត ដោយមានការចូលរួមៈី ថ្នាក់ដឹកនាំ និងមន្រ្ដីក្រោមឱវាទក្រសួង និងបណ្តាមន្ទីរសាធារណការ និងដឹកជញ្ជូន រាជធានី-ខេត្តសរុបប្រមាណចំនួន ១៥០នាក់។ សិក្ខាសាលានេះត្រូវបានធ្វើឡើងក្នុងគោលបំណង ដើម្បីពង្រឹង និងពង្រីកពុទ្ធិ ស្មារតីជំរុញបន្ថែមទៅលើជំនាញពាក់ព័ន្ធនឹងការដឹកជញ្ជូនពហុមធ្យោបាយ ទាំងតាមផ្លូវគោក ផ្លូវទឹក និងផ្លូវដែក ឱ្យកាន់តែមានគុណភាព និងប្រសិទ្ធភាពខ្ពស់ក្នុងការអនុវត្តការងារប្រចាំថ្ងៃ ក៏ដូចជាចំណេះដឹងបន្ថែមក្នុងការរស់នៅប្រចាំថ្ងៃក្នុងសម័យទំនើបនេះ ពីសំណាក់វាគ្មិនដែលទទួលបានការបណ្តុះបណ្តាល និងទទួលស្គាល់ក្នុងវិស័យភស្តុភារកម្មផងដែរ។ បន្ថែមពីលើនេះទៀត សិក្ខាសាលានេះក៏នឹងមានការរៀបចំជាកម្មវិធីកិច្ចពិភាក្សា (Panel Discussion) លើប្រធានបទសំខាន់ៗដូចជា “ភាពបន្ស៊ីគ្នារវាងមធ្យោបាយដឹកជញ្ជូនពហុមធ្យោបាយ”, “ការលើកកម្ពស់សេវាដឹកជញ្ជូនពហុមធ្យោបាយឱ្យកាន់តែមានគុណភាព ប្រសិទ្ធភាព និងឆាប់រហ័ស” និង “ការធ្វើកិច្ចសហប្រតិបត្តិការ ឬ ការសម្របសម្រួលពាណិជ្ជកម្មពាក់ព័ន្ធនឹងមធ្យោបាយដឹកជញ្ជូនពហុមធ្យោបាយ” ដែលសុទ្ធសឹងតែជាប្រធានបទគួរឱ្យចាប់អារម្មណ៍ និងសិក្សាស្វែងយល់បន្ថែម៕