បាត់ដំបង៖ ក្រុមការងារលេខាធិការដ្ឋានសុវត្ថិភាពចរាចរណ៍ផ្លូវគោកខេត្តនៃមន្ទីរសាធារណការ និងដឹកជញ្ជូនខេត្តបាត់ដំបង ដឹកនាំដោយលោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្ត និងជាប្រធានលេខាធិការដ្ឋានសុវត្ថិភាពចរាចរណ៍ផ្លូវគោកខេត្តបាត់ដំបង សហការជាមួយសាខាកាកបាទក្រហមកម្ពុជាខេត្តបាត់ដំបង បានបន្តចុះធ្វើយុទ្ធនាការអប់រំផ្សព្វផ្សាយ ស្ដីពីយុវជន និងសុវត្ថិភាពចរាចរណ៍ផ្លូវគោក ក្រោមប្រធានបទ ការពារជីវិតអ្នក ពាក់មួកសុវត្ថិភាពឱ្យបានត្រឹមត្រូវ ដល់លោកគ្រូ អ្នកគ្រូសិស្សានុសិស្សចំនួន៥៤៧នាក់ ក្នុងនោះស្រីចំនួន២៦៩នាក់ នៃអនុវិទ្យាល័យតាហែន និងអនុវិទ្យាល័យឃ្លាំងមាស ស្រុកបវេល ខេត្តបាត់ដំបង ដែលមានការចូលរួមពីលោកអភិបាលរងស្រុក អធិការនគរបាលស្រុក មន្រ្តីរាជការនៃមន្ទីរសាធារណការនិងដឹកជញ្ជូនខេត្ត តំណាងសាខាកាកបាទក្រហមកម្ពុជាខេត្ត និងយុវជន ស.ស.យ.ក ព្រមទាំងអ្នកពាក់ព័ន្ធជាច្រើនទៀត នាថ្ងៃទី២៩ ខែសីហាឆ្នាំ២០២៤ ។ យុទ្ធនាការនេះ ដើម្បីធ្វើការអប់រំ និងផ្សព្វផ្សាយបន្ថែមទៀត ស្តីអំពីសុវត្ថិភាពចរាចរណ៍ផ្លូវគោកឱ្យដល់ លោកគ្រូ អ្នកគ្រូ សិស្សានុសិស្ស និងស្រទាប់យុវវ័យនៅមូលដ្ឋានសហគមន៍នានាបានយល់ដឹងពី ច្បាប់ចរាចរណ៍ផ្លូវគោក ដោយត្រូវពាក់មួកសុវត្ថិភាពឱ្យបានត្រឹមត្រូវរាល់ពេលធ្វើដំណើរទោះជិត ឬឆ្ងាយក៏ដោយ ការបើកបរត្រូវចេះយោគយល់អធ្យាស័យឱ្យគ្នាទៅវិញទៅមក មិនត្រូវបើកបរក្រោមឥទ្ធិពលគ្រឿងស្រវឹង មិនបើកបរលើសល្បឿនកំណត់ ដើម្បីកុំឱ្យកើតមានគ្រោះថ្នាក់ចរាចរណ៍ ដែលបង្កឱ្យមានអ្នកស្លាប់ របួសពិការ នាំឱ្យខាតបង់ប្រាក់កាស និងបាត់បង់ធនធានមនុស្សរបស់ជាតិ។ លោក ព្រួញ រិទ្ធថា បានបញ្ជាក់បន្ថែមថា ដើម្បីកាត់បន្ថយអត្រាស្លាប់ របួស និងពិការ ដោយសារគ្រោះថ្នាក់ចរាចរណ៍ កត្តាសំខាន់ទាល់តែយើងទាំងអស់គ្នា ចូលរួមគាំទ្ររួមចំណែកមួយរាជរដ្ឋាភិបាល អាជាធរមូលដ្ឋាន ក្នុងការលើកកម្ពស់សុវត្ថិភាពចរាចរណ៍ទាំងផែ្នកប្រាជ្ញា ស្មារតី ក្នុងការថែរក្សាសុវត្ថិភាពសម្រាប់ខ្លួនឯងនិងអ្នកដទៃ ពីគ្រោះថ្នាក់ចរាចរណ៍ ។ លោក ប្រធានមន្ទីរសាធារណការ និងដឹកជញ្ជូនខេត្តបាត់ដំបង បានចាត់ទុកថា ការចូលរួមគោរពច្បាប់ចរាចរណ៍របស់ប្រជាពលរដ្ឋ គឺជាការរួមចំណែកដ៏ធំ ក្នុងការអភិវឌ្ឍប្រទេសជាតិ និងបានជួយរក្សាអាយុជីវិតរបស់ក្រុមគ្រួសារយើង មិត្តភក្តិយើង និងសហគមន៍យើងពីការស្លាប់បាត់បង់មនុស្សជាទីស្រលាញ់ ដោយសារតែគ្រោះថ្នាក់ចរាចរណ៍ ដែលបណ្តាលមកពីការប្រហែសរបស់យើងតែ១វិនាទី ។ ក្រៅពីនេះ លោក ព្រួញ រិទ្ធថា បានធ្វើការណែនាំដល់សិស្សានុសិស្សទាំងអស់ ត្រូវចៀសឱ្យឆ្ងាយពីគ្រឿងញៀន សូមកុំជឿតាមការអូសទាញពីមិត្តភក្តិ ឬនរណាម្នាក់ឡើយ សូមកុំចង់ដឹង ចង់សាកឱ្យសោះអំពីគ្រឿងញៀន ព្រោះថា គ្រឿងញៀនវាធ្វើឱ្យយើងបាត់បង់នូវសមត្ថភាព មិនអាចគ្រប់គ្រងខ្លួនឯងបាន ដែលឈានទៅដល់ការប្រព្រឹត្តនូវអំពើឧបាយមុខផ្សេងៗ ធ្វើឱ្យប៉ះពាល់ដល់អនាគតខ្លួន ឯង គ្រួសារ និងសង្គមជាតិទាំងមូល ។ ក្នុងឱកាសនោះ លោក ប្រធានមន្ទីរសាធារណការ និងដឹកជញ្ជូនខេត្តបាត់ដំបង បានចែកជូននូវសៀវភៅ និងឯកសារផ្សេងទៀត ដែលពាក់ព័ន្ធនឹងច្បាប់ចរាចរណ៍ផ្លូវគោក និងវិធានការសំខាន់ៗ ជាសារសង្ខេបខ្លីៗងាយយល់ ងាយចាំទាំង១១ចំណុច គឺមិនត្រូវបើកបរលើសល្បឿនកំណត់ដាច់ , មិនត្រូវបើកបរក្រោមឥទ្ធិពលនៃគ្រឿងស្រវឹង និងគ្រឿងញៀនជាដាច់ខាត , មិនត្រូវបើកបរស្ថិតក្រោមស្ថានភាពងងុយគេងជាដាច់ខាត, មិនត្រូវផ្ទុកអ្នកដំណើរលើសចំនួនកំណត់ជាដាច់ខាត , មិនត្រូវបត់ ឬវ៉ាជែង ក្នុងភាពប្រថុយប្រថាន ឬប្រើទូរស័ព្ទដោយគ្មានឧបករណ៍ភ្ជាប់សំឡេងជាដាច់ខាត , ត្រូវពាក់ខ្សែរក្រវាត់សុវត្ថិភាពជានិច្ច ក្នុងពេលធ្វើដំណើរតាមរថយន្ត ,ត្រូវពាក់មួកសុវត្ថិភាព និងដាក់ខ្សែគន្លឹះឱ្យបានត្រឹមត្រូវ ,ត្រូវគោរពសិទ្ធិអាទិភាព គោរពសញ្ញាចរាចរណ៍ និងត្រូវប្រកាន់ស្ដាំជានិច្ច ,ត្រូវត្រួតពិនិត្យលក្ខណៈបច្ចេកទេសយានយន្តជាប្រចាំ ពិសេសត្រូវពិនិត្យកង់ ចង្កូត ហ្វាំង ភ្លើងបំភ្លឺជាដើម ,ត្រូវបើកបរក្នុងស្មារតីប្រុងប្រយ័ត្នជានិច្ច ប្រកបដោយសីលធម៌យោគយល់ និងអធ្យាស្រ័យគ្នា និងសូមកុំឈប់ ឬចតយានយន្តនៅតាមកន្លែងមានគំនូស ឬផ្លាកសញ្ញាហាមឃាត់ ។ សូមបញ្ជាក់ថា នៅក្នុងឱកាសនោះក្រុមការងារក៏បានរៀបចំជាសំណួរ ចម្លើយស្តីពីការយល់ដឹងអំពីច្បាប់ចរាចរណ៍ ដល់សិស្សានុសិស្សដែលឆ្លើយសំណួរបានត្រឹមត្រូវ នឹងទទួលបានមួកសុវត្ថិភាព១ ព្រមទាំងចែកជូនឯកសារពាក់ព័ន្ធសុវត្ថិភាពចរាចរណ៍មួយចំនួនទៀតផងដែរ ៕