កិច្ចប្រជុំពិនិត្យឡើងវិញ និងការវិភាគមុខងារ និងរចនាសម្ព័ន្ធរបស់អគ្គនាយកដ្ឋានសាធារណការ នៃក្រសួងសាធារណការ និងដឹកជញ្ជូន ទីស្តីការក្រសួង៖ នាថ្ងៃអង្គារ ទី១៨ ខែមីនា ឆ្នាំ២០២៥ លោកជំទាវ ហួត លីដា អនុរដ្ឋលេខាធិការ និងជាប្រធានក្រុមការងារលេខាធិការដ្ឋានពិនិត្យឡើងវិញ និងការវិភាគមុខងារ និងរចនាសម្ព័ន្ធនៃក្រសួងសាធារណការ និងដឹកជញ្ជូន បានអញ្ជើញជាអធិបតីដឹកនាំកិច្ចប្រជុំក្រុមការងារជាមួយថ្នាក់ដឹកនាំ និងមន្រ្តីជំនាញនៃអគ្គនាយកដ្ឋានសាធារណការ នៃក្រសួងសាធារណការ និងដឹកជញ្ជូន ដោយមានការចូលរួមពី ឯកឧត្តម លោក លោកស្រី និងក្រុមការងារពាក់ព័ន្ធ។ កិច្ចប្រជុំនេះ មានគោលបំណងពិនិត្យឡើងវិញលើការវិភាគមុខងារ និងរចនាសម្ព័ន្ធរបស់អគ្គនាយកដ្ឋានសាធារណការ និងនាយកដ្ឋានក្រោមឱវាទ ដើម្បីស្វែងរកចំណុចត្រួតជាន់គ្នា និងមិនច្បាស់លាស់ ដើម្បីរៀបចំឡើងវិញនូវការវិភាគមុខងារថ្មី និងរចនាសម្ព័ន្ធដែលចាំបាច់ ដែលធានាបាននូវភាពត្រឹមត្រូវ ច្បាស់លាស់ និងឆ្លើយតបទៅនឹងបរិបទការងារបច្ចេកទេសដែលកំពុងអនុវត្តនាពេលបច្ចុប្បន្នឱ្យកាន់តែប្រសើរឡើង។ សូមជម្រាបជូនថា រាជរដ្ឋាភិបាល នីតិកាលទី៧ នៃរដ្ឋសភា បានដាក់ចេញនូវកម្មវិធីកំណែទម្រង់សំខាន់ៗ ក្នុងនោះ ការងារពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួង ស្ថាប័ន គឺជាការងារអាទិភាពគន្លឹះដ៏សំខាន់មួយ ដែលរាជរដ្ឋាភិបាល តាមរយៈក្រសួងមុខងារសាធារណៈ បាននិងកំពុងផ្តល់កិច្ចសហការសម្របសម្រួលជូនគ្រប់ក្រសួង ស្ថាប័ន ដើម្បីជំរុញការងារនេះឱ្យទទួលបាននូវវឌ្ឍនភាព និងបញ្ចប់ជោគជ័យស្របតាមចក្ខុវិស័យ និងទិសដៅការងាររបស់រាជរដ្ឋាភិបាល៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube