សន្និបាតទឹកឆ្នាំ២០២៥ (Ozwater’25) ក្រោមមូលបទ “ពិនិត្យមើលអតីតកាល បន្តស្ថាបនាបោះជំហានទៅថ្ងៃអនាគត Looking Back, Moving Forward” ទីក្រុង Adelaide ប្រទេសអូស្ត្រាលី៖ នាថ្ងៃអង្គារ-ព្រហស្បតិ៍ ទី២០-២២ ខែឧសភា ឆ្នាំ២០២៥ ឯកឧត្តម ចៅ សុភៈភិបាល អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ តំណាងក្រសួងសាធារណការ និងដឹកជញ្ជូន បានអញ្ជើញចូលរួមកិច្ចប្រជុំអន្តរជាតិ Ozwater’25 ក្រោមមូលបទ “ពិនិត្យមើលអតីតកាល បន្តស្ថាបនាបោះជំហានទៅថ្ងៃអនាគត Looking Back, Moving Forward”។ សន្និបាតនេះមានការរៀបចំជាកិច្ចប្រជុំធំរួមទូទៅ (Plenary Session) ទៅតាមក្រុមជំនាញនៃប្រទេសនីមួយៗ ក្នុងគោលបំណងដើម្បីបង្កើនប្រសិទ្ធភាពនៃការគ្រប់គ្រងទឹកកខ្វក់ និងការគ្រប់គ្រងសម្បត្តិអចលនទ្រព្យ-ទ្រព្យសកម្ម (Asset Management) ព្រមទាំងពិភាក្សាអំពីបញ្ហាសំខាន់ៗដែលកំពុងតែកើតមានឡើងពីវិស័យទឹកស្អាត ទឹកកខ្វក់ ដូចជាការបំពុលសារធាតុថ្មីៗ ការចូលរួមពីអតិថិជន និងសហគមន៍ សេដ្ឋកិច្ចចក្រា (Circular Economy) ភាពធន់ និងការបម្រែបម្រួលអាកាសធាតុ ក្នុងការស្វែងយល់អំពីយុទ្ធសាស្ត្រដើម្បីធានាសុខភាពបរិស្ថាន និងសហគមន៍ពីប្រទេសអូស្ត្រាលី និងពីបណ្តាប្រទេសដែលបានចូលរួមចែករំលែក ធានាសម្រេចបាននូវសេដ្ឋកិច្ចចក្រា ក្នុងការពង្រឹងសមត្ថភាព និងបទពិសោធន៍អតិថិជន និងការអភិវឌ្ឍយុទ្ធសាស្ត្រភាពធន់នឹងការបម្រែបម្រួលអាកាសធាតុ។ សូមជម្រាបជូនផងដែរថា Ozwater គឺជាសន្និបាត និងពិព័រណ៍ប្រចាំឆ្នាំសំខាន់បំផុតរបស់សមាគមទឹកអូស្ត្រាលី (Australia Water Association, AWA) ដែលប្រមូលផ្តុំអ្នកជំនាញទឹកជាតិ និងអន្តរជាតិដើម្បីចែករំលែកចំណេះដឹង និងបទពិសោធន៍ស្តីពីបញ្ហាទឹកជុំវិញពិភពលោក។ សន្និបាតនេះនឹងផ្តល់ឱកាសដ៏មានតម្លៃដល់អ្នកចូលរួមក្នុងការពង្រឹងសមត្ថភាពគ្រប់គ្រងធនធានទឹក និងពង្រឹងទំនាក់ទំនងជាមួយស្ថាប័នទឹកអូស្ត្រាលី និងអន្តរជាតិ។ សម្រាប់សន្និបាតទឹកឆ្នាំ២០២៦ (Ozwater’26) នឹងត្រូវរៀបចំឡើងនៅថ្ងៃទី២៦-២៨ ខែឧសភា ឆ្នាំ២០២៦ នៅទីក្រុង Brisbane ប្រទេសអូស្ត្រាលី៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube