បន្ទាយមានជ័យ៖ ស្ពានថ្មច្រកទ្វារអន្តរជាតិ ស្ទឹងបទកសាងបាន៧៩%ដែលជាជំនួយឥតសំណងពីរាជរដ្ឋាភិបាលថៃដែល ស្ថិតភូមិស្ទឹងបទ សង្កាត់ផ្សារកណ្តាល ក្រុងប៉ោយប៉ែត។ លោក គឹម សុវណ្ណ ប្រធានមន្ទីរសាធារណៈការនិងដឹកជញ្ជូនខេត្តបន្ទាយមានជ័យបានប្រាប់ថ្ងៃទី៣០ ខែសីហា ឆ្នាំ២០១៨ ថា ស្ពានថ្មច្រកទ្វារអន្តរជាតិ ស្ទឹងបទនេះស្ថិត ក្នុងភូមិស្ទឹងបទ សង្កាត់ផ្សារកណ្តាល ក្រុងប៉ោយប៉ែត ហើយស្ពាននេះជាជំនួយឥតសំណងរបស់រាជរដ្ឋាភិបាលថៃដែលកសាងរហូតដល់ពេលនេះបានប្រមាណ៧៩% ដែលខាងភាគីថៃបាន៥៦% និងភាគីកម្ពុជាបាន២៣% ស្ពានថ្មនេះមានបណ្តោយប្រវែង៦២០ម៉ែត្រនិងទទឹង១៧ម៉ែត្រ។ លោកបានបញ្ជាក់ថា ច្រកអន្តរជាតិស្ទឹងបទនេះគឺជាច្រកទ្វារសម្រាប់ដឹកទំនិញចេញចូលកម្ពុជា ថៃ និងច្រកអន្តរជាតិប៉ោយប៉ែតសម្រាប់ភ្ញៀវជាតិនិងអន្តរជាតិចេញចូលឱ្យមានសណ្តាប់ធ្នាប់និងសន្តិសុខល្អសោភ័ណភាពល្អ។ លោក គឹម សុវណ្ណ បានបញ្ជាក់ថា ស្ពានថ្មច្រកទ្វារអន្តរជាតិស្ទឹងបទនេះអាចរួចរាល់ឆាប់ៗនៅក្រុងប៉ោយប៉ែត ខេត្តបន្ទាយមានជ័យមានច្រកសេដ្ឋកិច្ចអន្តរជាតិចំនួន២កន្លែងមានច្រកអន្តរជាតិប៉ោយប៉ែត និងច្រកអន្តរជាតិស្ទឹងបទ ដែលជាប់ព្រំដែនកម្ពុជា ថៃ៕ដោយៈ SN