ស្ទឹងត្រែង៖ ផ្លូវក្រួសក្រហមចេញពីចំណុចដុងក្រឡ ចូលទៅកាន់ស្រុកសៀមប៉ាង មានប្រវែងជាង៥០ គីឡូម៉ែត្រ នៅខែវស្សានេះ រងការខូចខាតយ៉ាងធ្ងន់ធ្ងរ ដោយសាជំនន់ទឹកភ្លៀង និង ថយន្តធំៗមួយចំនួនដឹកលើសទំងន់ បង្កឲ្យខូចយ៉ាងធ្ងន់ធ្ងរ អាចបង្កគ្រោះថ្នាក់ដល់ការធ្វើចារចរណ៍ដល់ប្រជាពលរដ្ឋ ។ នៅថ្ងៃទី០៤ ខែកញ្ញា ឆ្នាំ២០១៨នេះ លោកស្រី កែវ ចន្ថា កសិករនៅភូមិសំរោង ឃុំស្រែសំបូរ បានបញ្ជាក់ថា ប្រជាពលរដ្ឋនៅក្នុងភូមិ ឃុំនេះ មានបញ្ហាប្រឈមខ្លាំងគឺផ្លូវធ្វើដំណើរតែម្តង ព្រោះថាកសិករ​យើងផលិតបាន កសិផលដឹកទៅមិនដល់ទីផ្សារទេ ឈ្មួញក៏មិនមកទិញដូចជា ពោត សណ្តែក ស្រូវ ល្ង ជាដើម ហើយគាប់ជួនពេលខ្លះផ្លូវដ៏លំបាកនេះ វាបានបង្កគ្រោះថ្នាក់ចរាចរណ៍បន្ថែម​ទៀត ។ លោស្រីថា​ ការព្រួយបារម្ភមួយទៀតនោះគឺពេលមានជម្ងឺឈើស្កាត់ទៅមុខមិនរួច ថយក្រោយក៏មិនបាន ដូចនេះសូមឱ្យអាជ្ញាធរពាក់ព័ន្ធមកជួយមើលឱ្យឃើញផងចុះ បើមិនបានជួសជុលទេនោះ។ លោក ណយ ខុង មេឃុំព្រែកមាស​បាន​ទទួលស្គាល់ថាៈ ផ្លូវនេះពិតជាមាន​ភាពលំបាក​មែន ប្រជាពលរដ្ឋធ្វើដំណើរ ទាំងរថយន្ត និោង​ម៉ូតូ ​ដែល​ធ្លាប់​បើកបររយៈពេល​តែ២​ម៉ោង​ បច្ចុប្បន្នត្រូវចំណាយពេលជិត១​ថ្ងៃទើប​ទៅដល់​គោល​ដៅ ។ លោកបន្តថា ផ្លូវនេះមិនត្រឹមតែបង្កើនភាពលំបាកដល់ប្រជាពលរដ្ឋទេ វាបង្កឲ្យខូច​រថយន្ត ម៉ូតូ ដែលបើកបរឆ្លងកាត់តាមផ្លូវនេះ បន្ថែមទៀតហើយតម្រូវឲ្យប្រជា​ពលរដ្ឋ​ចំ​ណាយថវិកាច្រើនទ្វេរដង ។ លោក​សំណូមពរដល់អាជ្ញាធរពាក់ព័ន្ធ ​​គួរតែមកឈូសឆាយសម្រួលឲ្យបានស្រួលជាងនេះ ដើម្បីបងប្អូនប្រជាពលរដ្ឋយើង​បានធ្វើ​ដំណើរ​​ចេញចូលចៀសផុតពីគ្រោះថ្នាក់​ ហើយអ្នកជម្ងឺឬស្ត្រីមានផ្ទៃពោះទៅពេទ្យក៏បានឆាប់។ លោក ព្រំ ចន្ថា ប្រធានមន្ទីរអភិវឌ្ឍន៍ជនបទខេត្តបានបញ្ជាក់ថា ផ្លូវនេះមន្ទីរបានធ្វើសំ​ណើរ​សុំការ​ជួយជុលឡើងវិញនិងសាងសង់ថ្មីទៅក្រសួងរួចហើយ តែមិនទាន់ទទួលបាន​នូវដំណោះ​ស្រាយយ៉ាងណានោះទេ។ លោកបន្តថា តែទោះជាយ៉ាងណាក៏ដោយនៅរដូវប្រាំងនេះ ក្រុមបច្ចេកទេសនឹងធ្វើការកែសម្រួលជូនបងប្អូនប្រជាពលរដ្ឋសម្រាប់ធ្វើដំណើរ។