នៅព្រឹកថ្ងៃទី៣ ខែកុម្ភៈ ឆ្នាំ២០២៥ បន្ទាប់ពីអញ្ជើញពិនិត្យបណ្ដាការដ្ឋានសាងសង់ផ្លូវជាតិសំខាន់ៗមួយចំនួន ក្នុងនោះពិនិត្យគម្រោងលើកកម្រិតគុណភាពផ្លូវជាតិលេខ៤៨ ប្រវែងជាង១៤៨គីឡូម៉ែត្រ (ស្រែអំបិល-កោះកុង)ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនបានជួបសំណេះសំណាលជាមួយថ្នាក់ដឹកនាំ មន្ត្រីរាជការ បុគ្គលិក នៃមន្ទីរសាធារណការ និងដឹកជញ្ជូន ខេត្តកោះកុង។ ក្នុងជំនួបដ៏កក់ក្តៅ ឯកឧត្តម រដ្ឋមន្ត្រីក្រសួងសាធារណការ និងដឹកជញ្ជូន បានផ្តល់ការណែនាំដល់មន្ទីរសាធារណការ និងដឹកជញ្ជូនខេត្តកោះកុងត្រៀមខ្លួនឱ្យស្រេចលើតម្រូវការរបស់ខេត្តក្នុងការកែលម្អផ្លូវក្នុងខេត្តត្រៀមពិធីបុណ្យសមុទ្រនៅកោះកុង។ឯកឧត្តមបានលើកឡើងថា ផ្លូវជាតិ២ខ្សែដែលបុកចំខេត្តកោះកុងតារារះទិសនិរតី កំពុងលេចចេញវឌ្ឍនភាពដ៏ប្រសើរក្រៃលែង ត្រៀមខ្លួនរួចជាស្រេចទទួលបងប្អូនប្រជាពលរដ្ឋពីគ្រប់ទិសទីមកលេងបុណ្យសមុទ្រ និងទស្សនាខេត្តកោះកុងនៅចុងឆ្នាំ២០២៥ខាងមុខ។ ឯកឧត្តមរដ្ឋមន្រ្តីបានបញ្ជាក់ថា “គ្រប់គម្រោងអភិវឌ្ឍន៍ហេដ្ឋារចនាសម្ព័ន្ធ ត្រូវសិក្សាឲ្យបានគ្រប់ជ្រុងជ្រោយ ពីតម្រូវការសង្គមជាក់ស្តែង…” ស្របពេលវត្តមានឯកឧត្តមរដ្ឋមន្រ្តីក្រសួងសាធារណការកំពុងបំពេញបេសកកម្មការងារដោយធ្វើដំណើរតាមផ្លូវជាតិលេខ៤៨ ដែលកំពុងជំរុញការស្ថាបនាយ៉ាងមមាញឹកនោះ ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូនបានបញ្ជាក់ឱ្យដឹងថា គិតត្រឹមថ្ងៃទី៣ ខែកុម្ភៈ ឆ្នាំ២០២៥នេះ គម្រោងលើកកម្រិតគុណភាពផ្លូវជាតិលេខ៤៨ សម្រេចលទ្ធផល៨៣,១២ភាគរយ ។ អ្វីទៅគម្រោងលើកកម្រិតគុណភាពផ្លូវជាតិលេខ៤៨? ឯកឧត្តមអ្នកនាំពាក្យដដែលបានអធិប្បាយថា គម្រោងលើកកម្រិតគុណភាពផ្លូវជាតិលេខ៤៨មាន ប្រវែង ១៤៨,០៣គីឡូម៉ែត្រ ចាប់ពីPK0+000-១៤៨+០៣៨ ស្ថិតក្នុងភូមិអូរជ្រៅ ឃុំបឹងព្រាវ ស្រុកស្រែអំបិល-ក្រុងខេមរភូមិន្ទ ខេត្តកោះកុង ។ជាប្រភេទផ្លូវកម្រាលបេតុងកៅស៊ូ(AC)គ្រប់កំណាត់នៃការដ្ឋានគម្រោងលើកកម្រិតគុណភាពផ្លូវជាតិលេខ៤៨(ស្រែអំបិល-កោះកុង)។ ឯកឧត្តមអ្នកនាំពាក្យបន្ថែមថា ការដ្ឋាននេះកំពុងសម្រុកខ្លាំង ដើម្បីធានាសម្រេចវឌ្ឍនភាពតាមការគ្រោងទុកនៅដំណាច់រដូវប្រាំងឆ្នាំ២០២៥ខាងមុខនេះ។ ផ្លូវជាតិលេខ៤៨ គឺជាខ្សែផ្លូវដ៏សំខាន់ និងយុទ្ធសាស្ត្រ ប្រកបដោយសក្តានុពលសេដ្ឋកិច្ច ពាណិជ្ជកម្ម ដឹកជញ្ជូន ភស្តុភារកម្ម ទេសចរណ៍។ ខ្សែផ្លូវនេះដើរតួនាទី ជាសរសៃឈាមសេដ្ឋកិច្ចដ៏មានសក្តានុពលរបស់កម្ពុជា ក៏ដូចជាខេត្តកោះកុង ក្នុងការជួយសម្រួលដល់ការតភ្ជាប់ទំនាក់ទំនងគមនាគមន៍ និងការធ្វើសមាហរណកម្មតភ្ជាប់ផ្ទៃក្នុងប្រទេស ជាពិសេសកំពង់ផែទឹកជ្រៅនៅក្រុងព្រះសីហនុ សំដៅរួមចំណែកក្នុងការជំរុញការដោះដូរពាណិជ្ជកម្ម វិនិយោគ និងការដឹកជញ្ជូនដំណាំកសិផល និងកសិឧស្សាហកម្ម ឱ្យកាន់តែមានប្រសិទ្ធភាពខ្ពស់ ឆាប់រហ័ស និងចំណាយតិច៕