កិច្ចប្រជុំតាមដានការអនុវត្តការងារត្រួតពិនិត្យយានយន្តកែច្នៃខុសលក្ខណៈបច្ចេកទេសខេត្តកំពង់ធំ និងខេត្តព្រះវិហារ ក្រោមអធិបតីភាព ឯកឧត្តម សេង ឈួន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេស ខេត្តកំពង់ធំ និងព្រះវិហារ ៖ នៅថ្ងៃអង្គារ ទី១៩ ខែវិច្ឆិកា ឆ្នាំ២០២៤ នៅមន្ទីរសាធារណការ និងដឹកជញ្ជូនខេត្តកំពង់ធំ និងខេត្តព្រះវិហារ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេស អមដំណើរដោយ ឯកឧត្តម ម៉ី ម៉ារ៉ាឌី អនុរដ្ឋលេខាធិការ និងជាអនុប្រធានអចិន្ត្រៃយ៍ក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេស បានអញ្ជើញជាអធិបតីក្នុងកិច្ចប្រជុំតាមដានការអនុវត្តការងារត្រួតពិនិត្យយានយន្តកែច្នៃខុសលក្ខណៈបច្ចេកទេសនៅខេត្តកំពង់ធំ និងខេត្តព្រះវិហារ។ នៅខេត្តកំពង់ធំ មានការចូលរួមពី ឯកឧត្តម ព្រឹម រដ្ឋា អភិបាលរងនៃគណៈអភិបាលខេត្តកំពង់ធំ ប្រធាន អនុប្រធាននាយកដ្ឋាន ប្រធាន អនុប្រធានមន្ទីរសាធារណការ និងដឹកជញ្ជូនខេត្តកំពង់ធំ នាយការិយាល័យកងរាជអាវុធហត្ថខេត្ត នាយសេនាធិការរងកងរាជអាវុធហត្ថខេត្ត នាយករងការិយាល័យចរាចរណ៍នៃស្នងការដ្ឋាននគរបាលខេត្តកំពង់ធំ អនុប្រធានការិយាល័យច្បាប់សាលាខេត្តកំពង់ធំ ប្រធាន អនុប្រធានការិយាល័យមន្ទីរសាធារណការ និងដឹកជញ្ជូនខេត្តកំពង់ធំ និងមន្រ្តីពាក់ព័ន្ធជាច្រើនរូបច្រើនរូប។ នៅខេត្តព្រះវិហារ មានការចូលរួមពី ឯកឧត្តម អ៊ុក គឹមសាន អភិបាលរងនៃគណៈអភិបាលខេត្តព្រះវិហារ លោកស្នងការរងនគរបាលខេត្ត បញ្ជាការរងកងរាជអាវុធហត្ថខេត្ត អភិបាលរងស្រុក ប្រធាននាយកដ្ឋាន អនុប្រធាននាយកដ្ឋាន ប្រធាន មន្ទីរសាធារណការ និងដឹកជញ្ជូនខេត្តព្រះវិហារ នាយករងការិយាល័យនគរបាលខេត្ត អនុប្រធានមន្ទីរសាធារណការ និងដឹកជញ្ជូនខេត្តព្រះវិហារ ប្រធាន អនុប្រធានការិយាល័យស្រុក ប្រធាន អនុប្រធានការិយាល័យមន្ទីរសាធារណការ និងដឹកជញ្ជូនខេត្តព្រះវិហារ ក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសថ្នាក់ជាតិនិងមន្រ្តីពាក់ព័ន្ធជាច្រើនរូប។ កិច្ចប្រជុំនេះ រៀបចំឡើងក្នុងគោលបំណងផ្សព្វផ្សាយសេចក្តីសម្រេចលេខ ០៣១/២៤ ចុះថ្ងៃទី៨ ខែសីហា ឆ្នាំ២០២៤ ស្តីពីការតែងតាំងសមាសភាពក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេស និងតាមដានការអនុវត្តការងាររបស់ រាជធានី ខេត្ត ពាក់ព័ន្ធនឹងការងារត្រួតពិនិត្យយានយន្តកែច្នៃខុសលក្ខណៈបច្ចេកទេស។ ឯកឧត្តមប្រធានក្រុមការងារ បានណែនាំឱ្យបន្តការអនុវត្តបទបញ្ជាដ៏ម៉ឺងម៉ាត់របស់ប្រមុខរដ្ឋាភិបាល ក្នុងការត្រួតពិនិត្យយានយន្តកែច្នៃខុសលក្ខណៈបច្ចេកទេសនេះ ដើម្បីលុបបំបាត់ឱ្យបាននូវប្រភពមូលហេតុនៃដឹកលើសទម្ងន់កំណត់។ ឯកឧត្តមប្រធាន បានកោតសរសើរ ចំពោះក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសខេត្តកំពង់ធំ និងខេត្តព្រះវិហារ ដែលបានអនុវត្តការងាររបស់ខ្លួន មិនខ្លាចនឿយហត់ និងឥតឈប់ឈរ ក្នុងគោលដៅទប់ស្កាត់គ្រោះថ្នាក់ចរាចរណ៍ផ្លូវគោក និងការខូចខាតផ្លូវថ្នល់ បង្កដោយការដឹកលើសទម្ងន់កំណត់ និងយានយន្តកែច្នៃខុសលក្ខណៈបច្ចេកទេស។ ឯកឧត្តមប្រធានក្រុមការងារ បានផ្តល់អនុសាសន៍ដល់ក្រុមការងារថា្នក់ខេត្ត ចុះបិទស្ទីកឃ័រចំណាំងផ្លាតលើគោយន្តកន្ត្រៃ និងយានយន្តកសិកម្មផ្សេងៗ មិនមានភ្លើងបំភ្លឺ ហើយតែងតែធ្វើចរាចរណ៍លើដងផ្លូវនាពេលយប់ ដែលមានហានិភ័យខ្ពស់ងាយនឹងបង្កគ្រោះថ្នាក់ចរាចរណ៍ជាយថាហេតុ។ ក្រុមការងារថ្នាក់ជាតិ បានស្នើដល់ក្រុមការងារខេត្តចំនួន ៥ចំណុច រួមមាន៖ ១.) ស្នើឱ្យចុះអនុវត្តការងារឱ្យបានយ៉ាងតិច ១ដងក្នុង១សប្តាហ៍ ២.) ស្នើផ្តល់ទីតាំងកូអរដោនេចុះអនុវត្តសកម្មភាពត្រួតពិនិត្យរថយន្តកែច្នៃខុសលក្ខណៈបច្ចេកទេសក្នុងភូមិសាស្ត្រខេត្តរបស់ខ្លួនដើម្បីងាយស្រួលតាមដានការអនុវត្តការងារ ៣.) ស្នើឱ្យអាជ្ញាធរមានសមត្ថកិច្ច ចុះបិទយានដ្ឋានដែលមិនមានច្បាប់អនុញ្ញាត ៤.) ស្នើឱ្យស្វែងរកយានដ្ឋានដែលមានអាជ្ញាបណ្ណ និងលក្ខណៈសម្បត្តិសមស្របដើម្បីធ្វើជាដៃគូក្នុងការកែយានយន្តខុសលក្ខណៈបច្ចេកទេសនោះឱ្យបានត្រឹមត្រូវតាមច្បាប់កំណត់វិញ និង ៥.) ស្នើផ្តល់នូវសេចក្តីសម្រេច (ថ្មី) ស្តីពីការកែសម្រួលសមាភាពក្រុមការងារកែច្នៃខុសលក្ខណៈបច្ចេកទេសខេត្តមកក្រុមការងារលខាធិការដ្ឋាន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube