សិក្ខាសាលាពិគ្រោះយោបល់ ស្តីពីការអភិវឌ្ឍសកម្មភាពអាទិភាពសម្រាប់ការងារវិស័យទឹក អនាម័យ និងសុខភាព ក្នុង "ផែនការសម្រាប់ការចូលរួមរបស់ជាតិក្នុងការបន្ធូរបន្ថយឧស្ម័នផ្ទះកញ្ចក់" និង "យុទ្ធសាស្ត្រជាតិក្នុងការឆ្លើយតបនឹងការប្រែប្រួលអាកាសធាតុ" រាជធានីភ្នំពេញ៖ នាថ្ងៃពុធ ទី២៦ ខែមីនា ឆ្នាំ២០២៥ ឯកឧត្តម ចៅ សុភៈភិបាល អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន និងសហការី បានចូលរួមសិក្ខាសាលាពិគ្រោះយោបល់ ស្តីពីការអភិវឌ្ឍសកម្មភាពអាទិភាពសម្រាប់ការងារវិស័យទឹក អនាម័យ និងសុខភាព ក្នុង "ផែនការសម្រាប់ការចូលរួមរបស់ជាតិក្នុងការបន្ធូរបន្ថយឧស្ម័នផ្ទះកញ្ចក់" និង"យុទ្ធសាស្ត្រជាតិក្នុងការឆ្លើយតបនឹងការប្រែប្រួលអាកាសធាតុ" NDC 3.0 (Nationally Determined Contribution) របស់កម្ពុជា (WASH Sector in the NDC3.0) ដោយមានការសហការរៀបចំដោយក្រសួងបរិស្ថាន និងអង្គការយូនីសេហ្វ (UNICEF) និងមានការចូលរួមពីតំណាងក្រសួង-ស្ថាប័នពាក់ព័ន្ធមួយចំនួន មានជាអាទិ៍ ក្រសួងសាធារណការ និងដឹកជញ្ជូន ក្រសួងអភិវឌ្ឍន៍ជនបទ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ដៃគូអភិវឌ្ឍន៍ និងអង្គការក្រៅរដ្ឋាភិបាលផងដែរ។ សិក្ខាសាលាត្រូវបានរៀបចំឡើង ក្នុងគោលបំណងពិនិត្យពិភាក្សារួមគ្នាលើលទ្ឋផលរបាយការណ៍វាយតម្លៃបឋមលើគោលនយោបាយនៃវិស័យទឹក អនាម័យ និងសុខភាព (WASH) ព្រមទាំងឯកភាពជាគោលការណ៍លើវិធានការណ៍ថ្មីបានស្នើឡើងសម្រាប់ការងារវិស័យទឹក អនាម័យ និងសុខភាព ក្នុង NDC3.0 របស់កម្ពុជា ដោយឈរលើសូចនាករដែលមានស្រាប់ក្នុង NDC2.0។ វិស័យទឹក អនាម័យ និងសុខភាព ក្នុង NDC 3.0 កម្ពុជា បានបញ្ចូលការគ្រប់គ្រងប្រព័ន្ធទឹកកខ្វក់ និងសំណល់ភក់ ជាផ្នែកសំខាន់នៃ NDC 3.0 ដើម្បីកាត់បន្ថយមេតានពីស្ថានីយប្រព្រឹត្តកម្មទឹកកខ្វក់ និងសំណល់ភក់ ព្រមទាំងពង្រឹងប្រព័ន្ធទឹកកខ្វក់ធន់នឹងការបម្រែបម្រួលអាកាសធាតុ ដូចជាប្រព័ន្ធលូ ប្រព័ន្ធប្រឡាយបង្ហូរមានភាពធន់នឹងទឹកជំនន់ជាដើម។ សូមបញ្ជាក់ថា៖ NDC 3.0 (Nationally Determined Contribution) របស់កម្ពុជា គឺជាផែនការជាតិសម្រាប់កាត់បន្ថយការបំភាយឧស្ម័នផ្ទះកញ្ចក់ និងគាំទ្រភាពធន់នឹងអាកាសធាតុ ដែលត្រូវបានធ្វើបច្ចុប្បន្នភាពនៅឆ្នាំ ២០២៤ សម្រាប់អនុវត្តរហូតដល់ឆ្នាំ ២០៣៥។ ប្រទេសកម្ពុជាត្រូវដាក់បញ្ជូនទៅ UNFCCC (United Nations Framework Convention on Climate Change) ក្នុងខែកក្កដា ឆ្នាំ២០២៥ ខាងមុខនេះ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube