កិច្ចប្រជុំលើកទី៣ នៃគណៈកម្មការចម្រុះសម្រាប់សម្របសម្រួលការអនុវត្តគម្រោងពង្រឹងសមត្ថភាពក្នុងការសម្របសម្រួលសម្រាប់ការធ្វើឱ្យប្រសើរឡើងនូវប្រព័ន្ធភស្តុភារកម្មកម្ពុជា(SF-CLIP) ទីស្ដីការក្រសួង៖ នាព្រឹកថ្ងៃពុធ ទី២ ខែមេសា ឆ្នាំ២០២៥ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន និងជាប្រធានគណៈកម្មការចម្រុះ និងលោកស្រី MIURA Yoshiko តំណាងជាន់ខ្ពស់ ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំកម្ពុជា បានអញ្ជើញជាសហប្រធានដឹកនាំកិច្ចប្រជុំលើកទី៣ នៃគណៈកម្មការចម្រុះសម្រាប់សម្របសម្រួលការអនុវត្តគម្រោងពង្រឹងសមត្ថភាពក្នុងការសម្របសម្រួលសម្រាប់ការធ្វើឱ្យប្រសើរឡើងនូវប្រព័ន្ធភស្តុភារកម្មកម្ពុជា(SF-CLIP) ដោយមានការចូលរួមពីឯកឧត្តម លោកជំទាវ ជាថ្នាក់ដឹកនាំក្រសួង អ្នកជំនាញ (JICA) តំណាងក្រសួងមហាផ្ទៃ តំណាងអគ្គនាយកដ្ឋានអន្តោប្រវេសន៍ សមាជិក សមាជិកាគណៈកម្មការ និងមន្ត្រីជំនាញពាក់ព័ន្ធសរុបចំនួនជាង៨០នាក់។ កិច្ចប្រជុំនេះរៀបចំឡើងក្នុងគោលបំណងដើម្បីបង្ហាញអំពីសកម្មភាពការងាររួម នៃការកែលម្អធ្វើឱ្យប្រសើរឡើងនូវការដឹកជញ្ជូនទំនិញតាមផ្លូវថ្នល់ និងផ្លូវដែក ការដឹកជញ្ជូនទំនិញឆ្លងកាត់ព្រំដែន វឌ្ឍនភាពនៃការងារសិក្សាអំពីមណ្ឌលភស្តុភារកម្មក្នុងតំបន់ ការពិនិត្យ វាយតម្លៃរបស់ក្រុមការងារនីមួយៗ ក្នុងការស្វែងរកដំណោះស្រាយបញ្ហាប្រឈមនានា ព្រមទាំងការប្រមូលធាតុចូលបន្ថែម សំដៅរួមចំណែកពង្រឹងការអនុវត្តគម្រោង ការរៀបចំបទដ្ឋានគតិយុត្តពាក់ព័ន្ធការដឹកជញ្ជូនទំនិញឆ្លងកាត់ព្រំដែនតាមផ្លូវគោក ផ្លូវទឹក និងផ្លូវដែក ធានាបាននូវការគ្រប់គ្រងការដឹកជញ្ជូន កាន់តែមានប្រសិទ្ធភាព និងមានតម្លៃឡូជីស្ទីកកាន់តែទាប។ លោកជំទាវរដ្ឋលេខាធិការប្រចាំការ បានលើកឡើងពីគម្រោងធ្វើឱ្យប្រសើរប្រព័ន្ធភស្តុភារកម្មកម្ពុជា ដែលបាននិងកំពុងអនុវត្តមាន៣ដំណាក់កាល៖ ដំណាក់កាលទី១ បានចាប់ផ្ដើមអនុវត្ត ពីឆ្នាំ២០១៧ ដល់ដើមឆ្នាំ២០២០, ដំណាក់កាលទី២ បានអនុវត្តពីចុងឆ្នាំ២០២០ ដល់ឆ្នាំ២០២៣ និងដំណាក់ទី៣ គ្រោងអនុវត្តរយៈពេល៣ឆ្នាំ គិតចាប់ពីដើមឆ្នាំ២០២៤ រហូតដល់ ឆ្នាំ២០២៧។ បន្ថែមពីលើនេះ លោកជំទាវរដ្ឋលេខាធិការប្រចាំការ ក៏បានថ្លែងអំណរគុណដល់អ្នកជំនាញមកពី JICA ដែលបានចូលរួមសហការ ក្នុងការជំរុញ និងការស្វះស្វែងយកចិត្តទុកដាក់ ធ្វើយ៉ាងណាឱ្យការអនុវត្តការងារនេះសម្រេចបានជាលទ្ធផលល្អ និងបន្តកិច្ចសហការជាមួយក្រុមការងារទាំងអស់បន្ថែមទៀតដើម្បីជំរុញការអនុវត្តគម្រោងឱ្យទទួលបានជោគជ័យ សំដៅលើកកម្ពស់ការដឹកជញ្ជូនតាមផ្លូវគោក ផ្លូវទឹក និងផ្លូវដែក តាមព្រំដែននៅកម្ពុជាឱ្យកាន់តែមានភាពរីកចម្រើនថែមទៀត៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube