(ភ្នំពេញ)៖ កម្មវិធីយល់ដឹងអំពីទ្រឹស្ដីនៃការបើកបរ (Cambodia Driving Rules) ដែលបង្កើតឡើងដោយក្រសួងសាធារណការ និងដឹកជញ្ជូន គឺជាកម្មវិធីបច្ចេកវិទ្យានៅលើទូរសព្ទដៃ និងគេហទំព័រសម្រាប់ប្រជាពលរដ្ឋឈ្វេងយល់បន្ថែមអំពីទ្រឹស្ដីនៃការបើកបរ ដោយសាធារណជន អាចទាញយកទៅប្រើប្រាស់ដោយឥតគិតថ្លៃតាមរយៈ ទូរសព្ទដៃ និងកុំព្យូទ័រ។ កម្មវិធីយល់ដឹងអំពីទ្រឹស្ដីនៃការបើកបរ បានផ្ដល់ភាពងាយស្រួល និងអត្ថប្រយោជន៍ដ៏សម្បូរបែបដល់ប្រជាពលរដ្ឋ យល់ដឹងអំពីទ្រឹស្ដីនៃការបើកបរ លិខិតបទដ្នានគតិយុត្តិ និងចែករំលែកចំណេះដឹងទាក់ទងនឹងច្បាប់ចរាចរណ៍ផ្លូវគោក ការលេងកំសាន្ត ជាពិសេសអនុញ្ញាតឱ្យបេក្ខជនធ្វើការប្រឡងសាកល្បង មុនពេលធ្វើការប្រឡងផ្លូវការផងដែរ។ របៀបទាញយក និងប្រើប្រាស់ លោកអ្នកគ្រាន់តែចូលទៅកាន់ Play Store សម្រាប់អ្នកប្រើប្រាស់ទូរសព្ទ Android ឬ App Store សម្រាប់អ្នកប្រើប្រាស់ iOS ដោយវាយពាក្យថា «Cambodia Driving Rules» ដើម្បីទាញយកកម្មវិធី។ បន្ទាប់ពីទាញយកកម្មវិធី សូមចូលទៅកាន់កម្មវិធី (App) ចុចទៅលើពាក្យចាប់ផ្ដើម និងវាយឈ្មោះរបស់លោកអ្នក បន្ទាប់មកជ្រើសរើសភាសាដែលលោកអ្នកពេញចិត្ត និងចុចលើសម្លេងនិយាយ បិទឬបើកនោះរួចជាការស្រេច។ ឬលោកអ្នកអាចចូលទៅកាន់គេហទំព័រ https://dr.mpwt.gov.kh/ សូមប្រើប្រាស់ដូចមានក្នុងការណែនាំ ៕