ក្រុមការងារអន្តរស្ថាប័នចុះពិនិត្យទីតាំងដើម្បីត្រៀមរៀបចំពិធីសំណេះសំណាលជាមួយមន្ត្រីរាជការ បុគ្គលិក កម្មករ និយោជិត កំពង់ផែស្វយ័តក្រុងព្រះសីហនុ (កសស) នាឱកាសអបអរសាទរខួបអនុស្សាវរិយ៍លើកទី១៤៩ នៃទិវាពលកម្មអន្តរជាតិ១ ឧសភា ឆ្នាំ២០២៥ ព្រះសីហនុ៖ នាព្រឹកថ្ងៃសុក្រ ទី២៦ ខែមេសា ឆ្នាំ២០២៥ ឯកឧត្តមឈួន វិន រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំគណៈប្រតិភូចូលរួមចុះពិនិត្យទីតាំងរៀបចំពិធីសំណេះសំណាលជាមួយមន្ត្រីរាជការ បុគ្គលិក កម្មករ និយោជិត កំពង់ផែស្វយ័តក្រុងព្រះសីហនុ (កសស) នាឱកាសអបអរសាទរខួបលើកទី១៣៩ នៃទិវាពលកម្មអន្តរជាតិ ១ ឧសភា ឆ្នាំ២០២៥ ដែលដឹកនាំដោយ ឯកឧត្តម សន្តិបណ្ឌិត យូ ស៊ុនឡុង រដ្ឋមន្ដ្រីប្រតិភូអមនាយករដ្ឋមន្ដ្រី និងជានាយករងខុទ្ទកាល័យសម្ដេចមហាបវរធិបតីនាយករដ្ឋមន្ដ្រី ដោយមានការអញ្ជើញចូលរួមពីតំណាងគណៈកម្មការបុណ្យជាតិ អាជ្ញាធរមូលដ្ឋាន កងកម្លាំងសមត្ថកិច្ច រួមទាំងមន្ត្រីជំនាញពាក់ព័ន្ធជាច្រើនរូបផ្សេងទៀត។ ការចុះត្រួតពិនិត្យនេះ ត្រូវបានរៀបចំឡើងក្នុងគោលបំណង ពិនិត្យពីវឌ្ឍនភាពការងាររបស់គណៈកម្មការ និងអនុគណៈកម្មការនីមួយៗ និងពិនិត្យមើលការងារនានាដែលនៅសេសសល់ ព្រមទាំងបែងចែកតួនាទីភារកិច្ចនៃការទទួលខុសត្រូវរបស់គណៈកម្មការនីមួយៗឱ្យបានត្រឹមត្រូវ គ្រប់ជ្រុងជ្រោយ ធានាឱ្យការរៀបចំដំណើរ អាចប្រព្រឹត្តទៅបានយ៉ាងរលូនតាមផែនការ ដែលបានគ្រោងទុក។ ឯកឧត្តមរដ្ឋមន្ត្រីប្រតិភូ បានណែនាំឱ្យសមាជិក សមាជិកានៃគណៈកម្មការ និងអនុគណៈកម្មការទាំងអស់ ត្រូវសហការគ្នាឱ្យបានជិតស្និទ្ធជាមួយភាគីពាក់ព័ន្ធ ដោយការទទួលខុសត្រូវខ្ពស់ និងផ្តល់ព័ត៌មានទៅវិញទៅមកឱ្យបានគ្រប់ជ្រុងជ្រោយ ជាពិសេសត្រូវអនុវត្តតាមតួនាទី និងភារកិច្ចដែលថ្នាក់ដឹកនាំបានប្រគល់ជូន សំដៅធានាឱ្យការប្រារព្វពិធីនាថ្ងៃខាងមុខនេះ ប្រព្រឹត្តទៅដោយរលូន ប្រកបដោយសន្តិសុខ សុវត្ថិភាព សណ្តាប់ធ្នាប់ របៀបរៀបរយ ជូនគណៈអធិបតី ថ្នាក់ដឹកនាំ និងអ្នកចូលរួមក្នុងពិធីទាំងមូល៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube