ខេត្តកំពង់ស្ពឺ៖ ក្រោយជំនន់ទឹកភ្លៀងរដូវវស្សាចុងឆ្នាំ២០២៤ ចាប់ផ្តើមធ្លាក់ក្នុងកម្រិតមធ្យមទៅច្រើន កម្រិតទឹកភ្លៀងបានធ្វើឱ្យកំណាត់ផ្លូវជាតិលេខ៣ ក្នុងខេត្តកំពង់ស្ពឺទទួលរងនូវការជន់លិច ជាហេតុនាំឱ្យប៉ះពាល់ដល់ការធ្វើដំណើរ។ មន្ទីរសាធារណការ និងដឹកជញ្ជូន នារសៀលថ្ងៃចន្ទនេះ សម្រេចផ្អាកចរាចរចំពោះរថយន្តធុនធំជាបណ្តោះអាសន្ន ដើម្បីបង្ការគ្រោះថ្នាក់…។សេចក្តីជូនដំណឹងស្តីពី«ការផ្អាកចរាចររថយន្តដឹកទំនិញធុនធ្ងន់គ្រប់ប្រភេទ លើកំណាត់ផ្លូវជាតិលេខ៣ ក្នុងភូមិសាស្ត្រខេត្តកំពង់ស្ពឺជាបណ្តោះអាសន្ន» ចេញនៅថ្ងៃទី៤ ខែវិច្ឆិកា បានឱ្យដឹងថា ជំនន់ទឹកភ្លៀងនេះបណ្តាលមកពីទឹកភ្លៀងចុងឆ្នាំក្នុងរដូវវស្សាឆ្នាំ២០២៤ បានចាប់ផ្តើមធ្លាក់ក្នុងកម្រិតមធ្យមទៅច្រើន ជាហេតុបង្កឱ្យមានទឹកជន់លិចនៅតាមកំណាត់ផ្លូវជាតិលេខ៣ ចន្លោះគីឡូម៉ែត្រ៤១ ដល់គីឡូម៉ែត្រ៤៣ (ផ្សារត្រាំខ្នារ) ស្ថិតក្នុងស្រុកគងពិសី និងចន្លោះគីឡូម៉ែត្រ៥៣រហូតដល់គីឡូម៉ែត្រ៥៥ (ផ្សារប៉ាង្គសី) ស្ថិតក្នុងស្រុកបសេដ្ឋ ខេត្តកំពង់ស្ពឺ។ ស្ថានភាពបែបនេះ ធ្វើឱ្យផ្លូវថ្នល់ និងស្ពាន មិនអាចទ្រនឹងទម្ងន់របស់រថយន្តដឹកទំនិញធុនធ្ងន់បាន។ដើម្បីបង្ការគ្រោះថ្នាក់ជាយថាហេតុ និងទប់ស្កាត់ការខូចខាតហេដ្ឋារចនាសម្ព័ន្ធផ្លូវថ្នល់-ស្ពាន មន្ទីរសាធារណការ និងដឹកជញ្ជូន សម្រេចធ្វើការផ្អាកចរាចររថយន្តដឹកទំនិញធុនធ្ងន់គ្រប់ប្រភេទជាបណ្តោះអាសន្ន នៅលើកំណាត់ផ្លូវជាតិខាងលើ ចាប់ពីថ្ងៃជូនដំណឹងនេះ រហូតដល់មានសេចក្តីជូនដំណឹងសាជាថ្មី។ ទោះយ៉ាងណាមន្ទីរ បានគូសបញ្ជាក់យ៉ាងដូច្នេះថា៖«សូមបងប្អូនប្រជាពលរដ្ឋ ជាម្ចាស់រថយន្តដឹកទំនិញធុនធ្ងន់ទាំងអស់ដែលធ្វើចរាចរពីរាជធានីភ្នំពេញ ឆ្ពោះទៅខេត្តកំពត និងសម្រាប់ទិសដៅពីខេត្តកំពតឆ្ពោះទៅរាជធានីភ្នំពេញ សូមធ្វើដំណើរវាងតាមផ្លូវជាតិលេខ២ ឬវាងទៅតាមផ្លូវជាតិលេខ៤១ ជាបណ្តោះអាសន្នសិន»។ស្ថានភាពនៃជំនន់ទឹកភ្លៀងរយៈពេលប៉ុន្មានថៃ្ងចុងក្រោយនេះ បង្កឱ្យមានការជន់លិចដល់កំណាត់ផ្លូវជាតិលេខ៣ ក្នុងស្រុកគងពិសី និងព្រំប្រទល់ស្រុកបសេដ្ឋ ខេត្តកំពង់ស្ពឺ បានបណ្ដាលឱ្យលិចផ្លូវជាតិមកដល់ព្រឹកថ្ងៃទី៤ ខែវិច្ឆិកា ឆ្នាំ២០២៤នេះ៕