ជំនួបពិភាក្សាការងាររវាងវិទ្យាស្ថានតេជោសែន សាធារណការ និងដឹកជញ្ជូន និងសហនាយកវិទ្យាស្ថានខុងជឺ នៃរាជបណ្ឌិត្យសភាកម្ពុជា ទីស្តីការក្រសួង៖នាព្រឹកថ្ងៃទី១៦ ខែមិថុនា ឆ្នាំ២០២៥ ឯកឧត្ដម ប្រាងហង្ស សេរីរិទ្ធ នាយកវិទ្យាស្ថាន បានអញ្ជើញដឹកនាំជំនួបពិភាក្សាការងារជាមួយសហនាយកវិទ្យាស្ថាន ខុង ជឺ នៃរាជបណ្ឌិត្យសភាកម្ពុជា ដោយមានការអញ្ជើញចូលរួមពី លោក NIU LI នាយកភាគីចិន និងលោក តាំង ម៉េងឆុង នាយកភាគីកម្ពុជា នៃវិទ្យាស្ថានខុងជឺ នៃរាជបណ្ឌិត្យសភាកម្ពុជា ព្រមទាំងថ្នាក់ដឹកនាំ និងមន្ត្រីទទួលបន្ទុកផ្នែកបណ្តុះបណ្តាល នៃវិទ្យាស្ថានតេជោសែន សាធារណការ និងដឹកជញ្ជូនជាច្រើនរូប។ កិច្ចប្រជុំនេះ រៀបចំឡើងក្នុងគោលបំណងដើម្បីពិនិត្យ និងវាយតម្លៃលើកិច្ចសហប្រតិបត្ដិការនាពេលកន្លងមករវាងវិទ្យាស្ថានទាំងពីរ ព្រមទាំងពិភាក្សាបន្ថែមអំពីកិច្ចសហការគ្នាបន្តទៀតរវាងវិទ្យាស្ថានទាំងពីរនាពេលខាងមុខផងដែរ។ ជាលទ្ធផលកិច្ចប្រជុំនេះ វិទ្យាស្ថានទាំងពីរបានឯកភាពគ្នាលើការធ្វើកិច្ចសហប្រតិបត្តិការក្នុងក្របខណ្ឌអប់រំជាមួយគ្នា ដែលផ្ដោតលើកិច្ចការចំនួន៣ចំណុច រួមមាន៖ ១).បន្ដកិច្ចសហប្រតិបត្ដិការលើការបង្រៀនភាសាចិន ដោយឥតយកថ្លៃនៅវិទ្យាស្ថានតេជោសែន សាធារណការ និងដឹកជញ្ជូន ២).ពិនិត្យលទ្ធភាពបង្កើតថ្នាក់ភាសាចិនជំនាញ ក្នុងវិស័យសាធារណការ និងដឹកជញ្ជូន និង ៣).ពិនិត្យលទ្ធភាពក្នុងការស្វែងរកឱកាសកម្មសិក្សា វគ្គបណ្ដុះបណ្ដាល និងឱកាសការងារ និងការចុះកម្មសិក្សាដល់និស្សិតវិទ្យាស្ថាននៅក្រៅប្រទេស។ សូមបញ្ជាក់ផងដែរថា៖ វិទ្យាស្ថានតេជោសែន សាធារណការ និងដឹកជញ្ជូន និងវិទ្យាស្ថាន ខុង ជឺ នៃរាជបណ្ឌិត្យសភាកម្ពុជា បានចុះអនុស្សរណៈនៃការយោគយល់គ្នា ក្នុងឆ្នាំ២០២៤ និងបានបើកដំណើរការថ្នាក់ភាសាចិនដោយឥតយកថ្លៃ ដល់និស្សិតវិទ្យាស្ថាន ចាប់តាំងពីឆ្នាំ២០២៣ រហូតមកដល់បច្ចុប្បន្ន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube