ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន អញ្ជើញដឹកនាំកិច្ចប្រជុំថ្នាក់ដឹកនាំក្រសួង ទីស្តីការក្រសួង៖ នារសៀលថ្ងៃសុក្រ ទី៦ ខែមិថុនា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំថ្នាក់ដឹកនាំក្រសួង ដោយមានការចូលរួមពី ឯកឧត្តម លោកជំទាវថ្នាក់ដឹកនាំក្រសួង មន្ទីរសាធារណការ និងដឹកជញ្ជូនរាជធានី-ខេត្ត និងមន្ត្រីពាក់ព័ន្ធក្រោមឱវាទក្រសួងជាច្រើនរូប។ កិច្ចប្រជុំនាឱកាសនេះ បានប្រព្រឹត្តទៅដោយរលូនតាមរបៀបវារៈសំខាន់ៗរួមមាន៖ការប្រកាសសមាសភាពថ្នាក់ដឹកនាំក្រសួងទើបតែងតាំងថ្មី បទបង្ហាញស្តីពីសេចក្តីព្រាងផែនការយុទ្ធសាស្រ្តអភិវឌ្ឍន៍វិស័យដឹកជញ្ជូនផ្លូវទឹក និងកំពង់ផែ រយៈពេល ១០ឆ្នាំ (២០២៦-២០៣៥) បទបង្ហាញលើរបាយការណ៍ ស្តីពីការផ្សព្វផ្សាយមេរោគអេដស៍ និងជំងឺអេដស៍ និងផលប៉ះពាល់នៃការប្រើប្រាស់គ្រឿងញៀនក្នុងវិស័យសាធារណការ និងដឹកជញ្ជូន និងបទបង្ហាញស្តីពីការដាក់ឱ្យដំណើរការសាកល្បងប្រព័ន្ធចុះបញ្ជីលេខពិសេសផ្ទាល់ខ្លួនសម្រាប់ទោចក្រយានយន្ត ត្រីចក្រយានយន្ត និងម៉ូតូកង់បួន និងការងារពាក់ព័ន្ធផ្សេងៗមួយចំនួនទៀត។ ថ្លែងក្នុងអង្គពិធី ឯកឧត្តមរដ្ឋមន្រ្តី បានអបអរសាទរដល់ ឯកឧត្តមរដ្ឋលេខាធិការ ដែលទើបទទួលបានការតែងតាំងថ្មី និងជំរុញឱ្យបន្តនូវកិច្ចខិតខំប្រឹងប្រែងបំពេញការងារបន្ថែមទៀត ដើម្បីនាំយកសមិទ្ធផលថ្មីៗជូនក្រសួង និងប្រទេសជាតិយើង ហើយឆ្លៀតក្នុងឱកាសនេះ ឯកឧត្តមរដ្ឋមន្ត្រី ក៏បានកោតសរសើរ និងថ្លែងអំណរគុណដល់ ឯកឧត្តម លោកជំទាវជាថ្នាក់ដឹកនាំក្រសួង ថ្នាក់ដឹកនាំ អគ្គនាយកដ្ឋាន នាយកដ្ឋាន និងអង្គភាពទាំងអស់ ព្រមទាំងមន្ទីរសាធារណការ និងដឹកជញ្ជូន រាជធានី-ខេត្ត ដែលបានបន្តចូលរួមអនុវត្តការងារប្រកបដោយស្មារតីបុរេសកម្ម សំដៅសម្រេចឱ្យបាននូវលទ្ធផលការងារថ្មីៗ សម្រាប់ឆ្នាំ២០២៥ និងជំរុញឱ្យបន្តរួបរួមគ្នាខិតខំប្រឹងប្រែងបំពេញភារកិច្ចឱ្យខ្ជាប់ខ្ជួនបន្ថែមទៀត ដើម្បីសម្រេចទិសដៅការងាររួមរបស់ក្រសួង និងគោលនយោបាយអាទិភាពរបស់រាជរដ្ឋាភិបាល៕