សិក្ខាសាលាផ្សព្វផ្សាយ ការចាប់ផ្តើមអនុវត្តគម្រោង «ប្រព័ន្ធព័ត៌មានដឹកជញ្ជូន និងភស្តុភារកម្មក្នុងតំបន់មេគង្គ-ឡានឆាង - Transport and Logistics Information System in Lancang-Mekong Region» (TILS) ទីស្តីការក្រសួង៖ នាថ្ងៃព្រហស្បតិ៍ ទី១២ ខែមិថុនា ឆ្នាំ២០២៥ ឯកឧត្តម ឈៀង ពេជ្រ អនុរដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញជាអធិបតីក្នុង សិក្ខាសាលាផ្សព្វផ្សាយ ការចាប់ផ្តើមអនុវត្តគម្រោង «ប្រព័ន្ធព័ត៌មានដឹកជញ្ជូន និងភស្តុភារកម្មក្នុងតំបន់មេគង្គ-ឡានឆាង - Transport and Logistics Information System in Lancang-Mekong Region» ក្រោមក្របខណ្ឌមូលនិធិពិសេសសម្រាប់គម្រោងកិច្ចសហប្រតិបត្តិការមេគង្គឡានឆាង (Lancang-Mekong Cooperation Special Fund) ដោយមានការចូលរួមពីសំណាក់ ក្រសួងការបរទេស និងសហប្រតិបត្តិការអន្តរជាតិ ស្ថានទូតចិនប្រចាំកម្ពុជា វិទ្យាស្ថានមេគង្គ អគ្គនាយកដ្ឋានពាក់ព័ន្ធក្រោមឱវាទក្រសួង ដូចជាក្រសួងស្ថាប័នពាក់ព័ន្ធ និងវិស័យឯកជន។ សិក្ខាសាលាត្រូវបានរៀបចំឡើងក្នុងគោលបំណងផ្សព្វផ្សាយដល់ក្រសួងស្ថាប័នពាក់ព័ន្ធទាំងអស់ ដើម្បីជំរុញនូវប្រសិទ្ធភាពនៃការអនុវត្តគម្រោងឱ្យកាន់តែល្អប្រសើរ និងទាន់ពេលវេលា។ គម្រោង TILS មានកម្មវត្ថុសំខាន់ចំនួន ០៣ គឺ៖ (១). ធ្វើឱ្យប្រសើរឡើងនូវការប្រើប្រាស់ប្រព័ន្ធបច្ចេកវិទ្យា និងប្រព័ន្ធតភ្ជាប់ការដឹកជញ្ជូន និងភស្តុភារកម្ម ក្នុងតំបន់មេគង្គ-ឡានឆាង (២) . អភិវឌ្ឍ និងអនុវត្តការបញ្ចូលគ្នានូវប្រព័ន្ធព័ត៌មានដឹកជញ្ជូន និងភស្តុភារកម្ម ក្នុងតំបនមេគង្គ-ឡានឆាង (៣). ធ្វើឱ្យប្រសើរឡើងនូវកិច្ចសម្រួលពាណិជ្ជកម្ម ការអភិវឌ្ឍ ការវិនិយោគ និងវិស័យទេសចរណ៍ ក្នុងតំបន់មេគង្គ-ឡានឆាង។ ថ្លែងបើកសិក្ខាសាលា ឯកឧត្តម អនុរដ្ឋលេខាធិការ បានសង្កត់ធ្ងន់ថា TILS គឺជាគម្រោងកម្រិតតំបន់ ដែលចាំបាច់មានការចូលរួមពីបណ្តាប្រទេស មេគង្គ-ឡានឆាង (រួមមាន ប្រទេសកម្ពុជា ចិន ឡាវ ភូមា ថៃ និងវៀតណាម) ទាំងអស់ ដូច្នេះការសហការពីសំណាក់ប្រទេស មេគង្គ-ឡានឆាង គឺជាការចាំបាច់ដើម្បីធានាការអនុវត្តគម្រោងឱ្យទទួលបានជោគជ័យ។ ឯកឧត្តម អនុរដ្ឋលេខាធិការ បានស្នើសុំឱ្យបណ្តាប្រទេស មេគង្គ-ឡានឆាង ចូលរួមសហការយ៉ាងជិតស្និទ្ធក្នុងការអនុវត្តគម្រោង ដើម្បីជាប្រយោជន៍ក្នុងអភិវឌ្ឍន៍វិស័យដឹកជញ្ជូន និងឡូជីស្ទីក នៅក្នុងតំបន់ មេគង្គ-ឡានឆាង៕