ចុះពិនិត្យស្ថានភាពទីតាំងគីឡូម៉ែត្រលេខ៩៨ នៃផ្លូវល្បឿនលឿនភ្នំពេញ-ក្រុងព្រះសីហនុ ត្រង់ចំណុចសួនឧទ្យានជាតិបូកគោ ដែលចុងរដូវវស្សាកន្លងទៅមានទឹកភ្លៀងហូរច្រោះ និងស្នាមប្រេះដីតាមចំរាក់ចង្កេះភ្នំ នាព្រឹកថ្ងៃសុក្រទី៧ ខែកុម្ភៈ ឆ្នាំ២០២៥ តាមការចង្អុលបង្ហាញពីឯកឧត្តម ប៉េង ពោធិ៍នា រដ្ឋមន្រ្តី និងតាមការណែនាំអនុវត្ត ឯកឧត្តម សួង ហេង រដ្ឋលេខាធិការ និងជានាយកគ្រប់គ្រងគម្រោង ឯកឧត្តម ស៊ឹង សុគង់ អនុរដ្ឋលេខាធិការ បានដឹកនាំក្រុមការងារបច្ចេកទេស ដែលរួមដំណើរដោយ ឯកឧត្តមអគ្គនាយកបច្ចេកទេស អគ្គនាយករង ប្រធាននាយកដ្ឋានផ្លូវល្បឿនលឿន និងស្ពានធំៗ និងក្រុមវិស្វករក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានចុះពិនិត្យពីស្ថានភាពទីតំាងគីឡូម៉ែត្រលេខ៩៨(ខាងឆ្វេងដៃ ទិសដៅភ្នំពេញ-ក្រុងព្រះសីហនុ) នៃផ្លូវល្បឿនលឿនភ្នំពេញ-ក្រុងព្រះសីហនុ ត្រង់ចំណុចសួនឧទ្យានជាតិបូកគោ ដែលចុងរដូវវស្សាកន្លងទៅមានទឹកភ្លៀងហូរច្រោះ និងស្នាមប្រេះដីតាមចំរាក់ចង្កេះភ្នំ ហើយអាចនឹងមានផលប៉ះពាល់ដល់ផ្លូវល្បឿនលឿន ពិសេសនៅរដូវភ្លៀងខាងមុខ។ ជាក់ស្តែង កន្លងទៅមានដីភ្នំ និងថ្មភ្នំបានបាក់គ្របជិតលើប្រឡាយអមផ្លូវ នៅត្រង់ចំណុចខាងលើ គ្រាដែលភ្លៀងធ្លាក់ខ្លាំង ហើយត្រូវបានចុះដោះស្រាយបានទាល់ពេលវេលា ព្រមទាំងតាមដានជាប្រចាំ ជៀសវាងប៉ះពាល់ដល់ការធ្វើចរាចរណ៍។ តាមការពិនិត្យស្ថានភាពជាក់ស្តែង ទីតាំងតំបន់នេះមានចំណោតទឹកហូរខ្លាំង ដែលអាចនឹងបន្តបាក់ស្រុតដោយសារការរអិលបាក់ដី និងថ្មភ្នំ ទ្រង់ទ្រាយធំនៅរដូវភ្លៀងខាងមុខប្រសិនបើមិនមានវិធានការណ៍ទប់ស្កាត់។ ដូចនេះក្រុមការងារបានស្នើឱ្យក្រុមហ៊ុនសិក្សាលម្អិតបន្ថែមទៀតផ្នែកវិស្វកម្មគំនូសប្លង់បច្ចេកទេសប្រព័ន្ធលំហូរ ដើម្បីពង្វាងចរន្តទឹក និងរៀបចំឯកសារស្នើសុំក្រសួង ស្ថាប័នពាក់ព័ន្ធពិនិត្យសម្រេច ជាពិសេសក្រសួងបរិស្ថាន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube