ចុះពិនិត្យផ្ទៀងផ្ទាត់ទីតាំងសម្រាប់អនុគម្រោងសាងសង់បណ្តាញលូខ្នែង ខ្នែងរង តំណភ្ជាប់តាមផ្ទះ និងការងារសាងសង់ស្ថានីយចម្រោះ និងប្រព្រឹត្តកម្មទឹកកខ្វក់ ក្នុងខេត្តបាត់ដំបង ខេត្តបាត់ដបង៖ នាព្រឹកថ្ងៃទី១២ ខែមីនា ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងការពន្លឿនការផ្គត់ផ្គង់ទឹកស្អាត និងអនាម័យ បានអញ្ជើញដឹកនាំសមាជិក-សមាជិកាគម្រោង ដើម្បីចុះពិនិត្យផ្ទៀងផ្ទាត់ទីតាំងសម្រាប់អនុគម្រោងសាងសង់បណ្តាញលូខ្នែង ខ្នែងរង និងតំណភ្ជាប់តាមផ្ទះ ក្នុងក្រុងបាត់ដំបង ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ នាយករងគម្រោង ឯកឧត្តមអគ្គនាយក អគ្គនាយករង ថ្នាក់ដឹកនាំ និងមន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ ទីប្រឹក្សាជាតិ ថ្នាក់ដឹកនាំ និងមន្ត្រីជំនាញនៃមន្ទីរសាធារណការ និងដឹកជញ្ជូនខេត្តបាត់ដំបង តំណាងរដ្ឋបាលសាលាខេត្តបាត់ដំបង និងតំណាងរដ្ឋបាលសាលាក្រុងបាត់ដំបង។ ដំណើរបំពេញបេសកកម្មនេះគឺ ដើម្បីចុះពិនិត្យផ្ទៀងផ្ទាត់ទីតាំងសម្រាប់អនុគម្រោងសាងសង់បណ្តាញលូខ្នែង ខ្នែងរង និងតំណភ្ជាប់តាមផ្ទះ ក្នុងក្រុងបាត់ដំបង នៃគម្រោងការពន្លឿនការផ្គត់ផ្គង់ទឹកស្អាត និងអនាម័យ ក្រោមឥណទានសម្បទានរបស់ធនាគារពិភពលោក ដែលគ្រោងនឹងចាប់ផ្តើមការសិក្សានៅត្រីមាសទី២ ឆ្នាំ២០២៥ ខាងមុខនេះ ដោយយកទៅពិនិត្យបញ្ជាក់ជាមួយតំបន់សេវាគ្រប់គ្រងរបស់គម្រោងផ្គត់ផ្គង់ទឹក និងអនាម័យតាមខេត្ត ក្រោមឥណទានសម្បទានរបស់ធនាគារអភិវឌ្ឍន៍អាស៊ី ដែលកំពុងអនុវត្តការងារសាងសង់ ក្នុងន័យសម្របសម្រួលធានានូវសង្គតិភាពនៃការអនុវត្តការងារលើតំបន់សេវារបស់ដៃគូអភិវឌ្ឍន៍ទាំង២ កុំឱ្យជាន់ទីតាំងគ្នា។ ឆ្លៀតក្នុងឱកាសនោះផងដែរឯកឧត្តមរដ្ឋលេខាធិការក៏បានអញ្ជើញចុះពិនិត្យការងារសាងសង់ស្ថានីយចម្រោះ និងប្រព្រឹត្តកម្មទឹកកខ្វក់ ដែលស្ថិតក្នុងសង្កាត់ស្វាយប៉ោ សង្កាត់ចំការសំរោង ឃុំស្លាកែត ក្រុងបាត់ដំបង និងភូមិព្រៃទទឹង ឃុំអូរតាគី ស្រុកថ្មគោល ខេត្តបាត់ដំបង៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube