សៀមរាប៖ អាជ្ញាធរខេត្តសៀមរាប បានជំរុញដល់ភាគីពាក់ព័ន្ធនានា ត្រូវយកចិត្តទុកដាក់ចំពោះការផ្តល់នូវឧបករណ៍សុវត្ថិភាព និងជំរុញការអប់រំដល់សិស្សានុសិស្សអំពីសុវត្ថិភាពចរាចរណ៍ ដែលជាការធានា និងកាត់បន្ថយហានិភ័យដែលកើតឡើងដោយសារគ្រោះថ្នាក់នៅលើដងផ្លូវនេះ។ ថ្លែងនៅក្នុងពិធីបើកវគ្គបណ្តុះបណ្តាលស្តីពី ការវាយតម្លៃលក្ខខណ្ឌសុវត្ថិភាពនៃហេដ្ឋារចនាសម្ព័ននៅតំបន់សាលារៀន ដោយប្រើប្រាស់វិធីសាស្ត្រដាក់ចំណាត់ថ្នាក់ផ្កាយ(SR4S) នៅវិទ្យាល័យ ហ៊ុន សែន ប្រាសាទបាគង ក្នុងស្រុកប្រាសាទបាគង ខេត្តសៀមរាប នាព្រឹកថ្ងៃទី២៣ ខែមេសា ឆ្នាំ២០២៥ លោក លី សារី អភិបាលរងខេត្តសៀមរាប និងជាអនុប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បានមានប្រសាសន៍ថា ការវាយតម្លៃលក្ខខណ្ឌសុវត្តិភាពនៃហេដ្ឋារចនាសម្ព័ន្ធនៅតំបន់សាលារៀនដោយប្រើប្រាស់វិធីសាស្ត្រដាក់ចំណាត់ថ្នាក់ផ្កាយនេះ គឺពិតជាមានសារៈសំខាន់ខ្លាំងណាស់ អំពីការងារសុវត្ថិភាពចរាចរណ៍ និងការកាត់បន្ថយគ្រោះថ្នាក់ចរាចរណ៍នៅតាមតំបន់សាលារៀន។ លោកបន្តថា ប្រធានបទនៃសិក្ខាសាលាថ្ងៃនេះ ប្រៀបដូចជាខ្សែច្រវាក់ដែលប្រទាក់ក្រឡាគ្នា ក្នុងដំណើរអភិវឌ្ឍន៍សេដ្ឋកិច្ចសង្គម ដែលមានគោលដៅរៀបចំឱ្យមានរបៀបរៀបរយលើកិច្ចការងាររៀបចំហេដ្ឋារចនាសម្ព័ន្ធ ស្លាកសញ្ញាចរាចរណ៍ និងផលប៉ះពាល់នៃគ្រោះថ្នាក់ចរាចរណ៍ និងមានភាពសុខដុមសម្រាប់អ្នកប្រើប្រាស់ផ្លូវថ្នល់ ក៏ដូចជាការប្រើប្រាស់ផ្លូវថ្នល់ ដើម្បីធ្វើយ៉ាងណាឱ្យសិក្ខាកាមដែលបានចូលរួម វគ្គបណ្តុះបណ្តាលនាពេលនេះទទួលបាននូវចំណេះដឹង និងបទពិសោធល្អ ដែលជាជំនួយដល់ការអនុវត្ត វិធានការសុវត្ថិភាពចរាចរណ៍ និងកាត់បន្ថយគ្រោះថ្នាក់ចរាចរណ៍ ចំពោះបងប្អូនប្រជាពលរដ្ឋ និងសិស្សានុ សិស្ស។ លោក លី សារី បានមានប្រសាសន៍បញ្ជាក់ថា ដើម្បីធានាសុវត្ថិភាពចរាចរណ៍និងកាត់បន្ថយហានិភ័យគ្រោះថ្នាក់ចរាចរណ៍គឺយើងត្រូវផ្តល់ឱ្យសិស្សានុសិស្សនូវឧបករណ៍សុវត្ថិភាព និងការអប់រំអំពីសុវត្ថិភាពចរាចរណ៍ ព្រមទាំងដាក់បញ្ចូលនូវវិធីសាស្រ្តរួមមួយ ដែលកំណត់ការអប់រំជាចំណុចគន្លឹះក្នុងការពង្រឹងឥរិយាបថសុវត្ថិភាពចរាចរណ៍របស់អ្នកប្រើប្រាស់ផ្លូវថ្នល់បន្ថែមពីលើការផ្តល់មួកសុវត្ថិភាពមានគុណភាពខ្ពស់ហើយឱ្យមានការបណ្តុះបណ្តាលកុមារឬសិស្សឱ្យយល់ពីវិធានការ វិធីសាស្រ្តដែលអាចជៀសផុតពីគ្រោះថ្នាក់ចរាចរណ៍ ពិតជាអាចឱ្យកម្លាំងទំពាំងស្នងឫស្សីនេះ មានការយល់ដឹងពីសុវត្ថិភាពចរាចរណ៍តាំងពីកុមារភាព ហើយអាចនឹងពាំនាំទៅដល់មាតាបិតា សមាជិកក្នុងគ្រួសារក្មួយៗឱ្យយល់ និងអនុវត្តន៍ឱ្យបានម៉ឺងម៉ាត់ក្នុងពេលធ្វើដំណើរតាមផ្លូវថ្នល់ ដើម្បីអាចកាត់បន្ថយគ្រោះថ្នាក់ចរាចរណ៍ឱ្យកាន់តែមានប្រសិទ្ធភាពខ្ពស់ផងដែរ៕