លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឲ្យដឹងនៅព្រឹកថ្ងៃទី៧ វិច្ឆិកា នេះថា បើគ្មានការប្រែប្រួលដោយប្រការចៃដន្យណាមួយទេ មន្ត្រីជំនាញនឹងបើកឲ្យដំណើរការចរាចរណ៍លើផ្លូវជាតិលេខ៣ ពេញលេញជាប្រក្រតីឡើយវិញ។ ការប្រកាសរបស់អ្នកនាំពាក្យរូបនេះ ក្រោយពីស្ថានភាពទឹកលិចកំណាត់ផ្លូវជាតិលេខ៣ បានស្រកផុតពីតួផ្លូវជាតិជាស្ថាបពរ។អ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់ថា គិតត្រឹមវេលាម៉ោង៧ព្រឹក ថ្ងៃទី៧ ខែវិច្ឆិកា ឆ្នាំ២០២៤នេះ ស្ថានភាពទឹកលិចកំណាត់ផ្លូវជាតិលេខ៣ បានស្រកផុតពីតួផ្លូវជាតិជាស្ថាបពរ ដោយឡែកត្រង់ចន្លោះគីឡូម៉ែត្រលេខ៤៣-៤៤(ផ្សារត្រាំខ្នាំ)បន្តបិទសម្រាប់រថយន្តធំជាបណ្តោះអាសន្នមួយព្រឹកទៀតនៅឡើយ ដើម្បីបង្ការការខូចខាតផ្លូវ ព្រោះគ្រឹះផ្លូវនៅសើមជ្រាយនៅឡើយ។ ប៉ន្តែលោកបានបញ្ជាក់បន្ថែមថា នៅវេលាម៉ោង១និង០០រសៀលថ្ងៃទី៧ ខែវិច្ឆិកានេះ បើគ្មានការប្រែប្រួលដោយប្រការចៃដន្យណាមួយទេ យើងនឹងបើកឲ្យដំណើរការចរាចរណ៍ពេញលេញជាប្រក្រតីឡើយវិញ។សូមជម្រាបថា កាលពីថ្ងៃទី៥ ខែវិច្ឆិកា ឆ្នាំ២០២៤កន្លងទៅ មន្ត្រីជំនាញបានប្រកាសផ្អាកចរាចរណ៍រថយន្ដដឹកទំនិញធុនធ្ងន់គ្រប់ប្រភេទឆ្លងកាត់ផ្លូវជាតិលេខ៣ ជាបណ្ដោះអាសន្ន ដើម្បីបង្ការគ្រោះថ្នាក់ជាយថាហេតុ និងទប់ស្កាត់ការខូចខាតហេដ្ឋារចនាសម្ព័ន្ធ ផ្លូវថ្នល់ ស្ពាន បន្ទាប់ពីជំនន់ទឹកភ្លៀងបានហូរកាត់ផ្លូវជាតិលេខ៣ ត្រង់ចំណុចចន្លោះគីឡូម៉ែត្រលេខម៤១ ដល់គីម៉ែត្រលេខ៤៣ (ផ្សារត្រាំខ្នារ) ស្ថិតក្នុងស្រុកគងពិសី និងចន្លោះគីឡូម៉ែត្រលេខ៥៣ ដល់ គីឡូម៉ែត្រលេខ ៥៥ (ផ្សារប៉ាង្គសី) ស្ថិតក្នុងស្រុកបសេដ្ឋ ខេត្តកំពង់ស្ពឺ។ក្នុងសេចក្ដីប្រកាសនោះ មន្ត្រីជំនាញក៏បានអំពាវនាវឲ្យម្ចាស់រថយន្ត ក៏ដូចជាអ្នកបើកបររថយន្ដដឹកទំនិញធុនធ្ងន់ទាំងអស់ដែលធ្វើចរាចរណ៍ពីរាជធានីភ្នំពេញ ឆ្ពោះទៅខេត្តកំពត និងសម្រាប់ទិសដៅពីខេត្តកំពតឆ្ពោះទៅរាជធានីភ្នំពេញ សូមធ្វើដំណើរវាងតាមផ្លូវជាតិលេខ២២ ឆ្ពោះទៅផ្លូវជាតិលេខ២ (ស្តុបអង្គតាសោម-ក្រុងដូនកែវ) ឬវាងទៅតាមផ្លូវជាតិលេខ៤១ ជាបណ្តោះអាសន្នសិន៕