បើតាមការគូសបញ្ជាក់ពីអភិបាលស្រុកប្រាសាទបាគងបានឲ្យកម្ពុជាថ្មីដឹងថា ផ្លូវទៅកំពង់ភ្លុកដែលជាតំបន់សក្ដានុពលទេសចរដ៏ទាក់ទាញនៅបឹងទន្លេសាប នឹងប្រែក្លាយពីផ្លូវដីតូចចង្អៀតទៅជាផ្លូវកៅស៊ូឆាប់ៗខាងមុខនេះ ខណៈដែលកងវិស្វកម្មកំពុងតែសម្រុកស្ថាបនាឲ្យរួចរាល់នៅចុងរដូវប្រាំងនេះ។លោក សូរ ប្លាតុង អភិបាលស្រុកប្រាសាទបាគង ខេត្តសៀមរាបបានឲ្យកម្ពុជាថ្មីដឹងថា ផ្លូវទៅកំពង់ភ្លុកមានប្រវែងសរុបជាង ១៥ គីឡូម៉ែត្រ។ ផ្លូវនេះចាប់ពីផ្លូវជាតិលេខ ៦ ឆ្លងកាត់ឃុំចំនួន ៣ មានឃុំរលួស ឃុំមានជ័យ ដល់ឃុំកំពង់ភ្លុកមាត់បឹងទន្លេសាប។បើតាមលោកអភិបាលស្រុក កន្លងទៅផ្លូវនេះមួយកំណាត់ជាផ្លូវបេតុង ដែលបានសាងសង់ចេញពីផ្លូវជាតិលេខ ៦ បានប្រវែងជាង ២ គីឡូម៉ែត្រ ខណៈកំណាត់ផ្លូវនៅសល់ជាផ្លូវដី ដែលខែប្រាំងហ៊ុយពិបាកធ្វើដំណើរ និងខែវស្សារងការជន់លិចថែមទៀត។ យ៉ាងណាមិញ ប្រមុខរដ្ឋាភិបាលសម្ដេចធិបតី បានណែនាំឲ្យកងវិស្វកម្មសាងសង់បន្តប្រវែងជាង ៩ គីឡូម៉ែត្រទៀត ពង្រីកទទឹង ៨ ម៉ែត្រ ចាប់ពីឃុំមានជ័យបន្តរហូតដល់ឃុំកំពង់ភ្លុកជាប់មាត់បឹងទន្លេសាបជាផ្លូវកៅស៊ូ។តាមរយៈការបន្តស្ថាបនាផ្លូវនេះ អភិបាលស្រុកប្រាសាទបាគងបានបញ្ជាក់ថា នឹងផ្តល់ប្រយោជន៍សម្រាប់ពលរដ្ឋក្នុងការធ្វើដំណើរ និងដឹកជញ្ជូនផលិតផលកសិកម្មផ្សេងៗ ជាពិសេសក៏សម្រួលដល់ការធ្វើដំណើររបស់ភ្ញៀវទេសចរមកកម្សាន្តនៅតំបន់កំពង់ភ្លុក ដែលជាតំបន់គោលដៅទេសចរណ៍ដ៏ល្បីទាក់ទាញនៅខេត្តសៀមរាប ដែលនឹងជួយដល់ជីវភាពពលរដ្ឋក្នុងមូលដ្ឋានកាន់តែល្អប្រសើរ ដោយសារកំណើនទេសចរមកកម្សាន្តច្រើន នៅពេលមានផ្លូវល្អស្អាតងាយស្រួលធ្វើដំណើរ។ បន្ទាប់ពីចូលរួមកម្មវិធីរត់ប្រណាំងអន្តរជាតិពាក់កណ្ដាលម៉ារ៉ាតុងអង្គរវត្ត លើកទី២៩ តាមរយៈបណ្ដាញសង្គម នៅព្រឹកថ្ងៃទី២ ខែធ្នូ ឆ្នាំ២០២៤ សម្ដេចធិបតី ហ៊ុន ម៉ាណែត បានឲ្យដឹងថា សម្តេចបានឆ្លៀតឱកាសចុះមកពិនិត្យស្ថានភាព និងទស្សនាសហគមន៍ទេសចរណ៍ធម្មជាតិកំពង់ភ្លុក នៅស្រុកប្រាសាទបាគង ខេត្តសៀមរាប។ក្នុងការចុះពិនិត្យមើលស្ថានភាព និងជួបសំណេះសំណាលផ្ទាល់ជាមួយសហគមន៍ ពិសេសអ្នកប្រកបរបរជាអ្នកបើកបរកាណូត និងអុំទូកបម្រើសេវាជូនអ្នកទេសចរ សម្ដេចធិបតី ហ៊ុន ម៉ាណែត ទទួលបានសំណូមពរមួយចំនួន ហើយក៏សម្រេចផ្តល់ជាដំណោះស្រាយជូនសហគមន៍ដូចជា៖ ១. សម្រេចឲ្យកសាងផ្លូវកៅស៊ូប្រវែង ៨ គីឡូម៉ែត្រ លើផ្លូវក្រាលគ្រួសក្រហមដែលមានស្រាប់ ដើម្បីផ្តល់ភាពងាយស្រួល ក្នុងការធ្វើដំណើរនិងកាត់បន្ថយការហុយ។ ២. កសាងបញ្ជរលក់សំបុត្រថ្មី របស់សហគមន៍ ដែលនឹងជួយឱ្យសហគមន៍មិនចាំបាច់ជួលដី ដើម្បីលក់សំបុត្រដូចបច្ចុប្បន្ន។ ៣. ផ្តល់បន្ថែមនូវធុងសំរាមក្នុងសហគមន៍ ដើម្បីថែរក្សាអនាម័យ និងបរិស្ថាននៅក្នុងតំបន់។ សម្ដេច នាយករដ្ឋមន្ដ្រី បានកោតសរសើរចំពោះប្រជាពលរដ្ឋនៅកំពង់ភ្លុក ដែលបានរួមគ្នាចងក្រងជាសហគមន៍ ដើម្បីផ្តល់ជូននូវសេវាកម្មយ៉ាងល្អជូនភ្ញៀវទេសចរជាតិ និងអន្តរជាតិ ប្រកបដោយស្នាមញញឹម និងសប្បាយរីករាយ ជាពិសេសក៏រួមចំណែក ក្នុងការលើកកម្ពស់ជីវភាពរស់នៅប្រចាំថ្ងៃ និងបង្កើតផលិតផលទេសចរណ៍បន្ថែមនៅក្នុងខេត្តសៀមរាប៕