កិច្ចប្រជុំស្តីពីការពង្រឹងការងារត្រួតពិនិត្យលក្ខណៈបច្ចេកទេសយានជំនិះ(ឆៀក) ទីស្ដីការក្រសួង៖ នាថ្ងៃពុធ ទី២៥ ខែកញ្ញា ឆ្នាំ២០២៤ ឯកឧត្ដម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក បានអញ្ជើញដឹកនាំកិច្ចប្រជុំស្តីពីការពង្រឹងការងារត្រួតពិនិត្យលក្ខណៈបច្ចេកទេសយានជំនិះ ដោយមានការចូលរួមពី លោកអគ្គនាយករង លោកស្រីប្រធាននាយកដ្ឋាន អនុប្រធាន នៃនាយកដ្ឋានដឹកជញ្ជូនផ្លូវគោក ប្រធានការិយាល័យត្រួតពិនិត្យលក្ខណៈបច្ចេកទេសយានជំនិះ តំណាងមន្រ្តីជំនាញនៃមន្ទីរសាធារណការ និងដឹកជញ្ជូនខេត្ត ទទួលបន្ទុកលើការងារត្រួតពិនិត្យលក្ខណៈបច្ចេកទេសយានជំនិះ និងតំណាងក្រុមហ៊ុនឆៀក CMVIC, HK Car Inspection និង So Brothers និងមន្ត្រីពាក់ព័ន្ធជាច្រើនរូបផងដែរ។ កិច្ចប្រជុំធ្វើឡើងក្នុងគោលបំណងដើម្បីពិភាក្សាពីបញ្ហាប្រឈមនានា លើការអនុវត្តការងារនាពេលកន្លងមក សំដៅស្វែងរកដំណោះស្រាយរួមគ្នាធ្វើយ៉ាងណាឱ្យការងារកាន់តែល្អប្រសើរ ក្នុងការបម្រើប្រជាពលរដ្ឋលើការផ្តល់សេវាធារណៈឱ្យបានឆាប់រហ័ស តម្លាភាព និងប្រកបដោយប្រសិទ្ធភាពខ្ពស់។ ទន្ទឹមនឹងនោះ ឯកឧត្តមប្រធានអង្គប្រជុំ បានណែនាំដល់មន្រ្តីក្រោមឱវាទ និងបុគ្គលិកក្រុមហ៊ុន (ឆៀក) ទាំងអស់ត្រូវសហគ្នាឱ្យបានល្អ ត្រូវពង្រឹងសមត្ថភាព និងជំនាញរបស់ខ្លួនបន្ថែមលើការងារត្រួតពិនិត្យលក្ខណៈបច្ចេកទេសយានជំនិះឱ្យបានច្បាស់លាស់ ដោយអនុវត្តតាមការណែនាំរបស់ក្រសួង និងលិខិតបទដ្ឋានគតិយុត្តជាធរមាន ជាពិសេសត្រូវប្រកាន់ខ្ជាប់នូវតួនាទីភារកិច្ច និងក្រមសីលធម៌ក្នុងការផ្តល់សេវាធារណៈជូនប្រជាពលរដ្ឋឱ្យបានល្អ និងគោរពពេលវេលាឱ្យបានត្រឹមត្រូវ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube