ប្រជាពលរដ្ឋសង្កាត់ផ្សារដេប៉ូទី ១ ស្នើសុំអាជ្ញាធរ សូមមេត្តាជួយជួសជុល និងពិនិត្យមើលកំណាត់ផ្លូវ ២៣៧ ដែលកំពុងកើតមានជង្ហុកជាបណ្ដើរៗ ដោយជង្ហុកទាំងនេះ តែងតែបង្កគ្រោះថ្នាក់ដល់អ្នកធ្វើដំណើរ។ជាក់ស្ដែងទីតាំងជង្ហុកនេះស្ថិតតាមបណ្ដោយផ្លូវលេខ ២៣៧ កែងផ្លូវទេពផន ស្ថិតក្នុងសង្កាត់ផ្សារដេប៉ូទី ១ ខណ្ឌទួលគោក រាជធានីភ្នំពេញ។លោក លី លីម និង អ្នកស្រី ណែត បានប្រាប់ កម្ពុជាថ្មី ឲ្យដឹងដូចគ្នាថា កំណាត់ផ្លូវខាងលើនេះ កាលពីមុនមិនមានការខូចខាតនោះទេ។ ក្រោយផុតរដូវភ្លៀង ផ្លូវនេះ ចាប់ផ្ដើមខូចបន្តិចម្ដងៗ យូរៗ ទៅ កើតជាជង្ហុកបន្តិចម្ដងៗ មិនឃើញមានអាជ្ញាធរចុះធ្វើការពិនិត្យ ឬក៏ជួសជុលនោះទេ ដោយជង្ហុកទាំងនេះ តែងបង្កគ្រោះថ្នាក់ដល់ប្រជាពលរដ្ឋដែលធ្វើដំណើរមើលមិនឃើញ ជាពិសេសនៅពេលយប់។ពាក់ព័ន្ធបញ្ហាផ្លូវខាងលើនេះ អ្នកស្រី ណែត បានសំណូមពរដល់អាជ្ញាធរពាក់ព័ន្ធ សូមមេត្តាជួយចុះពិនិត្យមើល ឬក៏ជួសជុលឡើងវិញផង ដើម្បីការពារកុំឲ្យមានប្រជាពលរដ្ឋគ្រោះថ្នាក់ដោយសារជង្ហុកនេះបន្តទៀត។ដោយឡែក លោកស្រី ពៅ សាម៉ោច ចៅសង្កាត់ផ្សារដេប៉ូទី ១ ក៏បានបញ្ជាក់ប្រាប់ កម្ពុជាថ្មី ឲ្យដឹងដែរថា ចំពោះបញ្ហានេះ លោកស្រី បានរាយការណ៍ទៅកាន់សាលាខណ្ឌរួចរាល់ហើយ ដោយនៅពេលនេះ រដ្ឋបាលសង្កាត់ កំពុងជួសជុលផ្លូវខូចៗ នៅផ្លូវផ្សេងទៀត។ ទោះបីជាយ៉ាងណា លោកស្រី នឹងចាត់មន្ត្រីនៅសាលាសង្កាត់ ចុះទៅជួសជុលជាបន្ទាន់ ដើម្បីការពារគ្រោះថ្នាក់ណាមួយកើតឡើង៕