សិក្ខាសាលាពិគ្រោះយោបល់ និងប្រមូលធាតុចូលអំពីការរៀបចំច្បាប់ស្តីពីការអភិវឌ្ឍ និងគ្រប់គ្រងវិស័យភស្តុភារកម្មនៅកម្ពុជា រាជធានីភ្នំពេញ ៖ នៅថ្ងៃទី១២ ខែធ្នូ ឆ្នាំ២០២៤ លោកជំទាវ ហួត លីដា អនុរដ្ឋលេខាធិការ តំណាង ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់ និងប្រមូលធាតុចូលអំពីការរៀបចំច្បាប់ស្តីពីការអភិវឌ្ឍ និងគ្រប់គ្រងវិស័យភស្តុភារកម្មនៅកម្ពុជា ដោយមានការអញ្ជើញចូលរួមពី ឯកឧត្តមអគ្គនាយក នៃអគ្គនាយកដ្ឋានភស្តុភាកម្ម លោក-លោកស្រី ថ្នាក់ដឹកនាំ មន្ត្រីរាជកា គ្រប់អង្គភាពពាក់ព័ន្ធក្រោមឱវាទក្រសួង ជាច្រេីនរូប។ សិក្ខាសាលានេះ រៀបចំឡើងក្នុងគោលបំណង (១).ពិគ្រោះយោបល់ ប្រមូលធាតុចូល និងឈានដល់ ការរៀបចំច្បាប់ស្តីពីការអភិវឌ្ឍ និងគ្រប់គ្រងវិស័យភស្តុភារកម្មនៅកម្ពុជា, (២).ចែករំលែកនូវរបាយការណ៍សិក្សាស្តីពីស្ថានភាពបទប្បញ្ញត្តិវិស័យដឹកជញ្ជូន និងភស្តុភារកម្មនៅប្រទេសកម្ពុជា និងក្នុងតំបន់, (៣).ជំរុញការអនុវត្តផែនការមេឱ្យកាន់តែមានប្រសិទ្ធភាព និងប្រសិទ្ធផលខ្ពស់ ដើម្បីទាក់ទាញការវិនិយោគសំដៅជំរុញការអភិវឌ្ឍន៍សេដ្ឋកិច្ចជាតិ។ ជាលទ្ធផលដែលទទួលបានពីពិធីនេះ ឃើញថាមានការចូលរួមមតិយោបល់ និងចែករំលែកបទពិសោធន៍យ៉ាងផុលផុសពីថ្នាក់ដឹកនាំអគ្គនាយកដ្ឋានជំនាញ និងអ្នកចូលរួមមកពីគ្រប់អង្គភាពពាក់ព័ន្ធក្រោមឱវាទក្រសួង ហើយជាមួយគ្នានោះដែរអគ្គនាយកដ្ឋានភស្តុភាកម្ម និងលើកយក រាល់មតិយោបល់ សំណួរ សំណូមពរ ដែលបានលើកពិភាក្សា នៅក្នុងសិក្ខាសាលា ដាក់ជារបាយការណ៍ជូនថ្នាក់ដឹកនាំ ជ្រាប និងពិនិត្យ វាយតម្លៃផងដែរ៕