សិក្ខាសាលាពិគ្រោះយោបល់បច្ចេកទេសស្តីពីការរួមចំណែកនៃវិស័យដឹកជញ្ជូនឆ្លើយតបនឹងការប្រែប្រួលអាកាសធាតុ សម្រាប់រៀបចំរបាយការណ៍នៃការចូលរួមចំណែករបស់ជាតិលើកទី៣ (NDC3.0) ដើម្បីអនុវត្ដអនុសញ្ញាក្របខ័ណ្ឌសហប្រជាជាតិស្ដីពី ការប្រែប្រួលអាកាសធាតុ ទីស្តីការក្រសួង៖ នាថ្ងៃអង្គារ ទី២២ ខែមេសា ឆ្នាំ២០២៥ ក្រសួងសាធារណការ និងដឹកជញ្ជូន សហការជាមួយក្រសួងបរិស្ថាន ដោយមានការគាំទ្រពីកម្មវិធីអភិវឌ្ឍន៍សហប្រជាជាតិ (UNDP) បានរៀបចំសិក្ខាសាលាពិគ្រោះយោបល់បច្ចេកទេសស្ដីពីវិស័យដឹកជញ្ជូន សម្រាប់ការរៀបចំផែនការជាតិរួមចំណែកឆ្លើយតបនឹងការប្រែប្រួលអាកាសធាតុនៅកម្ពុជា ដំណាក់កាលទី៣ (NDC 3.0) ក្រោមអធិបតីភាព ឯកឧត្តម ឃុន សុខា អនុរដ្ឋលេខាធិការ ក្រសួងសាធារណការ និងដឹកជញ្ជូន ដោយមានការចូលរួមពីឯកឧត្តមរដ្ឋលេខាធិការ នៃរដ្ឋលេខាធិការដ្ឋានអាកាសចរណ៍ស៊ីវិល ឯកឧត្តមអនុរដ្ឋលេខាធិការក្រសួងបរិស្ថាន អ្នកជំនាញការកម្មវិធីបរិស្ថាន UNDP តំណាងក្រសួងស្ថាប័នពាក់ព័ន្ធ ដៃគូអភិវឌ្ឍន៍ វិស័យឯកជន និងអង្គភាពជំនាញក្រសួងសាធារណការ និងដឹកជញ្ជូន ជាច្រើនរូបផងដែរ។ សិក្ខាសាលាពិគ្រោះយោបល់បច្ចេកទេសនេះ ត្រូវបានរៀបចំឡើងក្នុងគោលបំណងបង្ហាញពីការធ្វើបច្ចុប្បន្នភាពនៃការអនុវត្តផែនការជាតិរួមចំណែកឆ្លើយតបនឹងការប្រែប្រួលអាកាសធាតុនៅកម្ពុជា ដំណាក់កាលទី២ (NDC 2.0) សម្រាប់ឆ្នាំ២០២៤ និងការពិភាក្សា ពិគ្រោះយោបល់ ក៏ដូចជាផ្តល់ធាតុចូលសម្រាប់រៀបចំផែនការជាតិរួមចំណែកឆ្លើយតបនឹងការប្រែប្រួលអាកាសធាតុនៅកម្ពុជា ដំណាក់កាលទី៣ (NDC 3.0) សម្រាប់វិស័យដឹកជញ្ជូន។ ឯកឧត្តមអនុរដ្ឋលេខាធិការ បានថ្លែងបញ្ជាក់ថា ក្នុងឆ្នាំ២០២៥ នេះជាខួបលើកទី ១០ នៃកិច្ចព្រមព្រៀងទីក្រុងប៉ារីសក្នុងកិច្ចខិតខំប្រឹងប្រែងជាសាកល ដើម្បីប្រយុទ្ធប្រឆាំងនឹងការប្រែប្រួលអាកាសធាតុ ដោយប្រទេសនានារំពឹងថានឹងរៀបចំដាក់បញ្ជូនក្នុងផែនការជាតិរួមចំណែកឆ្លើយតបនឹងការប្រែប្រួលអាកាសធាតុ ដំណាក់កាលទី៣ (NDC 3.0)។ សម្រាប់រាជរដ្ឋាភិបាលកម្ពុជា បានបង្ហាញពីសមត្ថភាពរបស់ខ្លួន ក្នុងការដោះស្រាយបញ្ហាប្រឈមនានា ដោយកំណត់យករបៀបវារៈជាតិប្រកបដោយមហិច្ឆតាក្នុងការដោះស្រាយបញ្ហាប្រែប្រួលអាកាសធាតុ និងការបង្កើតគោលនយោបាយជាតិសំខាន់ៗ ឆ្លើយតបទៅនឹងផលប៉ះពាល់ដែលបណ្តាលមកពីការប្រែប្រួលអាកាសធាតុដូចជាការរៀបចំ និងដាក់ជូននូវផែនការជាតិរួមចំណែកឆ្លើយតបនឹងការប្រែប្រួលអកាសធាតុនៅកម្ពុជា ទៅក្របខ័ណ្ឌអនុសញ្ញាសហប្រជាជាតិ ស្តីពីការប្រែប្រួលអាកាសធាតុក្នុងឆ្នាំ២០២០ យុទ្ធសាស្ត្រអភិវឌ្ឍន៍រយៈពេលវែងប្រកបដោយអព្យាក្រឹតកាបូននៅ ឆ្នាំ២០២១ និងការបញ្ជ្រាបការប្រែប្រួលអាកាសធាតុទៅក្នុងគោលនយោបាយជាតិ និងដំណើរការពាក់ព័ន្ធ។ ជាការចូលរួមចំណែកពីវិស័យដឹកជញ្ជូន ក្រសួងសាធារណការ និងដឹកជញ្ជូន បានរៀបចំសូចនាករពាក់ព័ន្ធមួយចំនួន សូចនាករកាត់បន្ថយ(Mitigation) និងសូចនាករបន្សាំ(Adaptation) ដោយបានផ្ដល់ធាតុចូល និងវឌ្ឍនភាពជាបន្តបន្ទាប់រហូតដល់បច្ចុប្បន្ន ដែលបានបញ្ចូលក្នុងរបាយការណ៍វឌ្ឍនភាពនៃការអនុវត្តផែនការជាតិរួមចំណែកឆ្លើយតបនឹងការប្រែប្រួលអាកាសធាតុនៅកម្ពុជា ដំណាក់កាលទី២ (NDC 2.0) សម្រាប់ឆ្នាំ២០២៤ និងសម្រាប់ការរៀបចំផែនការជាតិរួមចំណែកឆ្លើយតបនឹងការប្រែប្រួលអាកាសធាតុនៅកម្ពុជា ដំណាក់កាលទី៣ (NDC 3.0) ដោយមានការចូលរួមពីក្រសួង ស្ថាប័ន ដៃគូអភិវឌ្ឍន៍ វិស័យឯកជន ដើម្បីបង្ហាញពីមហិច្ឆតាកម្ពុជាក្នុងការកាត់បន្ថយការបញ្ចេញឧស្ម័នផ្ទះកញ្ចក់ពីគ្រប់វិស័យជាពិសេស វិស័យថាមពល ឧស្សាហកម្ម កសិកម្ម ព្រៃឈើ និងសំណល់៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube