ក្រសួងសាធារណការ និងដឹកជញ្ជូន បើកវគ្គបណ្ដុះបណ្ដាលលើជំនាញ ស្តីពីពិធីការជាតិ ពិធីការការទូត និងការរៀបចំបែបបទលិខិតរដ្ឋបាលផ្ទៃក្នុងក្រសួង និងវិធីសាស្ត្រសរសេរសំណើគម្រោង ដើម្បីបង្កើនសមត្ថភាពដល់មន្ត្រីរាជការ ទីស្តីការក្រសួង៖ នាព្រឹកថ្ងៃព្រហស្បតិ៍ ទី៧ ខែវិច្ឆិកា ឆ្នាំ២០២៤ ឯកឧត្តម ប៉ាល់ ចន្ទតារា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីបើកវគ្គបណ្តុះបណ្តាល ស្តីពីពិធីការជាតិ ពិធីការការទូត និងការរៀបចំបែបបទលិខិតរដ្ឋបាលផ្ទៃក្នុងក្រសួង និងវិធីសាស្ត្រសរសេរសំណើគម្រោង ដោយមានការអញ្ជើញចូលរួមពីថ្នាក់ដឹកនាំក្រសួង និងសិក្ខាកាមជាមន្រ្តីរាជការក្រសួងមកពីអង្គភាពរដ្ឋបាលថ្នាក់កណ្តាល និងមន្ទីរសាធារណការ និងដឹកជញ្ជូនរាជធានី ខេត្ត សរុបប្រមាណ ១៨០នាក់។ វគ្គបណ្ដុះបណ្ដាលនេះរៀបចំឡើងក្នុងគោលបំណងជាចម្បង ផ្តល់នូវពុទ្ធិ ជំនាញ និងបច្ចេកទេសស៊ីជម្រៅ ទាំងផ្នែកទ្រឹស្តី និងការអនុវត្តផ្ទាល់ជូនដល់សិក្ខាកាមជាមន្រ្តីបង្គោល ឱ្យបានយល់ដឹងបន្ថែមលើការងារពាក់ព័ន្ធនឹងការរៀបចំផ្នែកពិធីការជាតិ ពិធីការការទូត ការទទួលបដិសណ្ឋារកិច្ច និងការផ្សព្វផ្សាយពន្យល់បន្ថែមអំពីគំរូនៃការតាក់តែងលិខិតរដ្ឋបាលផ្ទៃក្នុងក្រសួង ដែលបានដាក់ចេញឱ្យអនុវត្តនាពេលកន្លងមក រួមជាមួយនឹងការបង្ហាត់បង្ហាញនូវបែបបទ និងវិធីសាស្រ្តក្នុងការសរសេរសំណើគម្រោងផ្សេងៗឱ្យស្របតាមស្តង់ការ និងគោលការណ៍ណែនាំផ្សេងៗ ដែលមានកន្លងមក។ វគ្គបណ្ដុះបណ្ដាលនេះ បាន និងកំពុងប្រព្រឹត្តទៅរយៈពេល៤ថ្ងៃ គឺនៅថ្ងៃទី ៧-៨ ខែវិច្ឆិកា ឆ្នាំ២០២៤ និងថ្ងៃទី២០-២១ ខែវិច្ឆិកា ឆ្នាំ២០២៤ ដោយមានការចូលរួមធ្វើបទបង្ហាញពីវាគ្មិនកិត្តិយស និងគ្រូឧទ្ទេសលោកបណ្ឌិត ឥន សុផល អនុប្រធានវិទ្យាស្ថានជាតិការទូត និងទំនាក់ទំនងអន្តរជាតិ នៃក្រសួងការបរទេស និងសហប្រតិបត្តិការអន្តរជាតិ និងអ្នកជំនាញនៃអង្គការ JICA ប្រចាំនៅកម្ពុជាផងដែរ ដើម្បីចែករំលែកនូវចំណេះដឹង និងបទពិសោធន៍ ជូនដល់សិក្ខាកាមដែលជាមន្រ្តីបង្គោលរបស់ក្រសួងសាធារណការ និងដឹកជញ្ជូន។ ថ្លែងក្នុងពិធីបើកសិក្ខាសាលា ឯកឧត្តមគណៈអធិបតី សង្ឃឹមយ៉ាងមុតមាំថា ក្រោយពីបានសិក្សាវគ្គបណ្ដុះបណ្ដាលនេះ សិក្ខាកាមទាំងអស់នឹងទទួលបាននូវចំណេះដឹងជាមូលដ្ឋានគ្រឹះបន្ថែមក្នុងការងារពិធីការជាតិ ពិធីការការទូត និងការរៀបចំបែបបទតាក់តែងលិខិតរដ្ឋបាលផ្ទៃក្នុងក្រសួង និងវិធីសាស្ត្រក្នុងការសរសេរសំណើគម្រោង យកទៅអនុវត្តក្នុងអង្គភាពរបស់ខ្លួនប្រកបដោយប្រសិទ្ធភាព ស័ក្តិសិទ្ធភាព និងគណនេយ្យភាព៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube