ពិព័រណ៍មុខវិជ្ជា និងការងារមេគង្គ ២០២៤ ក្រោមប្រធានបទ "ទេពកោសល្យ និងចំណូលចិត្តការងារក្នុងសម័យបច្ចេកវិទ្យា" (Mekong Major and Career Fest) ត្រូវបានបើកចាប់ពីថ្ងៃទី២៥-២៧ ខែតុលា ឆ្នាំ២០២៤ នេះហើយ ភ្នំពេញ៖ នារសៀលថ្ងៃសុក្រ ទី២៥ ខែតុលា ឆ្នាំ២០២៤ ឯកឧត្ដម នឹម សុធា អនុរដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្ដម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកមហោស្រពពិព័រណ៍មុខវិជ្ជា និងការងារមេគង្គ ឆ្នាំ២០២៤ ក្រោមប្រធានបទ "ទេពកោសល្យ និងចំណូលចិត្តការងារក្នុងសម័យបច្ចេកវិទ្យា" ដោយមានការចូលរួមពីវាគ្មិនកិត្តិយស ដែលអញ្ជើញមកពីតំណាងក្រសួង ស្ថាប័ន និងសិស្ស និស្សិត ជាច្រើនរូប។ ពិព័រណ៍មុខវិជ្ជា និងការងារមេគង្គប្រចាំ ឆ្នាំ២០២៤ នេះជាវេទិកាពិភាក្សាបើកចំហពីវាគ្មិនជំនាញជាតំណាងក្រសួង ក្រុមហ៊ុនឯកជន អង្គការស្ថាប័ន និងគ្រឹះស្ថានសិក្សានានា ក្នុងការចែករំលែកនូវចំណេះដឹង ប្រវត្តិការសិក្សា បទពិសោធន៍ការងារ ដើម្បីទទួលបានភាពជោគជ័យក្នុងអាជីព ឬអាជីវកម្មរបស់ខ្លួន ដែលនេះគឺជាផ្នែកដ៏សំខាន់ក្នុងការផ្ដល់ដល់សិស្សានុសិស្សក្នុងការជ្រើសរើសមុខវិជ្ជាសិក្សាឱ្យបានត្រឹមត្រូវ ការហាត់ការនៅតាមតាមក្រុមហ៊ុន ក្រសួង ស្ថាប័ន ដែលខ្លួនពេញចិត្ត និងឱកាសទទួលបានអាហារូបករណ៍ក្នុង និងក្រៅប្រទេសផងដែរ ។ ថ្លែងក្នុងពិធីបើកពិព័រណ៍មុខវិជ្ជា និងការងារមេគង្គ ២០២៤ ឯកឧត្ដមអនុរដ្ឋលេខាធិការ បានគូសបញ្ជាក់អំពីសារៈសំខាន់របស់កម្មវិធី បានដើរស្របនឹងគោលនយោបាយរបស់រាជរដ្ឋាភិបាល អាណត្តិទី៧ ដែលផ្ដោតជាសំខាន់លើគន្លឹះអាទិភាពចំនួន៥ រួមមាន៖ មនុស្ស ផ្លូវ ទឹក ភ្លើង និងបច្ចេកវិទ្យា ដើម្បីសម្រេចបាននូវចក្ខុវិស័យនៃការប្រែក្លាយកម្ពុជាឱ្យទៅជាប្រទេសចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube