កំពង់ធំ៖ ដើម្បីបង្កើនសោភ័ណភាពក្រុងស្ទឹងសែន និងជួយសម្រួលការកកស្ទះក្នុងការធ្វើចរាចរណ៍ រដ្ឋបាលខេត្តកំពង់ធំ បានបើកយុទ្ធនាការជួសជុលផ្លូវក្នុងក្រុងនិងពង្រីកចិញ្ចើមផ្លូវម្ខាងចំនួន៤ម៉ែត្រ ចាប់ស្ពានត្បូងចាមដល់ចំណុចរង្វង់មូលផ្លូវវាងក្រុង ដោយអាជ្ញាធរខេត្តមានគម្រោងធ្វើសួនច្បារចំណុចកណ្តាលចន្លោះពី១ម៉ែត្រទៅ១,៣០ម៉ែត្រ ដើម្បីកាត់បន្ថយគ្រោះថ្នាក់ចរាចរណ៍ផ្សេងៗ ហើយជាងនេះទៅទៀតនោះ គឺអាជ្ញាធរបានជួសជុលផ្លូវមួយចំនួននៅតាមដងផ្លូវជាតិក្រវាត់ក្រុងដូចជា លុបជង្ហុគជ្រៅៗ កន្លែងស្រុត កន្លែងដក់ទឹក និងរៀបចំប្រព័ន្ធលូ គឺធ្វើយ៉ាងណាឱ្យមានបរិស្ថានស្អាត និងបង្កលក្ខណៈងាយស្រួលដល់អ្នកធ្វើដំណើនិងអ្នកទេសចរដែលឆ្លងកាត់បានស្គាល់ និងបានទស្សនានៅតំបន់ទេសចរណ៍សំខាន់ៗក្នុងខេត្ត។ លោក ម៉ាក់ ប៊ុនហុង អភិបាលក្រុងស្ទឹងសែន បានប្រាប់ភ្នាក់ងារសារព័ត៍មាន CHN News ឱ្យដឹង នៅព្រឹកថ្ងៃទី២៩ ខែសីហា ឆ្នាំ២០១៨នេះ ថា ការចុះជួសជុល និងពង្រីកចិញ្ចើមផ្លូវក្រវាត់ក្រុងស្ទឹងសែន គឺក្រោមការចំណាយរបស់រដ្ឋបាលខេត្តផ្ទាល់ ហើយក្រៅពីការជួសជុលផ្លូវ និងពង្រីកចិញ្ចើមផ្លូវនេះ អាជ្ញាធរខេត្តក្រុងបានពន្លឿនការសាងសង់រង្វង់មូលដ៏ធំមួយ នៅចំកណ្តាលក្រុង ខាងមុខសណ្ឋាគារ អារុណរះ ដែលបានបង្ហាញសញ្ញាប្រាប់ទិស ដើម្បីបញ្ជៀសការប៉ះទង្គិចគ្នា។ លោកបន្តថា យុទ្ធនាការជួសជុលកែសម្រួលផ្លូវក្រវាត់ក្រុងនេះ ដើម្បីទាក់ភ្ញៀវទេសចរណ៍ជាតិ និងអន្តរជាតិ គឺឈានទៅប្រលងប្រណាំងទីក្រុងស្អាត បន្ទាប់ពីខេត្តកំពង់ធំទទួលបានរំដួល២ទង ពីក្រសួងទេសចរណ៍នាពេលកន្លងមកនេះ។ នៅក្នុងយុទ្ធនាការកែសម្រួល និងពង្រីកចិញ្ចើមផ្លូវផ្លូវនេះ ប្រជាពលរដ្ឋដែលរស់នៅក្នុងក្រុងស្ទឹងសែន បានសាទរចំពោះអាជ្ញាធរខេត្ត និងក្រុង ដែរបានគិតគូរពីបញ្ហាសណ្តាប់ធ្នាប់ និងបរិស្ថាន ជាកត្តារួមចំណែកកាត់បន្ថយភាពក្រីក្រ ប៉ុន្តែពួកគាត់បានស្នើឱ្យក្រុមហ៊ុនជួសជុលផ្លូវនេះជួយពន្លឿន និងសម្រួល ហើយទុកផ្លូវចេញចូលតាមមុខផ្ទះរបស់ពួកគាត់ក្នុងការដឹកជញ្ជូនសម្ភារលក់ដូរជាប្រចាំថ្ងៃផង៕ ដោយៈ CSB